Эжва йылысь кывбертъяс

by Лебедев Михаил Николаевич

Важӧн вӧлі Эжваыс
Омӧль ногӧн эжвасьӧ.
Ӧні сійӧ буралӧ.
Юква сэтысь сюралӧ
Мукӧддырйи меным!..

Эжваыс кӧ кизьӧр,
Суктас сійӧс Висер.
Лӧкчимыс кӧ воас,
Лӧсьыдджык на лоас
Чериасьны йӧзлы!..

Эжва юыс лёкалӧ,
Кыркӧтш дорсӧ кокалӧ,
Водзӧ мунӧ-ныралӧ,
Гӧрдӧдӧма — виралӧ,
Паськыдалӧ, мургӧ!..

Гожся югыд шонді
Шоныдавны пондіс.
Кодлӧн киссьӧ пӧсьыд,
Эжваын зэв лӧсьыд
Ыркӧдавны асьсӧ!..

Рочалӧны уна йӧз
Вычегдаӧн Эжваӧс:
„Вычегда пӧ миян
Большой ю, бур пиян,
Глубокӧй да джуджыд!..“

Эжваыд кӧ гыа —
Гудыртчӧма лыа.
Эжваыд кӧ шыльыд —
Пыжӧн мунны вильыд,
Лӧсьыдасьӧ кывтӧмыд!..

Эжва вылӧ видзӧда,
Курыд шогӧс личӧда,
Чӧскыдала олӧмӧс,
Ылӧ вӧтла полӧмӧс,
Эбӧсася бура!..

Муса Эжва мамӧй,
Мыйла нӧ тэ яман?
Ме пӧ ӧні дышми,
Ямӧм вылӧ ышми,
Ляпкыдасьны понді!..

Ёнджыка кӧ зэралӧ —
Эжва туӧ, сералӧ,
Видзьяс вылӧ кышасьӧ,
Турунъяслы вильшасьӧ,
Ыджыдасьӧ, ворсӧ...

Мичаалӧ Эжва.
Абу сійӧ пеж ва.
Сӧстӧмалӧ, руньгӧ,
Саридз дорӧ шуньгӧ,
Югыдалӧ ваыс!..

Кӧні Эжва вомыс?
Абу сылы помыс.
Кузьмӧдчӧма ылӧ.
Быдӧн тӧдӧ, кылӧ
Визувтӧмсӧ сылысь!..

Эжва юыс гызьӧма,
Коми йӧзыс шызьӧма:
Кысь пӧ тайӧ воӧма,
Выль кывбертӧм лоӧма?
Шензьӧмасьны позьӧ!..