Штар пшала (Безлюдско)

Безлюдско М. Штар пшала (поэма, 1931)

Чюпняри традэла кхэрэ гурувнен,
Кхам гарадяпэ пало вэш.
Штар пшала исыс амэн -
Екхджино заджява мэ дро кхэр.
Дай пхури ман облыя,
Чямудэла муй миро кало -
На галынэ ман о пхэня,
Саро сым обчмндло и мэлало.
- "Кай ту санас мро чяво?" -
Пхури дай ман роспхучела -
"Саро прэ тутэ мэлало".
Ясвэндыр лав на выракирэла.
Обдыкхьём штуба мэ якхэнца,
На дыкхава тринэ пшалэн,
Даё! Со кэрдяпэ мрэ пшалэнца?
Ґалёв чюрдынэ ёнэ тумэн?
Дай сдыкхья мангэ дро якха,
А пиро муй ясва прастана:
- "Сарэ трин... мро чяворо, ґара...
Пашлэ дрэ пхув... тырэ пшала.
 
- Екх умардо сы дрэ пибэн,
Вавир хасия ромэнца прэ чёри,
Тыкно пшал мыя дро старибэн,
На джином, сыр ячёмпэ мэ джиды".
Ило миро сувьяса пусадэ
Пхуромнякирэ лава -
Трин пшала, адякэ хасинэ.
Мрэ якхэндыр прастандынэ ясва.
Ровава, нэ на тангинава лэн,
Тангинава тольки одова,
Бибахтало романо джиибэн -
Дро джиибэн дыкхэна о рома.
 

• * *
  

 
- Мири пхури дай. Сомас и мэ дро старибэн
Заплэндыньдёмпэ дро бут дрома,
Нэ мэ зракхьём миро састыпэн, -
Ваш нэво джиибэн - дро советско бэрша -
Бельвеленца дро клубо сыклыём
 
Дывэса буты кэравас мэ,
Нэво джиибэн, пирдал буты, мэ ґалыём,
Мэ пошунава, кана рикирэн тумэ.
"Миша, мэ про курсы сыклёвава, -
Гана пхэн мири ракирла, -
"Экзамено прэ шоферостэ сыго здава,
А Лёля про рабфако штэто дужакирла.
- Клаша и э Люба сыклёна про рабфаки,
О как сыклёла дро ликбезо -
Биби сыклёла сыр тэ сывэн
Кана рома парувэна прэ кхэра пэскири шатры,
Парувэна фэлда про гаджитко хулаибэн.
 

• * *
  

 
Мэ ґалыём нэво джиибэ,
И на змаравапэ, кана Ленинсконэ дромэстыр.
Даё! Советско власть какана? -
И мэ счюрдава пхураныпэ саро пэстыр.
Мэ на джява пиро пхурано дром,
Адякэ кана на дживэна. -
Дро колхозо дром уджиндя кана ром,
Акана рома нэвэс задживэна.
Откхинёвава набутка мэ,
Дро колхозо амэ вджяса -
Буты тэ кэрэс ласа сарэ,
А ту Ганэ, авэса трактористкаса.
 
Чюпняри традэла кхэрэ гурувнен
Кхам гарадяпэ пало вэш
Штар пшала исыс амэн
Екхджино ачёмпэ мэ дро кхэр.