Ниңә икән өләсәйҙәр
Бик ҡайғылы сағында ла,
Наҡыҫ ҡына табында ла
Шөкөр тип әйтә белде?!
Йәнә беҙгә өләсәйҙәр
Илаулама, илаулама,
Мир өҫтөнә бәлә һалма,
Ҡаҡшатма, тине, илде.
Белмәйҙер ул өләсәйҙәр-
Өйҙә генә ултыра ла,
Ауылда ғына тора ла -
Ил тиклем ил дәүмәлен!
Әйтте быға өләсәйҙәр:
Яҙмаһын һис белергә лә,
Беҙ күргәнде күрергә лә -
Илде ҡырған яу мәлен!
Әйтте йәнә өләсәйҙәр:
Сабыр итеү - изге йола,
Сабырҙан сигә ҡайғы ла,
Илаҡтан - һағыш йоға,
Илде ҡаҡ салҡан йыға.
Хаҡлы булған өләсәйҙәр:
Ҡыҫыр көйөккә көйөнмә,
Яҙмағанына - тейенмә!
Йәшәп - инандым быға...
Илаҡлыҡ - йоға... йыға...
