Шудо вапум (Ильин)
| Шудо вапум Автор: Яков Ильич Ильин |
| Поттэмын: Ильин Я. И. Шудо вапум / Вяткаысь Удмурт секциялэн поттэмез. — Вятка: 1-я гос. тип., 1920. — 32 б. |
Одӥг мурт дунне вылэ закон вераса ветлыны потэм.
«Мон вапумлэсь вуэмзэ вераны лыктӥ», — шуэ вылэм со. «Ӟеч вапуммы азьланьын ке но, кема уз ни улы, вуоз» шуса дышетэм.
— Вапумез вуттӥсь мон сьӧры лыктэ, но со мынэсьтым бадӟым, кужмо. Солэн нимыз — Калык, но со изе али. Калык сайкам бере туж ӟеч шудо улон луоз. Солэн верам кылыз буш уз луы: со ачиз вирын но тылын валэктоз. Узыр кузёосыз тӧл турынэн сутоз. Калык соку выжыысеныз йылозяз воштӥськоз. Сыӵе вапумлы дасяськем муртъёс туж шудо луозы. Куанеръёс, ваньбур шедьтыса, шудо луозы. Ужаса курадӟисьёс но, лулзэс эрике поттыса, шудтэм уз кыле. Сютэм муртъёс кӧтсэс тырозы. Тэльмырыса улӥсьёс но шумпотозы. Дасяськымтэ муртъёслы туж шуг луоз но, соос кион кадь вузыны кутскозы. Кудӥз аналтӥськыса «мон дась» шуоз. Но куараез ым пушказ куасьмыса, та дуннеын улэмез уз ни лу солэн. Узыръёс номыртэк кыльыса шуген улозы, соослэсь кылдӥськись уз ни лу. Сӥль-вӧй сиыса улӥсьёслы но каньыл уз луы: кӧт тырымон нянь уз ни сётэ ук соослы. Серекъясь адямиос ялам бӧрдыса, туж курадӟыса улозы. «Вапум вань дыръя, дасяське», — шуисько мон тӥледыз. Дасяське, сюлэмды медаз куалекты. Выль шудлы шумпотыса, мар ужаны мед тододы. Асьтэлы гинэ сюлмаськыса, узырмыны эн малпаське. Узыр понна малпаськись мурт ӟечлыксэ ыштоз; узырез кулэ карымтэ мурт ас понназ узырмоз. Вань ӟечлык калыклы луэмысь, узырмыны курадӟись мурт калыклэн син азяз урод луоз. Аслыз гинэ нимаз ужась мурт, номыр ӟеч уз кары. Вань ужаме муртлы кылёз шуса, аслыз корка лэсьтыны но кышка со. Калык понна огинын ужась мурт, калыклэсь ик ӟечсэ адӟоз. Соку нокинлэн номыре аслаз шуэмез уз ни лу; ваньмыз «калыклэн» луоз. Огдэс огды урод карытэк, куштонъяськемысь дугдэлэ. Бадӟыме пырыны малпась мурт, бере кыльыса калыкен сураськыса быроз. Йыр луыны туртскись мурт возьытэ вуоз.
Таӵе кылъёс вераса, ветлэ вылэм со мурт, соин адямиос со доры туж уно люкаськыса улӥллям.
— Кызьы нимыд, кытын улӥськод, мар вапумез вераса ветлӥськод тон? — шуса юало вылэм солэсь.
— Мынам нимы Олокинь, улон интые (местае) — Музъем; веран вапуме азьланьын али, — шуэ вылэм со.
Ӧжыт улыса со закон верась мурт гуртэтӥ ортчоно луэм но, со доры крестьянъёс люкаськиллям.
— Веран вапумед ку вуоз али? — шуса юаллям соос.
Крестьянъёслы тазьы вераны кутскем:
— Вапум ке вуиз, огазе люкаськыса асьтэдыз шулдыртэ. Кӧй парсез, кӧй скалэз вандыса. Коркады бадӟым ӝӧк пуктыса, куспады сие, юэ. Кин аслаз корказ улэ, отын ик мед улоз; коркаезлы дун тырись мурт, коньдонзэ (уксёзэ) медаз сёт ни. Коркаез ӧвӧл мурт «мыным корка лэсьтыны лыктэ» шуса, юлтошъёссэ мед ӧтёз. Музъемо мурт музъемзэ мед гыроз: ремеслаё мурт, ас ужзэ мед тодоз. Муш кадь, кужымзэс жалятэк, мед ужалозы ваньзы. Улон коркады кык бадӟымесь книжка возелэ; но отчы кажной мурт аслыз кулэзэ но, аслэсьтыз сётэмез луонозэ мед гожтоз. Огаз мар сётэмез луоно, сое мед гожтоз, кыктэтӥяз аслыз мар кулэ, сое мед гожтоз. Ёрмись куанер муртлы, книжкае гожтэмзэ юатэк, кулэ ваньбур сётэлэ. Начар (урод) мурт аслаз аламаезлы винамат ӧвӧл; соин кужмо мурт ас кужмыныз йыр медаз улы. Визьмо мурт ас визьмыныз визьтэм муртэ ялам валэктыса, дышетыса мед улоз. Но кажной муртэ ас эрикеныз судить карыны кулэ: уно ужась муртлэн пунэмез тыремын. Озь ке но, «Ӟеч эрико калыклы музъем вылын но ӟеч улон» шуэмез валась мурт ӧжыт. «Ужамед луонозэ но уд ужаськы» шуыса, кинэ ке винамат каризы ке, соку дыръя шонер вералэ; мултэс ваньбур басьтӥсез но вератэк ватыса эн кельтэ. Визьмо муртъёсыз люкаса, со ужъёс сярысь ӟечгем кенеш каре. Собере пӧяськыса (алдаськыса) янгыш ужась муртлэсь, оло шонерзэ вералоз-а шуса, ӟечкын юалэ. Озь но ӧз ке вера, чик ваньбур сётытэк, эрике поттыса, лэзе сое. Калыклэн дась ужам кужмыныз ужатэк азьтэм мурт луиз ке, дорысьтыды улляса, эн ни лэзе сое, «азьтэм муртъёслы дуннеын инты ӧвӧл» шуса, вералэ.
Крестьянъёс нош солы вераллям:
— Милям гуртын вань кулэ маеке лэсьтыны уг луы. Милемлы дӥсян, но уно пӧртэм вуз но кулэ: соосыз нош карын (городын) гинэ лэсьто; соин ми кытысь шедьтомы сое?
Собере закон верась мурт юам:
— Вань няньдэс сиыса быдтӥськоды-а, вӧйдэс бен кельтӥськоды-а ӧжыт?
Крестьянъёс вераллям солы:
— Ум, ум быдтӥське асьмесь гинэ сиыса: кажной ар вӧй вузаськомы.
Крестьянъёслы пумит нош со верам:
— Карын (городын) улӥсьёслы няньдэс но вӧйдэс вералэ, но милемлы уно пӧртэм вузъёс кулэ шуса вераны эн вунэтэ. Со сямен карын улӥсьёс тӥлесьтыд нянь сётэмдэс шӧдыса, вань кулэ марке лэсьтыса сётозы. Соку нош карын улэмез потымтэ муртъёс гуртэ ми доры лыктыны кутскозы. Кудӥз кулэтэмзэ вералоз, кудӥз нош валче ужалоз. Ӟеч ужамзэс адӟыса, тӥ валалоды сыӵе муртъёсыз. Кажной муртэ, кылыз чебер усто шуса, ужам ужзэ адӟытэк эн ушъялэ.
Таӵе верам кылъёс крестьянъёслэсь мылкыдзэс бугыртыса кельтэм.
Бусытӥ (лудтӥ) кошкыкуз со дышетӥсь бадӟым заступен (корткуен) ужасез адӟем. Со ужась куинь нунал курадӟыса музъемзэ бугыръям но, озь но гыронзэ быдтымтэ.
Кошкись мурт верам солы:
— Плуген ке гырысалыд, гырондэ кемалась быдтысалыд ни.
Гырись верам:
— Мон ачим но туж куанер мурт, бусые но пичи гинэ, плуген гырымон чик ӧвӧл.
Отын ик мукет крестьянъёс но заступен музъемез бугыръяло вылэм.
Узыръёс нош герыен гыро вылэм.
Со юам:
— Тӥ малы, помещик сямен плуген капчиен гырытэк, герыен гырыса курадӟиськоды?
— Ми ачимес но туж куанересь: бусымы но, плуген гырымон ӧвӧл, пичи гинэ, — шуиллям гырисьёс.
Со верам:
— Вапум ке вуиз, та бордъёсыз (заборъёсыз) погыртэ. Бусыдылэсь межазэ гырыса, кенерзэ (прясло) сэрттыса, одӥг валче бусы тупатэ. Помещиклэн сарайысьтыз плугзэ басьтыса, бусыдэс гырелэ. Со сямен тӥни, озь валче ужаса, вань ужъёстэс капчиен быдтоды. Но тодыса улэ: ож бугыръяськыны кутскиз ке, ожлэн куараеныз вапумез вайись сайкалоз.
— Кин тодоз та дуннеын мар луэмзэ, вапум вуыку?
Мукет мурт нош юам солэсь:
— Вытэз тырыны кулэ-а бен? — шуса.
Со верам:
— Пельтэм выжыос тӥ! Кык сюрс ар ни верамын: «Кесарлэсь (Кесарь — вашкала эксэй). Кесарлы сётэ» шуса. Солэсь эксэй ымо-ныро коньдонзэ сётӥд ке, тон озь номырдэ уд ышты. Вапум ке вуиз, коньдон чылкак быроз. Али куанер мурт чик тыремез потытэк выт тыре.
Одӥг мурт нош юам:
— Мынам туннэ басьтэм дӥсянэ аслам ӧвӧл-а ма?
Со верам:
— Мон маин тодӥсько? Тон ачид гинэ тодыса улы сое: Марлы ёрмыса-ӟудыса улӥськод: ужаны но улыны мар кулэ, закон тыныд сётоз; кулэ ке луиз, аслыд ик сётоз. Но кӧня пол верамын ни тӥледлы: мултэс ваньбурзэ возись мурт, ёрмем куанер муртлэсь лушкаса возе. Кошкы! Вапум ке вуиз, «аслам ӧвӧл-а ма басьтэм дӥсянэ» шуса уд ни юа мынэсьтым.
Кышномурт, дораз мыныса, юам:
— Пиналъёсыз, вордӥськем понназы мумизэс яратыны косӥськод-а?
Дышетӥсь верам «кышномуртлы»:
— Нылпидылы сётэм улонды тау карымон вань-а, ӧвӧл-а, вера шонерзэ? Тон адӟиськод-а та нылэз; гижлоен пӧськыен висьыса курадӟемзэ; тӥни солы, даураз курадӟыса улэменыз, улон чик мусо уг поты. Со мумиезлы, сыӵе алама вордэм понназ кызьы тау кароз; солэн мумиез нуны вордсконзэ шӧдыса, кӧт пушкысеныз ик эмъюмен быдтыны малпа вылэм. Но табере со ныл ваньзэ тодэ. Сыӵе мумиез кин ӟеч шуоз но, мар шуса тау кароз, маиз понна яратоз? Уз, чик уз яраты. Вапум ке вуиз, айы но, мумы но (анай но, атай но), пи но уз ни луы.
Тае кылыса калыкъёс абдраса куалектӥллям но, пумитаз мар вераны ёрмиллям.
Верамзэ кылдӥськемзы потыса, калык азьын номыр но кариллямтэ сое.
Куспазы гинэ «та мурт мыдлань вераське, сое виыны кулэ» шуса вераськиллям.
Ӝыт, со вераса ветлӥсь мурт каре пырем но, ремеслаё муртъёс со доры люкаськиллям.
Со, дэритӥ гольык пыдын ветлӥсь муртэ адӟыса, юам:
— Мар ужаса улӥськод тон татын? — шуэм.
— Сапег лэсьтон фабрикын дас час суткалы ужасько, — шуса возем гольык пыдо мурт.
Собере кесяськем дӥсянэн гордэктэм синмо кышномуртэ адӟыса, «тон бен мар ужаськод татын?» шуса юам.
— Мон уен-нуналэн бадӟым магазинэ дась дӥсянъёс вурисько, — шуэм кышномурт.
Дышетӥсь соослы верам:
— Вапум ке вуиз, интыысьтыды потыса, карлэн шораз люкаське, но соку буржуйёслэн ваньбурзы тӥледлы кылёз. Буржуйёслэсь ваньбурзэс куспады огдэс но ӝож кельтытэк, огкадь люкылэ. Тӥляд пӧсяса ужам кужмыныды люкамын узыръёслэн ваньбурзы. Соин азьло курадӟыса шедьтэм ӟечты асьтэлы берытскоз.
Со куспын куазь ӝыт луэм, уно калык кошкем но, куанер муртъёс сое урамтӥ (ульчатӥ) ӟечкын келяса лэзиллям.
Озь эркын паськыт урамтӥ мыныкузы туж чебересь юртъёсыз адӟиллям.
Со юам келясьёсызлэсь:
— Кин изе со юртъёсын? — шуса.
Соос «нокин но уг улы» шуса вераллям.
— Таиз церковь, соиз — суд, отын министръёслэн карзы, соиз нош банк, — шуиллям.
Собере со, сад вӧзы скамья вылэ пуксьыса «татын ачимес иземы» шуса верам но, соос «татын изьыны уг луы» шуиллям.
Со нош верам:
— Ӟичыослэн улон гузы вань, куакаос но каразы уло: адями ке йырзэ понон инты уг шедьты. Вапум вуэмез ке кылӥды, со чебер коркаос пушкын улыны кутске. Ӧсъёссэ усьтэ но, чик кышкатэк улэ, ява. Коркатэмъёслы соку туж ӟеч юртъёс сётӥськоз.
Урамлэн сэргысеныз ветлӥсь кышномурт, сое дораз ӧтьыса, «ойдо мон сьӧры: огмес огмы яратыса уломы» шуэм. Озь кышномурт сое аслыз берыктыны малпа вылэм.
— Тынад пӧяськемед (алдаськемед) куараысьтыд ик тодмо, — шуэм со. — Мылкыддэ но сюлмысьтыд уд сётӥськы: соин сыӵе гинэ яратэм кулэ ӧвӧл мыным.
Собере кышномурт аналтӥськемысь дугдэм но, ӝожомыса нош вазем:
— Мон сютэм, мынам айытэм (атайтэм) пичи нуные вань но, со мон кадик сютэм.
— Калык кадь ужасалыд ке, астэ ачид нылпиеныд кӧттэ тырысалыд, — шуэм со кышномуртлы.
Кышномурт верам:
— Монэ сектэм (кӧто) луэм берам фабрикысь уллязы но, мон со тырысь ужаны ӧй ни дышы. Собере, кышномуртлы дун тыремзэс тодысалыд ке, тон мынэсьтым марлы ужамтэме чик ӧд юасалыд. Монэ кулэ уд ке кариськы, мукет муртэ утчаны эрик сёты мыным: со монэ нуныеным валче сюдоз, — шуэм кышномурт.
Собере со верам:
— Эй кенаке! Дыр вуиз ке, ачид но, нуныед но мугорыныды вузкарыса уд улэ. Соку нокин но пӧяськыса гинэ яратыса уз улы: вань калык сюлмысьтыз эркын яратыса улоз.
Урам сэргын огназ малпаськыса улыкуз, сое чаклась пыӵалэн мурт, дораз мыныса, пельпумаз йӧтыса верам солы:
— Татын дугдыса улыны уг яра.
— Кин бен тон? — шуса юам закон верась.
Пыӵалэн мурт верам:
— Мон начальниклэсь косэмзэ кылдӥськыса уйин ветлӥсь марке, — шуэм. — Та коркаосын пыдэстэм ваньбур ворсамын, мон караулын дыръя воръёс пыризы ке, монэ закон туж зол пачкатоз.
Дышетӥсь юам солэсь:
— Тынад-а бен со ваньбуръёс, оло тыныд люкет сёто-а?
Караулын сылӥсь, серемез потыса, верам:
— Мынам пичи гинэ жаловеньяе сяна номыри ӧвӧл.
Собере со верам:
— Пуныез корка возьмам понназ, жильыен думыса лыэн сяна уг сюдо, — шуэм.
Одӥг пол церковын вӧсяськон дыръя дышетскем муртъёс уно вылӥллям.
— Мар луоз табере соослы? — шуса юам одӥг визьсынась мурт.
— Мон уг тодӥськы, — шуэм со. — Но соослэн кышкано ужзы туж уно. Вашкала дыръя сыӵе дышетскем муртъёс сярысь тазьы верамын вал: «Эркияськон вапум ортчиз ни, кулонлэн гырлы куараез быремын».
Церковын вӧсяськись поп, тае кылыса, вожез потыса, верам:
— Та адями мыдлань вераське, соин сое татысь улляны кулэ, — шуэм.
Дышетскем муртъёс, огинэ люкаськыса, со муртэ улляны туртто вылэм.
Но закон верась дышетӥсь верам:
— Эй, инмарлы вӧсяськись пупъёс! Шуг луоз тӥледлы улон: инмысь эксэйлыкез ворсам поннады, асьтэос но уд пыре, муртэ но пырыны уд лэзиське. Ваньдылы куректон лыктоз тӥледлы, туйкилям гроблэн вылыз чебер ке но, пушказ солэн тросаз сисьмем кыед нымыр. Сюлмаськоды тӥ пӧяськись (алдаськись) пупъёс: калыкез асьтэ пала берыктон понна вуэн музъемез котыръяса ветлӥськоды; берыктэм муртъёстэс асьтэ сярысь дас пол урод карыса возиськоды. Сиротаослэсь, вӧсяськыса ӟеч уж лэсьтом шуса, дӥсян но, сиён басьтэм поннады, куректыса кытчы пырон инты уд шедьтэ тӥ, сьӧсь пупъёс. Асьтэлэн вераськыса ветлэмдылы но туж куректоды тӥ, попъёс: куанерлыкез вераськоды, ваньбур курыса ветлӥськоды, йыр луыны ӧдъяськоды.
Собере одӥг закон бордын бергась верам солы:
— Озь вераськыса, тон милемыз но куркариськод, — шуэм.
Со верам пумитаз:
— Тӥ но, законникъёс, озь ик куректоды дуннеез секыт законэн кутэм поннады; асьтэос гинэ уд шӧдӥське сое. Куректоды тӥ, ӟеч адямиосыз виылӥсьёслы памятник пуктылэмдылы. Асьтэ лулдылы калыклэсь вирзэ кисьтэм поннады, тӥлесьтыд ваньзэ юалозы али. Калыклэн вирыз понна, кин зэмез вераны лыктэм, кинэ тӥ виылӥды, сутӥды, кекатӥды, йыртэм кельтӥды, ыбылӥды — ваньзэ тӥлесьтыд юалозы. Тюрмаын кулэмъёслы но, сибырлэн лымы улаз быремъёслы но, тӥлесьтыд юан-веран луоз. Вань кисьтӥськем вирлы, адямилэн вань курадӟемезлы дунне быремлэсь азьло тӥлесьтыд юалозы.
Калык, со дорын бугыръяськыса, вераськем:
— Со дышетӥсь туж амало, кема уз ни вераськы, дыр, туж.
Дышетӥсь соослы таӵе кылъёс верам:
— Одӥг мурт кулыкуз, кык пиезлы емышо сад вераса кельтэм. Пичи пиез гожтэтлы тодэ вылэм но, туж урод вылэм. Мукет пиез ӟеч мылкыдо вылэм но, ас ужзэ сяна муртлы ужаменыз, азьтэм-бертэм вылэм. Пичи пиез, айыэз (атаез) кулэм бере, оломар кулэтэмъёс гожъяны кутскем. Бадӟым агаезлы сётыса, верам: «Тани, айылэсь (атайлэсь) верам кылъёссэ гожъяй мон», — шуэм. Кылдӥськы, мар верам со ачимелы: «Мон лыдӟись луо но, молитваез чырдыса, лушкем ужъёсыз ужало; тон сое уд вала. Тон сад бордын бергась луод, писпузэ вандылыса, ву кисьтаса, выльзэ мерттылод. Емышъёсыз кисьмаз ке, бичалод, но ачимес сое ум сие, кулэм айымылы малпаса возёмы — тӥни мынам лушкем уже со гинэ». Бадӟым пиез, оскыса, кема кылдӥськыса, улэм, но ӧжыт улыса, ачиз лыдӟыны дышем. Айызлэсь гожъямзэ лыдӟыса, вынызлэсь оломар но мултэс гожъямзэ валам. Собере со вынзэ чакласа улыны кутскем но, огпол садысьтыз емыш сиемзэ адӟем. Пӧяськемзэ медаз тодэ шуса, ватыны луонтэмзэ со куштэ вылэм. Собере со вынызлэн пӧяськемезлы абдрам но, чигиськыса вынзэ садысьтыз улляса лэзем.
Дышетскем законникъёс талэсь шонер верамзэ кылыса, визьтэм кадь луиллям.
Олокызьы но анӟыратыса, канжаса кутыса виыны туртто вылэм сое.
Церковын дышетӥськись, закон верась доры мыныса, юам:
— Дышетӥсь! Законлэсь кылдӥськыны кулэ-а, ӧвӧл-а? — шуэм.
Со тазьы верам:
— Тон кый пи! Марлы монэ дышетӥсь шуиськод? Шонерзэ ке верад, та дуннеын дышетӥсь но, дышетӥськись но ӧвӧл: дышетӥсь ачиз дышетӥськисьёслэсь унолы дышоз. Законэз ке вераськод кылдӥськы: «Астэ ачид яратэм кадик, куанер, муртэ но яраты: со сяна дунне бырытозь номыр но кулэ ӧвӧл».
Салдатъёс пушкысь одӥг мурт, визьзэ сынаса, юам:
— Пиналъёс салдатэ мыноно-а, ӧвӧл-а; оло мынытэк пегӟыса кыльыны луоз-а? — шуэм.
Со верам:
— Сисьмем тусь тон! Тон адями шуымон адями ӧвӧл вылэмед али: тон сульдэр гинэ али. Мон, та дыръя мар ужаны кулэ, сое вераны ӧй лыкты; мон азьланьысь лыктоно вапумез гинэ, калык мед дасяськоз шуса, верасько. Соку дасяськем муртъёс котькытын ке но луизы, мар ужаны тодозы.
Одӥг мурт сюлмыз шуг луса юам солэсь:
— Тон вераськыны туж усто но, ож ке ӝутӥськиз, мар кенеш сётод милемлы?
Со верам солы:
— Акырӟан-курбурд тон! Кин бен мон, тыныд кенеш сётыны? Мынам та дуннеын гуртэ чик ӧвӧл. Мукетъёс но ӟеч уж бордын луозы: уж соку уно луоз.
Крестьянъёс нош юаллям:
— Мар шуоз бен помещик?
Со верам соослы:
— Вапум вуэм бере, помещиклэн кылыз, вераськемез луонтэм, куасьмоз. Солэн сюлмыз урод ке, со кошкыны курадӟоз но, кыдёке мынэмез уз ни лу. Визьмо помещик дунне берыктӥсь кемез шӧдыса, ӧсэныз ӟезьызэ (капказэ) усьтоз но, ужасьёсызлы вералоз: «Кошке ни мон дорысь: мынам табере ужасьёсы ӧвӧл ни; мон коньдон уг ни тыр соослы. Кинлэн монэн кылемез ке потэ, мед кылёз; кошкемез потӥсь муртэ мон уг кутӥськы; ачим мон, кызьы луэ, кызьы мылы потэ, ужало». Куректон-сюлмаськон лыктоз коштан муртлы; соин со ужасеныз одӥг кадь улыны кылёз.
Собере со дышетӥсь таӵе ужпумез верам:
— Туж куанер мурт урод узыр муртлэн садаз ужаса улэ вылэм. Садлэн кузёез туж курадӟытыса возем ужасьсэ: азьтэм шуса ялам жугытэ вылэм сое. «Кузёе садысьтыз улляса лэзиз ке, кызьы мон улом огнам», — шуса, куанер мурт ялам чидаса улэм. Солэн пумитаз визьмо мурт шедем но, сад узыр муртлэн гинэ ӧвӧл шуса, валэктэм. Сад утялтӥсь, узыр кузё кадик, емышсэ мед сиёз. Собере куанер шумпотыса емышсэ сиыны кутскем: азьло бордаз йӧтыны но кышка вылэм. Но узыр кузё, садэ пырыса, жоб куараен черектӥськем: «Азьтэм! Кин лэзиз тонэ, уждэ куштыса, емыш сиыны?» Куанер вераса сётэм: «Сад со тынад ӧвӧл, милям табере. Емышсэ сиемед ке потэ, ужа; мон тынэсьтыд кулэс ӧвӧл». Узырлэн, тае кылыса, туж вожез потыса, ужасьёсызлы верам: «Та муртэ лулыз пичи кыльымон визьтэммытозяз жуге но, чылкак эн вие: мыным ас интыям садам ужась кулэ». Куанер, тае кылыса, заступ кутэм но узырлэн йыраз шуккем — ассэ ачиз кузё шуись отчы ик кулэм, ужасьёсыз кышкаса, пазяськыса кошкиллям. Со сямен кузё кулэм: ужасен огкадь улыны йырыз курен, лулзэ но жалямтэ ни.
Со куспын закон верасьлэн кылъёсыз каре (городэ) вӧлдскем но, дышетскисьёс, дышетскемъёс туж абдраса кылдӥськиллям.
Одӥгез верам солы:
— Тынад веран вапумед гожтэтлы дышетскытэк уз вуы, — шуэм.
Дышетӥсь верам:
— Дышетсконлэсь югыт каремзэ веранэз ик ӧвӧл, но со вуэн кисьтэмын. Мильон мында вань дышетскем муртъёс. Соосыз пичиысен ик эриктэм секыт ужен тӥялтӥллям. Азьло пичи школаын дышетыса, бадӟым школаын дышетыны кулэ. Адямиез дышетӥськомы шуса, тӥ соосыз дышетсконлэсь люкиськоды гинэ. Букваез дышетскоды но дугдӥськоды. Дышетсконлэсь марзэ-созэ валаса уг ву адями — тӥ солэсь оломар тодымтэзэ но юаськоды.
Визьсынась юам солэсь:
— Лыдӟыны но гожъяськыны чик дышетоно ӧвӧл-а ма?
— Та мурт ошиськыса, бергаса улӥсь чонари кадь вылэм, — шуса верам пумитаз.
— Умой сюлмазы поныса валэктымтэ бере, кызьы бен соос гожъялозы, лыдӟозы?
Одӥг дышетскем мурт юам:
— Озь бере, вашкала айыосмылэсь верамзэс кылдӥськоно ӧвӧл-а ма?
— Кулэм муртэ бальзамен зырась тон, — шуэм со. — Кулэмъёс мед сисьмозы эркынак; соосыз возьыны туртскыса сюресэз эн 6ыдты.
Со куспын нош одӥг мурт юам:
— Адями ӟеч улон понна курадӟе но, дунне сое уродлы берыктэ ук.
Со верам:
— Дунне сое шуд утчаны но курадӟонэз быдтыны берыктэ ук; со урод ӧвӧл. Мыдланьлы дышетӥсьёс ваньзы синтэмесь; соос дуннеысь уродэз нокызьы но уг вормо. Кудӥз, калыкез чидась кылдӥськись карон понна, ӟеч улонэз урод шуса, курадӟонэз ӟеч шудо шуэ — озьма амало муртъёслы ӟеч туж.
Но со юам солэсь:
— Озь бен тон сямен урод но, ӟеч но ӧвӧл-а ма?
— Инмысь музъем вылэ лэзиськы, — шуса верам солэн пумитаз. — «Шонерзэ верасько мон тӥледлы»: марке ӟеч — со ӟеч; марке алама со урод. Сюлмаськытэк, астэ ачид шумпотытыса улон туж капчи. Пеймытын сисьмыса, ас мугордэ быдтыса улон уродлэсь но урод; калыклэсь огнад ас поннад улон куректытэ но, малпаськытэ гинэ. Ӟеч-шудо улон: урод-курадӟон Вапум ке вуиз дуннеез шуд шобыртоз. Дышетскон, калыкез дышетыса ӟечез-уродэз валась мед кароз. Пеймыт калыкъёс, кулоно эмъюмез ӟеч шуса юыкузы, туж шӧдытэк кылё: соин соос дауразы курадӟыны кылё. Куддыр, ачизэс пеймытэнызы шудэз кытысь утчаны уг тодо. Но вапум ке вуиз, кажной мурт шудэз но, дышетсконэз, нянез кадик, кулэ кароз. Чиданы косӥсьёсыз кутылозы но туж курадӟытозы. Вормонтэм уродлы валаса сётӥськид ке, вормымон уродлы валатэк сётӥськыны ӟеч ӧвӧл.
Собере со закон верась доры фабрикын ужасьёс лыктӥллям но «Ми мар ужаломы?» шуса юаллям.
Со верам соослы:
— Азьвыл ик секыт ужлэсь но узыр кузё ки улысь эрике потэмдылы шумпотэлэ.
Ужасьёс нош юаллям:
— Кин бен соку ужалоз милесьтым ужано ужмес, кин кулэ тӥрлык (завод) лэсьтоз?
Со верам:
— Тӥрлык кулэ луиз ке, нош фабрике мыныны кулэ. Ужатэк улӥсьёс, капчи ужез ужасьёс тӥледын валче ужаны мынозы. Вань ужъёс борды соосыз тӥ бурйыса лэзёды но, кыӵе ужамзэс чакласа улоды. Усто быгатыса ужамлэн пайдаез уно луоз. Соку нокинлэн номырлы ёрмыса улэмез уз поты, соин тӥрлык али сярысь туж уно кулэ луоз. Купечъёслэн азьло пӧямзы сямен, вылыз чебер но пушкыз сисьмем марке, уз ни лэсьтэ соку. Калыклэн вань лэсьтэмез аслыз луоз, соин соку пӧяса номыре но уз лэсьтэ. Ар секытысь, оло, ӧжыт гинэ пайда шедьтэме луоз-а шуса, сапег вурись сапегзэ сисьмем ултонэн (подмёткаен) вуре. Из корка лэсьтӥсь акыльтэменыз но кузёез жугемысь, корказэ вуж сылмем изэн лэсьтэ. Но со ужасьёс асьсэлы ке ужасалзы, сюлмаськыса ӟеч карыны гинэ малпасалзы: мар пайда бен астэ ачид пӧямысь. Котыр ласянь оломае но верад ке, соку ваньмыз чакласа ӟеч лэсьтэмын луоз нокин но аслыз ярантэмзэ уз лэсьты. Кажной мурт кужымызъя но, визьмызъя уж борды интыяськоз: дась сиись кыл кылыса улоз. Муртлэн кужмыныз ужатэк улӥсь муртэ дорысьтыды уллялэ. Нокинлы вузкарыны эрик эн сётэ ни; музъемлы, бадӟым юртлы, машиналы коньдон эн тыре ни. Аслыз кулэ маркезэ нокин но уз вуза; аслаз ужез ке вань, уз но медъяськы. Кин марлы ёрмыса улэ, со сое аслыз кароз. Соин ӧвӧл муртлы мар кулэ, закон сётоз. Марзэ ке вузась, ужаны медъяськись луиз ке, соку куанер мурт солэсь тӥрлыксэ аслыз кароз, ужасез ӧвӧл мурт нош медъяськисез аслыз ужатоз. Бусые потӥсь ю-няньлы мар кулэ, сое тодыны кулэ луоз. Гуртысь калыкъёслы но, фабрикын ужасьёслы мар кулэ, сое но тодытэк уд луэ. Вань калыкъёс номырлы ёрмытэк, куспазы тупаса шудо мед улозы. Та дуннеысь калыкъёс ваньзы огазе кариськытэк, сыӵе шудо улон уз лыкты. Соин сыӵе вапумлы дасяськыса улэ: кулэ дыръя мар ужаны мед тододы. Азьвыл ке ӧд дасяське, няньтэм ар луоз но, адямиос сютэк курадӟыса бырозы. Но няньтэм ар луиз ке, эн чигиське: карысь (городысь) потыса, гуртэ мынэ. Вань сиён-юон музъемысь потэ ук, музъемез ужась муртлэн оскиськонэз туж уно.
Кинке но юам солэсь:
— Почтаен телеграм, чугун сюресэн паракод кызьы ветлозы соку, вера милемлы? Кызьы лэсьтозы выжъёсыз, мар сямен гудозы (копалозы) канаваосыз, машинаен паракодэз тупатӥсь луоз-а?
Со верам:
— Кызьы ветлэмзэс, кызьы тупатэмзэс, мукет ужъёсыз но мон уг тодӥськы. Тодысал ке но, верамме тӥ ӧд валасалды али. Но мон верало: «Адямилы ӟеч тӥрлыкъёс, азьло сярысь, туж кулэ луозы. Выль сямен улонэн гинэ буйгатыны кулэ соосыз — тӥни озь верамелы оске».
Закон вераса ветлӥсез яратӥсь муртъёс солэн вӧзаз пуксиллям. Со верам соослы:
— Мынам веран вапуме — Улон вапум. Соку калыкъёс, ожмаськемысь дугдыса, ваньзы огазьын ужаса шудо луозы.
Собере одӥг кылдӥськись мурт юам:
— Зарни вапум дыръя улӥсьёс сямен улыса уз лу-а шудо луыны?
Со верам:
— 3арни вапум ортчемын ӧвӧл, азьланьын али со, нимыз солэн «Огазьын улон».
Тае кылыса одӥг мурт нош юам:
— Марлы бен, зарни вапум вуытозь, туж уно ар ортчем?
Со верам:
— Азьланьысь «Огазьын улон» ӟеч музъем вылэ потэм сяськалы тупа. Музъем вылысь изо интыез зор ву миськыса улэ вылэм. Собере со из пурысьтаны кутскем вылаз каллен ӝуй но потэм. Ӝуйлэн улыз ялан кот улыны кутскем — тӧлын ваем сяська тысь отчы усем но, выжы лэзем. Собере со из луоен но, сьӧд сюен нориськем бере, со сюй вылэ быдэс сяська потэм. Со сяськалэн потэмез сямен выль вапумен огазьын улон вуж улон пушкы каллен выжы лэзьыса потозы.
Одӥг мурт, визьзэ сынаса, юам.
— Огазьын улон ке луиз, кышномуртъёслы эриктэм улон луоз ук, — шуэм.
Со вераса сётэм:
— Одӥг кышномурт но ас эрикеныз курадӟытэк нылпи уг вай но дырыз ке вуэ, нуны ачиз ик вордӥське. Лыктоно вапум курегпузысь чипылы но тупа: чипы ачиз ке ӧз кораськы, курегпузысь потытэк кылёз. Но эриктэм кылдымтэ чипы курегпузлэн гердэз бордысь пӧрмем. Курегпузлэн кӧм пушказ со лулъяськем но, быдэс чипы луэм, собере кӧмыз выль сямен улыны мултэс луэм но, лулъяськем чипы, кӧмзэ кораса, выль югыт дуннее потэм, ӧй ке корасал, ӝокаса ик кулысал. Выль вапум но сыӵе ик.
Со верась нош кылзэ будэтыса верам:
— Выль вапум нош зор бере тырмем бадӟым шурлы но тупа. Острове (ву вылысь котрес музъем) потылэм писпуос но, ву пыдэсэ пуксем луо но вуэз ӝог (шаплы) кошкыны уг лэзё. Соку ву, кошкемысь дугдыса, ӵыписькем кадь луэ. Ӵыпет шӧдытэк шорысь кыриське. Писпуос пограло, луо сылмыса быре но — ву вань кужмыныз кошкыны кутске. Озик кулэ сотэк ву ноку но кошкемысь уз дугды, дугдытыны туртскыса токма курадӟемед луоз. Ву но ас понназ бадӟым луымтэ ук, куазь зоремен паськыт луэм со.
Кылдӥськисьёс туж ӟеч валаллям верамзэ но, нокытчы тэрытэк, сьӧд пилем сямен, ветло вылэм сьӧраз. Со ялан дугдытэк верам:
— Ву куддыр вӧлдӥськыса, бусыез но быдтэ, коркаосыз но сьӧраз нуэ. Соин шурлэн кошкон сюресаз номыр медаз дугды шуса, валась адямиос, кудды тӥрен, кудды сапеген дасяськелэ. Озь но ке вӧлдӥськиз ву, со адямиос, вулы кошкон сюрес кырыны туртскыса, кулоно кадь курадӟо, но, со сямен асьсэос ик вуэ пыро. Сыӵе вӧлдӥськем вуын ялан кышкаса, курадӟыса улытчозь, кулӥд ке вань курадӟонэд быроз. Сюлмысьтым ик шонерзэ верасько: мар кулэ дасялэ, вапум вуоз, шӧдытэк кылёды.
Тае кылӥсьёс асьсэ куспын тазьы вераськиллям:
— Со визьмо вера. Ачимес, кышкаса но, урод кыл кылыса гинэ, улӥськомы. Озь улытозь ачимелы сыӵе выль улон пала кариськыны кулэ, улонмылэсь жильызэ гинэ ыштыса, быдэс дунне ачимелы кылёз.
Собере калык, вӧлдӥськыса, кызьы дасяськыны куспаз кенешыса, гуртаз кошкем.
Кинке но со вылысь верам:
— Со, эриктэм улонэз вераса, ветлэ, — шуэм.
Собере дуннелэн йыръёсыз сое виыны тупатскиллям.
Закон верась-дышетӥсь виыны малпась муртъёссэ адӟыса, котыраз улӥсь калыкъёслы верам:
— Мынам вапуме вуиське ни. Мон табере куло ини, соин номыр но уг вера ни, но мынэсьтым вань верам кылъёсме быдэс дунне вылэ вералэ тӥ. Верамдэс юазы ке, выль улонэз вераськом шуэлэ. Озь верладылэсь кышказы ке, соосыз дорысьтыды уллялэ: юн визьмо мурт верам кыллэсь гинэ уз кышка. Табере кошкиды ке но яралоз ни.
Калыкъёс соку ик кошкиллям, вань верамзэ сюлмазы поныса.
Огназ кылем бераз, со доры одӥг мурт лыктэм но, вӧсяськыса вераськыны кутскем:
— Ойдо мон сьӧры, кузёлэн тонэныд вераськон кылыз вань.
Закон верась ас понназ малпам: «Быремын! Но вань верано кылъёсме мон верай табере». Собере ӧтись мурт сьӧры кузё доры мынэм.
Корка пырем бераз, сое соку ик кутӥллям но, вань верамзэ серекъяса тюрьмае пытсаллям.
Ӵуказяз ӵукна азьло вераськыса дасям судэ судить карыны нуиллям сое.
Кыл нулдӥсьёс со закон верасез пачкатыны судэ лыктӥллям.
Судьяос юри абдрам кадь луо вылэм, но кудӥз, «Та туж алама мурт» шуса, черекъя вылэм.
Но со, азьло ик шӧдскыса, номыр но вазьымтэ, собере сое виыны кенешиллям.
Виёно муртъёслэн улоназы нимаз тюрьмае куштӥллям но, со туж малпаськыны кутскем.
Кыдёкысь огназ улӥсь кышномурт но тодаз лыктэм солэн: кулэмме тодӥз ке, сюлмыз чигоз ни шуса, малпам со ас понназ.
Нош ик гурезь йылысь садэн котыртэм пичи корказэ адӟем.
— Кытын мынам яратонэ, мон тонэ яратӥсько, — шуэ вылэм со.
Аслэсьтыз курадӟыса кулонзэ тодыса ик, гуртэтӥ, каръёстӥ, бусытӥ вуоно вапумез вераса ветлыны кошкиз со.
Адями, дуннелэн кужмызлэсь косэмзэ кылдӥськыса, аслэсьтыз ужан потэмзэ ик ужаны кышка.
Собере со закон верась тюрьмаын туж мӧзмыны кутскем, мӧзмемез кулон кадь потэ вылэм.
Озь ас понназ бӧрдыкуз, яратэмзэ малпакуз, визьмыз сайкиськем но, сюлмыз каньыл луэм.
«Кызьы кулэ, ваньмыз озь луоз, — шуса малпаськемысь уг дугды вылэм со. — Емышо писпуэ ог портэм гинэ емыш потэм сямен, адями но шонер ӟеч улонэз утчатэк уз чида. Аслэсьтыз лулзэ но жалятэк, адями шонер улонэз котькинлы вера. Муртлэн шудэз шуд кадик уг поты солы, соин со сое кулэ уг кары. Аслаз визьмызъя, мылкыдызъя лулзэ жалятэк ужан — тӥни со адямилэн туж бадӟым шудэз. Вуж сямен йыр улысь муртъёслы шонерез верась куара тюрьмаысь но кылӥське. Оло, ачимелы но ӟеч улон луоз шуса, со куараез дугдытэмзы луытэк, ноку медаз кылӥськы ни шуса, вуж йыръёс сыӵе выль куараез вирын гинэ дугдыто. Собере соослэн кисьтэм вирзы, зэм (чын) понна виямзэ адӟись луэ, кулонэз верам кылызлы порука луэ. Со сямен мынам кулэме туж ӟеч но вань веранме вераса быдтэм бере — кулэ верамъёсме печатлалоз. Мынэсьтым кылдӥськисьёс малпазы: „Со шонер вера вал“ шуса, „Вуж улӥсьёс сое гуньдытон понна виизы“ шуозы».
Озь вераськыса, со кулонзэ возьмаса дась гинэ улэм.
Ӵуказяз ӵукна шунды ӝужаку, сямен улӥсь йырмуртъёс со закон верасез виизы, но, бадӟым мур гуэ куштӥзы.
Сое виыса выль шудо куараез быдтом шуо вал но, асьсэос ик пӧяськыса ужамзэс, йыромемзэс валалозы али. Гуньдэм куара интые, выль верасьёс быдэс дунне вылэ верано кылъёссэс бургытӥ вераса улозы.
Соку куанер ужасьёс, выль кылъёс кылыса, вуж узыр кузёосыз быдтозы но, дунне вылэ Огазьын улон, шудо вапум пуктозы.