Эрзянь ёвкст (М. Е. Евсевьев, 1928)/01
ВЕДЬ-АВА.
Эрясть айшть атят бабат кавонест. Атянь бабань арась а эйкакшост, а какшост. Тусь атясь вирьга якамо. Якась сон колмо иеть ды сыргась кудов.
Ютась, ютась — сась симезэ. Комась ветьс ды кармась симме. Ведь ава кундызе сакалодо ды а нолды эснэнзэ. Атясь кармась тензэ энялдомо:
„Нолдамак! — мери, — картсо ули паро айгором, максса тенть!”
Ведь-авась мери: „А эряви айгорот! Алтык, мезьде а содат — нолдатан!”
Атясь мери: „Нолдамак! пиресэ ули паро одониям — максса тенть!”
— А эряви одоният! Алтык, мезьде а содат, нолдатан!
— Вирьсэ улить сисем нешке-пирень, сех паро пиренть максса тенть. Нолдамак!
— А эряви нешке пиреть, алтык мезьде а содат. Нолдатан!
Атясь арцесь и мери: „Улезэ ино тенть, мезьде мон а содан!”
Ведь-авась нолдызе. Атясь тусь кудов.
Пачкоць орта ланкс — чийсь каршозонзо колмо иесэ цёразо, поводевсь кирьгазонзо ды мери: „Эх, тетяй! кода мон учан эснэнть! Мейсь кувать эзить са?”
Атясь кармась аварьдеме ды мери: „Эх, цёрам! эрьгедьмась эрьгедить эзэзэнь ды монь марто эриця а улят, — мон ведь-аванень алтытень!”
[ 4 ]Цёрынесь мери: „Алтымек, алтымек! мон а пелян!”
Эрить-аштыть колмонест. Цёрась уш покшто кайсь. Сон и мери тетянстэнь: „Тетяй, бавлавамак, мон ведь-аванень туян!”
Тетясь баславизе, простясь мартонзо и цёрась тусь.
Ютась, ютась — пачкоць яга-бабань кудос. Совась кудостень и мери: „Сюк! сюк! бабакай!”
— Сюк аволеть мерьдеряй, весть сусковлетень, кавсть нилевлетень! — Месть тия якат?
— Тетям алтымем ведь-аванень — молян сонензэ!
— Ох, цёрам! тон аволь ведь-аванень молят, — тон молят монь лелянень, — сон симместэ тетять сакалодо кундакшнызе — сонензэ тетят алтыньзеть. Азё седе тов — тосо эри монь патям. Сон седе ламо соды. Сон тонавттанзат, кода теемс.
Цёрась лись яга-бабанть кецтэ и тусь таго ютамо. Ютась, ютась — мусь омбоце яга-бабань кудо. Совась эзэзэнзэ и мери: „Сюк, сюк, бабакай!”
— Сюк аволеть мерьдеряй, весть сусковлетень, кавсть нилевлетень! — Месть тия якат?
— Тетям лелятень алтымем, молян тензэ цёракс!
— Эх, цёрам! а эряват тон сонзэ кецэ! Азё седе васов. Мусак покш патянок. Сон седе ламо соды, сон тонавттанзат, кода теемс.
Лись цёрась яга-бабанть кецтэ, тусь таго ютамо.
Ютась, ютась, мусь колмоце яга-бабань кудо. Совась кудостень и мери: „Сюк, сюк, бабакай!”
— Сюк аволеть мерьдеряй — весть сусковлетень, кавсть нилевлетень! — Месть тия якат?
— Тетям алтымем тонть лелятень цёракс. Молян тензэ эрямо!
— Эх, цёрам! а эряват тон лелянь кецэ: сонзэ кардазонзо перька ниленьгемень колия стявтозь — весемень прясо ломань прят пезнавтозь — вейкень прясо ансяк арась — сезэ тонть прят пезнавцазо!
Цёрась кармась аварьдеме. Яга-бабась мери: „Ил'аварьть, цёрам! Мон тонавттан — месть теемс: азё, тестэ [ 5 ]аволь васоло ули эрьке. Кекшть се эрькенть чирес нудей-пулос и аштек. Ливтить колмо яксярк. Не монь лелянь тейтерензэ. Валгить эрьке чирестень, теевить тейтерькс, кайсесызь руцяст-панарост и кармить экшелеме. Тон листь нудей поцто, саить вишка тейтерсть руцянзо-панаронзо и мекев кекшть. Кода экшелевить, кавтотьне орчить ды туить ливтязь, а вишкинесь кадови панаронь вешнеме. Кода мери сон: „Ки саинзе руцян-панарон, туить. Улиньдеряй сон од цёра — улезэ монень мирьдекс,” тон листь и максыть тензэ руцянзо-панаронзо.”
Цёрась тусь. Муизе се эрькенть и кекшсь нудей-булос. Ансяк кекшевсь — ваны — ливтить колмо яксярк. Либор... валксть эрькенть чирес и теевсть мазы тейтерькс. Кайсизь руцяст-панарост и кармасть экшелеме. Цёрась лись нудей-булосто, саиньзе вишка тейтеренть руцянзо-панаронзо и мекев кекшсь марост. Тейтертьне экшелевсть и листь вецтэнть. Кавто покштнэ орчлизь панарост и тусть ливтязь. А вишкинесь кадовсь штапо. Сон мери: „Ки саиньзе панарон — туить: улиньдеряй сон сыре ломань — улезэ монень тетякс; улиньдеряй ава ломань — улезэ тень авакс; улиньдеряй тейтерь ломань — улезэ тень патякс; улиньдеряй од цёра — улезэ тень мирьдекс!”
Кода истя мерсь, цёрась лись нудей-булосто и максыньзе панаронзо. Орчась тейтерьсь и тусть кавонест тейтерьсть кудос. Тейтерьсь симдизе, андызе цёранть и мери тензэ: „Ней азё тетянень, вешть кецтэнзэ тев. Сон карми эснэть андомо, симдеме — иля ярца-симть; мерть: мон сынь тезэ аволь ярцамо, симме — робутамо”.
Цёрась мольсь и мери: „Сюк, сюк, покштяй! Мон сынь тенть робутамо, кодамо тев тень максат?”
Атясь мери: „Ладна коли сыть, якамо тарка эзить тейть. — Мон уш кучиксэлинь кисэть! А ярцат ли мезьдеяк — чей пекеть вачсь!”
[ 6 ]Цёрась мери: „Мон сынь аволь ярцамо-симме — робутамо, — тука тень тев!”
Атясь мери: „Молодец! Ней тевем арась. Сак чокшнэ, ёвтан тенть тев!”
Цёрась велявць и тусь тейтеренть кудос. Кода чизэ чопотець, мольсь атястень тевень кевстеме.
— Тука, покштяй, тев!
— Максан! — мери атясь: — ули монь комсь десятина вирем, азё се виренть валськес корёном таргик, сокик, изык, витть товзюро, товзюрось кенерезэ, нуик, пивсык, яжавтык, кшекс паник, каштоц кайсик, валське тарксик, сипть ве кше-кочом и пря пезэнь путык. Кше чинестень мон сыргозезан!
Цёрась велявць и тусь тейтеренть кудос. Сонсь кува моли аварьди. Тейтерьсь мери: „Мейсь аварьдят?”
— Тетят вельть покш тевь максь. Сон монень знярдо-як а тееви!
— Кодамо?
— Ули комсь десятина вирьзэ. Се виренть валськес корёном таргамс, моданть сокамс, изамс, товзюро видемс, товзюрось кенерезэ, нуемс, пивсэмс, яжавтомс, кшекс панемс, каштоц кайсемс, валське тарксемс, ве кше-кочом синдемс и пря пезэнзэ путомс. Кше чинестень сон сыргозезэ!
Тейтерьсь мери: „Иля мелявт, мать, удок валькес. Те тевсь монь!”
Цёрась маць.
Кода суньдерьгаць, лиссь тейтерьсь кустима пес, таргизе ашо пацянзо, колмо ёнов авулдась эснэнзэ и мери: „Тетянь урензэ, вардонзо! садо монень помоцес!”
Промсть перьканзо видима невидима ломать. Тейтерьсь мери тенст: „Тетянь ули комсь десятина вирезэ; азёдо се виренть таргинк корёном, моданть сокинк, изынк, товзюродо видинк, товзюрось кенерезэ, нуинк, пивсынк, яжавтынк, кшекс панинк валськес, тарксинк, а ве кше тоск каштомостень кадодо!”
[ 7 ]Валське стясь цёрась. Тейтерьсь мери тензэ: „Азё, каштоц кадовсь ве кше, таргик, синьдик шачк ды тетянь пря пес путык!”
Цёрась мольсь, таргизе кшенть каштоцто, синьдизе шачк и атянть пря пес путызе.
Атясь сыргойсь, колмо раст кше чинестень кешнясь и мери: „Вот так молодец, цёрам! Мон мудрёноян-мудрёноян, а тон седе-як мудрёноят! Азё мать, чокшнэс тенть тев а ули. Чокшнэ сак оштё ве тев максан!”
Цёрась велявць и тусь тейтерьсть кудос. Тейтерьсь андызе, симдизе и оймсеме мацтизе. Кода чопотець чизэ, тейтерьсь мери: „Стяк, азё тетянень тевень кевстеме!”
Цёрась мольсь атястень ды мери: „Тука, покштяй, тев!”
— Максан! — мери атясь: — азё вензэ пачк эсинь крильця пестэ эсинь церкувас тейть кшнынь сэдь. Сэденть кавто пельга улест садумарь чувт. Валськес садумарьтне кенерест. Эрьва чувто прясо мораст сякой тицат-нармуть. Валськес печк шачк колмо садумарьть и пря пезэнь путыть. Умарь чинестень мон сыргозезан! Те а теевиньдеряй тенть — прят керяса!
Цёрась велявць и тусь тейтеренть кудос. Сонсь кува моли — аварьди.
— Мейсь аварьдят? — кевксни тейтерьсь.
— Тетят вельть покш тев максь. А теевиньдеряй — мери — прят керяса!
— Кодамо тенть максь тевенть?
— Вана кодамо: вензэ пачк эсинзэ кустима пестэ, эсинзэ церькувас кшнинь сэдь кармавсь тейме. Сэденть кавто пельга садумарь чувт улест. Садумарьтне валськес кенерест. Чувтнэнь прясо сякой тицат-нармуть мораст. Валське колмо садумарьть печкемс и тетять пря пес путомс. Садумарь чинестень сон сыргозезэ.
Тейтерьсь мери: „Иля мелявт, мать, удок валськес: те тевсь монь!”
[ 8 ]Суньдирьгаць. Тейтерьсь лись кустима ланкс. Аволдась колмо раст ашо пацясонзо ды мери: „Тетянь урензэ, вардонзо, садо монень помоцес!”
Промсть перьканзо видима-невидима ломать и мерить: „Мейсь терьдимизь!”
— Робута ули! — мери тейтерьсь: — азьдо, вензэ пачк тетянь кустима пестэ тетянь церькувастень тееде кшнинь сэдь. Кавто пельганзо путодо садумарь чувт. Валськес кенерест садумарьть. Чувтнэнь прясо сякой нармуть мораст!
Валське стявтызе цёранть и мери тензэ:
— Азё, сесть колмо садумарьть, печкить шачк и путыть тетянь пря пес, тоньсь мекев сак монень.
Цёрась тейсь, кода тензэ мерьсь тейтерьсь. Тейтерьсь максь тензэ молотка и прявтомо эске и мери тензэ: „Азё, тетянь кустима песэ ули варя, се варястень чавт те эскесэнть, — тетям сыргози!”
Сыргойсь атясь, колмо раст кешнясь садумарь чинестень и мери: „Ну, молодец, цёрам! азё ней чокшнэс оймсек. Чокшнэ сак, оштё ве тев максан тенть.”
Чопотець чизэ. Тейтерьсь стявтызе и мери: „Азё тетянень, кевсть тев!”
Мольсь цёрась и мери: „Тука, покштяй, тев!”
— Максан! — мери: — Максан! карцо ули сисемь иесэ айгором, азё тонавтык ласте артнеме!
Цёрась велявць и тусь тейтерьстень. Кува юты моры.
Тейтерьсь кевстизе: „Мейсь мик морат?”
— Тетят пек шождыне тевсть максь, секс моран!
— Мезень тев тенть максь?
— Карцо ули сисемь иесэ айгорзо — сень ласте артнеме тонавтома мерьсь!
— Эх, дурак, — мери тейтерьсь: — те самой стака тевсь. Тетям соньсь прянзо айгоркс тейсазо и пекстасазо сисемь кшынь кенкш экшес. Азё седе курок теевть сисемь пондонь молутка, ды сисемь кшнинь [ 9 ]илёвт, парынеть улест. Моньсь айгорсть тонавца, — тонть сон сэвдянзат!”
Цёрась теевць сисемь пондонь молутка и сисемь кшнинь илёвт. Тейтерьсь аволдась пацясонзо и теевсь цёракс. Саинзе молотканть, илёвтнэнь и мольсь кардоньть икелев. Вачкоць сисемь пондонь молоткасонть, ве кенкшесь яжавсь, а кототьнень соньсь айгорсь поцтонть яжиньзе и лись карцтонть. Тейтерьсь кундызе, панцтос и озась ласте лангозонзо. Кепетецть кавонест менель ёжос. Тейтерьсь сисемь пондонь молуткасонть машты и машты айгоронть пря ланга. Сизесь айгорсь, валксь масторов. Тейтерьсь сюлмизе палманьц ды давай эснэнзэ кшнинь илёвтнесэ керямо. Керясь, керясь — илёвтнэ-як весе майшть. Илёв петьнень эцинзе айгорсть судо варяс и карц тарказонзо пекстызе. Сась кудов и мери цёрантень: „Азё тетянень, кевсть оштё тев.”
Цёрась мольсь атястень и мери: „Покштяй, тука тев!”
Атясь мадезь кашланксо — сэреди. Сон мери цёрастень: „Тев тенть больше а ули. Ванды садо вишка тейтерень маро — венчатадызь, — тынь вейсэ роботатадо сонзэ марто.”
Цёрась велявць и тусь тейтеренть кудос. Опеть, кува юты, моры, — ни тензэ максыть!
Тейтерьсь кевстизе: „Тон мейсь таго морат?”
— Мейсь а моран, валське тетят венчасамизь!
— Аволь венчамо — валське тетям кавонек прянок керясынзе. Адя седе курок орготьтянок!
Тейтерьсь сельксь ве сельге эзем пряс, омбоце сельге сельксь кудо куншкас, колмоце сельге сельксь кенкш поровт ланкс. Пекстызь кудость клёцькас ды оргоцть кавонест.
Валське стясь атясь и мери: „Азьдо терьдинк цёранть вишка тейтерень маро венчамо!”
Мольсть кенкш удалов и мерить: „Адядо, тетянк терьдидизь венчамо!”
[ 10 ]Эзем прясо сельгесь пшкаць тенст: „Оштё ансяк стятанок удомсто!”
Мольсть атястень и мерить: „Ансяк стить оштё удомсто!”
Аламос аштезь, атясь таго кучиньзе: „Азьдо, терьдинк венчамо, ней уш кенерьцть чей!”
Киякс кунчкасо сельгесь пшкаць каршост: „Орчатанок ды мольдянок!”
Мольсть атястень и мерить: „Орчить ды сыть!”
Атясь таго учось аламос и мери: „Азьдо, мереде тенст, седе курок саст!”
Кенкш поровт ланксо сельгесь пшкаць каршост: „Совадо, минь аноктанок!”
Панжизь кенкшесть — кияк арась — чаво кудось. Ёвтасть атястень.
Атясь мери: „Азьдо нейке мельгаст паньме. Мезе ки ланксто а муйдядо — туинк монень!”
Тусть мельгаст паньме.
А цёрась тейтерьсть марто чиить и чиить кудов.
Тейтерьсь мери цёрастень: „Мать модасть ланкс, кулцонек, а марят-ли мезеяк?”
Цёрась маць, кулсонесь и мезеяк эзь маряк!
Маць соньсь тейтерьсь, кулцонесь и мери: „Мельганок панить, курок уш сасасамизь. Мон велявтан сыре скалкс, тон сыре-сыре пастухокс. Кармить эснэть кевстнеме — эзить ней ли ютамодо цёрат-тейтерьть, мерьть: неинь — ютасть, кода те скалсь оштё иень ваз ульнесь, а монь ансяк сисемельть иень, сестэ ютасть ваксканок од цёра ды од тейтерь. Мейле кевстядызь: умок а умок ванат тесэ? Тон мерть: сядо ие ули, кода ванан.” И теевсь тейтерьсь сыре скалкс, цёрась сыре-сыре пастухокс. Скалсь ярцы лугадо, пастухсь ашти вакснэнзэ — одижанзо лындат и нолгозо чуди.
Пачкоцьть ваксозост мельгаст паницятьне и кевстизь пастухсть: „Эсьть юта-ли вакскат од цёра ды од тейтерь?”
[ 11 ]— Ютасть! — мери пастухсь: — кода те скалсь ульнесь ве иесэ ваз, а монь ансяк сисемельть иень.
— Умок тон ванат тесэ те скалсть эснэ?
— Сядо ие ули, кода ванан!
— Ну, минек ансяк исяк оргоцть! — мерсть мельгаст паницятьне и мурдасть мекев кудов.
Тейтерьсь и цёрась велявцьть мекев ломанькс и таго тусть чиеме.
Састь кучозетьне атястень и мерить: „Эзьнек муйть, мукшнынек ансяк ве сыре скал, — сыре-сыре пастух ваны эснэнзэ — одижанзо лындат и нолгозо чуди!
Минь кевстлинек пастухсь: эсьть ютак-ли ваксканзо од цёра ды од тейтерь. Сон мерьсь ютасть, кода те скалсь ульнесь ве иесэ ваз, а монь ансяк сисемельть иень, сон скалсть эснэ ваны уш сядо ие.” Атясь мери: „Эх, дуракт, дуракт! Неть самой сынь ульнесть, — скалсь тейтерем ульнесь, пастухсь — цёрась. Азьдо нейке таго мельгаст паньме и мезе муйдядо ки ланкстонть — туинк монень!”
Сынь таго тусть.
Тейтерьсь мери цёрастень: „Мать, кулцонек, — а марят-ли мезеяк!”
Цёрась маць, кулсонесь и мери: „Мезеяк а маряви.” Тейтерьсь мери: „Ну-ка моньсь мадян, кулсонян.”
Маць и мери: „Таго панить мельганок, аволь васолот уш, — нейке сасасамизь. Мон тейса прям ташто церкувакс, тонть тейдян сыре попокс. Кевсттядызьдеряй мельганок паницятьне: эсьть юта-ли тия од цёра ды од тейтерь, тон мерьть: ютасть, кода не церькуватьнень мон ансяк строилень оштё, мон кода служан тесэ кавто сятт ие уш ули.”
Пачкоцьть паницятне. Совасть церькувастень — церкувась чаво, — служи эснэнзэ ансяк ве сыре-сыре поп: ташто котёл кадилазо, левшень карькске ведьмезэ.
[ 12 ]Паницятьне кевстизь: „Эсьть юта-ли тия од цёра ды од тейтерь?”
— Ютасть, — мери попсь, — кода мон не церкуватьнесэ ансяк строилень оштё!
— Умок тон служат не церкуватьнесэ?
— Кавто сятт ие ули, кода служан!
Паницятьне велявсть мекев и тусть кудов. Тейтерьсь и цёрась велявсть мекев ломанькс и тусть таго чиеме.
Атясь кевстни паницятьнесэ: „Я, мукшныде мезеяк?”
Сынь мерить: „Мукшнынек ансяк ве каладо бока церькува — эснэнзэ служи сыре-сыре поп. Кевстьнинек попсть — эсть юта-ли ваксканзо од цёра ды од тейтерь. Сон мерьсь: ютасть, кода не церкуватьнесэ сон строиль оштё, а сон церкуватьнесэ кавто сятт ие ули, кода служи.”
Атясь мери: „Эх, дуракт, дуракт! Не самой сынь ульнесть, — церкувась — тейтерем, поп — цёрась.
Тынк ланкс нать а месть кеммекс, — молян моньсь кундасынь!” Стясь и вармакс тусь мельгаст.
Тейтерьсь мери цёрастень: „Мать, кулцонек, а марят-ли мезеяк!”
Цёрась маць, кулцонесь и мери: „Мезеяк а маряви!”
— Ну-ка моньсь мадян! — мери тейтерьсь.
Маць, стясь и мери: „Тетям соньсь мельганок пани — нейке кундасамизь. Тоньть тейдян эрькекс, моньсь велявтан кит-калкс.”
Теизе цёранть эрькекс, соньсь велявць кит-калкс.
Пачкоць тетясь, кирнявць вецтень и теевсь щукакс и давай кит-калонть мельга паньцеме. Ансяк кундамо, кит-калсь стявцыньзе сардонзо и а нилеви тензэ. Панцесь, панцесь — сизесь и мери тейтерьстень: „Ульть сисемь иеть сукакс!” Соньсь велявць мекев и тусь кудов.
[ 13 ]Эрькесь велявць мекев цёракс, калось — сукакс, и тусть кавонест таго ютамо.
Пачкоцть цёранть веле пес. Сукась мери: „Тон азё кудов, мон теск кадуван. Монь тетям сюдымем сисемь иеть кискакс якамо, но мон сисемь чиде мейле мекев тейтерькс велявтан, — молян сисемь чиде мейле тынк кудос и венчатанок. Ансяк вана мезе теньть мерян: молят тон кудов, — тосо улить тоньть кавто сазорот. Весемень палци, весе палци кудосо семиянть, вишка сазорот иляк пала, — сонзэ паласакдеряй — монь стувцамак!”
Цёрась тусь кудов, сукась кадовсь веле пес.
Сась цёрась кудов. Весе радувасть эзэнзэ. Сон весемень палцинзе, весемень палцинзе, эссе палак ансяк вишка сазоронзо. Вишка сазорсьть мельс апаро саизе, кармась аварьдеме ды мери: „Мейсь, леляй, монь эзьмек пала, мезень апаронть мон теинь теньть?” Лелястень жаль марявсь сазорсь. Сон арси эсь пачканзо: „Ара стувца мон ладязь ним, — паласа сазором.” Саизе ды палызе. Кодак палызе — весе стувтыньзе месть прянзо ланга ютасть; стувтызе эсьтензэ ладязь тейтерьсть-как, кона марто атясть кецтэ оргоцьть. Тетятьне-аватьне арцесть сонзэ урьвакстомо. Ладясть тензэ тейтерь и самодо мейле сисемеце чистэнть тейсть свадьба. Озавтызь одирьватьнень-содамотьнень эзем-пряс и кармасть симме-ярцамо. Цёранть марто сазь тейтерьсь велявць гулькакс, ливтясь цёранть кардайс, валксь лисьма унявт пряс и теевсь мекев мазы тейтерькс.
Мольсь цёранть покш сазорозо ведень кандомо. Комась лисьмастень ведень амольдямсто, неизе тосто тейтерьсть сулеензэ и мери эсь пачканзо: „Кодамо мон мазыян, ды пароян, ды карман ведень кандомо.” Каинзе ведратнень и тусь кудов ветьтеме.
Кудосонть кевстизь: „Я, мейсь эзить кант ведь?” Тейтерьсь мери: „Мазыян, пароян ды карман ведень кандомо!”
[ 14 ]Мольсь ведень кандомо вишка сазорсь. Сеяк варчтась лисьмастень, неизе тейтерьсть сулеензэ и мери: „Мазыян, пароян ды карман ведень кандомо!” Каинзе ведранзо и тусь кудов сеяк ведьтеме.
Кудосонть кевстизь: „Я, тон мейсь эзить кант ведь?”
Сазорсь мери: „Мазыян, пароян ды карман ведень кандомо!”
Мольсь соньсь цёрась ведень кандомо. Варчтась лисьмастень, неизе тейтерьсть сулеензэ и содызе. Тейтерьсь валксь лисьма унявт прястонть, кундасть кетьте-кец цёранть марто и совасть кудос. Кудосонть панизе эзем-прясто одирьванзо, озавтызе ваксозонзо сонсинзэ марто сазь тейтерьсть и кармасть гуляямо. Мон-гак тосо ульнинь. Винадо-пиядо симинь.