Тулыс куазен ӝыт азе,
Калык кошке ӧтчаме —
Отын соос верасько
Заём кылэз поттыло.
Нырысь тӧро кыл вераз,
Кресьян заёмез ушъяз —
Кажной коркась кресьянлы
Дэмла заём басьтыны.
Миквор сое кылыса,
Умой сэргы пуксьыса,
Кылтэм-ымтэм кариськиз
Калык сьӧры чалмытскиз.
— Кажной заём басьтӥсьлы,
Сое кияз возисьлы —
Луоз бадӟым пайдаез
Тямыс процент будэмез.
Тӧро озьы вераса,
Веран кылзэ быдтыса,
Поттэ кресьян заёмез
Кресьян понна поттэмез.
— Я кинь басьтоз заёмез
Кресьян понна поттэмез?
— Сьӧд Микворез косоно
Дас манет тыр дэмлано.
Кылӥське калык куара
Ӟоле пи Мавра вера:
«Басьтоно ке басьтоно,
Дано шудэз утчано».
Дас манет тыр заёмез
Кресьян понна поттэмез,
Миквор кияз басьтыса,
Кошкиз дораз дыртыса.
— Кытын кыллид чутыри,
Азьтэм пуны шайтан пи?
Нош кытын ке юид дыр,
Яке мар ке басьтӥд дыр?
Кытын вай ай кисыдэ,
Учко коньдон пуйдэ.
Кытчы карид коньдонэз,
Мынэсьтым ужам дунэз?
— Заём басьтӥ Мание,
Эн тышкаськы ай монэ,
Дано шудмес утчалом,
Оло мар ке но утом.
— Тани ме тыныд утон,
Кулэтэм заём басьтон —
Маръя укват кутыса,
Шукке вожез потыса.
Маръя картсэ зол жугиз:
Укват пумын ӟеч сюдӥз —
Берло корка чалмытскиз
Миквор сюлэм зӥбиськиз.
* * *
Арняен толэзь ортче
Марья картэн ӟеч улэ:
Кулэ ужзэс ужало,
Куд дыр уртче кырӟало.
Миквор сюлэм уг чида, —
Заёмез сярысь малпа.
Кышноез но весь сизьдэ:
«Коньдонэз кисьтӥд» шуэ.
— Мын ай ветлы марыме,
Кыксинь гуртысь кенеше —
Оло мар ке но кылод,
Заёмдэ но чаклалод.
Миквор ог кыл вератэк,
Туж ик сокем дыртытэк
Кошкиз отчы, марыме,
Кыксинь ёрос кенеше.
— Мар ке ивор ӧвӧл-а?
Заём сярысь ӧд кыл-а?
Миквор юа тӧролэсь,
Кыксинь ёрос кенешлэсь.
— Марлы бен кулэ тыныд?
Юа тӧро, кобы ныд.
— Заёмез чаклатоно,
Утэмын-а тодоно.
— Вай ай иське учкомы,
Утэмед-а тодомы —
Тӧро басьтэ газетэз,
Учке заём номерез.
— Тани тынад заёмед,
Тани утон номеред,
Ог сюрс манет утэмыд,
Дано шуддэ шедьтэмыд.
Микворлэн мылкыд лобӟиз,
Шок потса дораз бертӥз
— Эк табере улӥськом.
Ог сюрс манет басьтӥськом!
Сиськытэк но маратэк,
Тӧри валзэ кыткытэк —
Кошкиз пыдын городэ,
Коньдон басьтон иньтые.
Шулдыр бертэ лудэтӥ,
Кырыж-мерыж гоп дуртӥ:
Кырӟа шулдыр кырӟанзэ,
Вера шудо заёмзэ.
— Ну табере улӥськом,
Гуртэ коммун кылдытом —
Ёрос гуртэз шулдыртоз,
Трактор гурен кырӟалоз.
Нош кышноез чидатэк,
Чик пичи но пукытэк
Корка шортӥз легаське,
Укно шоры учкылэ.
Вуиз Миквор ас гуртаз,
Вордскем юртъер котыраз —
Пыре корказ кырӟаса,
Шум потэмен эктыса.
Ӵуказяз ик ӧтчамын
Трос калык лыктэмын
Микворез котыртӥзы,
Солы тыпак паймизы.
— Туннэ коммун кылдытом,
Машинаос басьтылом,
Куинь бусыен гыронмес
Укмыс бусы карылом.
Миквор озьы вераса,
Веран кылзэ быдтыса
Нош ик шуэ калыклы:
— Дыртэ заём басьтыны.
Кыктэтӥ но заёмлы,
Калык понна поттэмлы
Копак гуртсы гожтӥськиз,
Шум потса коньдон сётӥз.
Азьла пала нош шудзы,
Калык «Индус» заёмзы
Коньдон гурен жыльтыртоз,
Коммун нош ик узырмоз.
— Эк ну весела,
Ыштан кал да мучола!
Миквор коммун шулдыртэ,
Ёросъёсыз сэзъялтэ!
