Ылын, ылын гым шы кылӧ...
Ылын, ылын гым шы кылӧ,
Сімсьӧд кымӧр лэптысьӧ.
Менам мусук мунас ылӧ,
Дыр ӧд лоас виччысьны.
Миян сиктным зэв на пемыд,
Кӧсйӧ ӧні югдыны.
Менам милӧйӧй оз радейт,
Керны нинӧм он вермы.
Вылын гулю лэбалӧ,
Борднас сынӧд ӧвтӧ.
Мича нылӧс зон радейтӧ,
Быд вой сыкӧд ветлӧ.
Менам юр вылын тӧлалӧ
Алӧй кашимер чышъян.
Мусукӧй менам гажтӧмтчӧ
Ылын, ылын, йӧз муын.
Менам мусуклӧн кузь вӧньыс;
Сӧмын корӧсь чегъявны.
Менӧ горт дінӧдз колльӧдіс,
Эз куж ӧтчыд окавны.
Миян шоръяс абу джуджыд, —
Сартасӧн мерайтла.
Менам мусук абу ылын,
Рытгорув петавла.
Миян вӧлӧсьт — гажа сикт,
Мыйӧн вӧлі мичмӧма.
Кыдзьясӧн да, козъясӧн,
Томиник да зонъясӧн.
Став чышъянсӧ нин ме новлі,
Ӧтик шаль нин кольӧма.
Став зонъяссӧ нин радейтлі,
Шогмытӧмъяс кольӧма-сь.
Еджыд партук дженьыдик,
Сійӧс он нин содты.
Менӧ мусукӧй оз радейт,
Сійӧс он нин тшӧкты.
Тырмас милӧй лӧгавны,
Тырмас пар нюжйӧдлыны.
Кад нин ӧд бӧр бурасьны,
Ӧтиклаын гуляйтны.
|
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
This work is in the public domain in the United States because it was published before January 1, 1929 (more than 95 years ago). This anonymous or pseudonymous work is also in the public domain in other countries and areas where the copyright term of anonymous or pseudonymous works is 96 years or less since publication. |
|