Эрзянь ёвкст (М. Е. Евсевьев, 1928)/09
ЛОВНЯСЬКЕ.
Эрясть-айшсть атят бабат кавонест. Арасть сынст а эйкакшост, а какшост. Эрить кавонест и мелявтыть — ки сыредезь карми эснэст симдеме-андомо.
Сась теле. Прась лов. Весе эйкакшт листь ульцяв и кармасть ловонь ломанень тейнеме. Бабась мери: „Адя, адя, ульцяв, коть ловонь эйкакш тейдянок!”
Листь кавонест ульцяв и кармасть ловонь эйкакшонь тейме. Тейсть тензэ рунго, кеть, пильк. Прястень тейсть кавто варят сельмекс, тейсть судо, пилеть. Кармасть кургонь тейме. Ансяк тейсть трокс кикс, эйкакшось панжиньзе сельмензэ и кармась атятьненень бабатненень сюкунякшномо и кецэнзэ, пильксэнзэ чаравтомо. Бабась радувась. Саизе ловонь эйкакшонть берюмазонзо и чиезь мартонзо кудов.
[ 39 ]Эрить колмонест. Атястень, бабастень оказия эйкакшось. Лем эйкакшостень пуцть Ловняське. Телень перьк Ловняське кайсь покш тейтерькс. Ашо, мазы. Сяк марто пееди, шути. Ансяк вельть уш ловтаня, — верь панкс прок арась эйсэнзэ.
Кармась телесь ютамо. Штатоцьть пандо прят. Лембе масторсто мурдасть письмарт и кармасть морамо. Ансяк Ловняське таго мейсь кармась таймаскадмо. Лоткась пеедьмеде-шутямодо. Маней таркасо а-яшти, яла экше таркас кекши.
Солась остатка ловсь. Лугат пижилгацть. Ловняськень ялганзо кармасть ульцяс кужонь тейнеме, тундонь моронь морамо. Састь сынь Ловняськень-гак терьдеме. Ловняське а лисикскель ульцяв, а бабазо мери: „Азё, Ловняське, налксек ялга ютксо, паряк седе весёлгадат”.
Ловняське лись ульцяв Вачтась чись лангозонзо и солась. Кадовсть таго атят-бабат эйкакштомо.