Эрзянь ёвкст (М. Е. Евсевьев, 1928)/25
ПЕЛЬКИНЕ.
Эрясть-айшсть атят бабат кавонест. Арасель сынст а эйкакшост, а какшост. Атясь стясь валське и тусь сокамо, а бабась кармась чевень лазномо. Лазнось, лазнось — керизе пельказо. Тапаризе пацине поц ды путызе пизыне пряс, а сонсь кармась пачальксень паньме. Кода пачалксетьне паневсть, мери: „Эх, улевельгак цёрамок, молевель паксяв тетянстэнь пачалксень кандомо”.
Пизыне прясто трёнк! кирнавць пелькине и мери: „Авай, мон молян тетянень пачалксень кандомо!”
Бабась радувась, сюлмась паця поц пачалксеть и максынзе пелькиненень. Пелькине саинзе пачалксетьнень, кандынзе паксяв, максынзе тетянстэнь, сонсь сыргась кудов.
Тетязо мери: „Ванок, цёрам, вергис илянзат кунда”.
— А кундасамам, — мери пелькинесь и тусь.
Ютась, ютась, понксь каршозонзо вергис и мери: „Пелькине, мон сэвдян!”
— Илямак сэвть вергис, — эстеть берянь ули!
Вергис саизе ды нилизе пелькинень целом.
Аламось аштезь верьгизэнь таго вачсь пекезэ.
— Молян, мери, скалонь стадас, вазнэ салан.
Ансяк кармась стаданть малас пачкодьме, Пелькине поцтонзо сергець: „Ванок, ванок, стада ваны! Вергис моли, вазнэ салы!” Маризе стада ванысь пелькинень, чийсь — панизе вергизэнь. Аламос аштезь мольсь вергис ревень стада вакс, ревень саламо.
Пелькине таго сергець: „Ванок, ванок, стада ваны! вергис моли, реве салы!”
[ 86 ]Тестэяк панизь верьгизэнь. Ве пе сась вергизнэнь, мезе-як а салави, и мери Пелькиненень: „Пелькине, листь поцтон!”
А Пелькине мери: „Кандумак тетянь вальмалов — лисян”.
Вергис кандызе и мери: „Я, Пелькине, листь: тетять вальмалотанок!”
А Пелькине мери: „Кепедимак вальма ланкс, — лисян!”
Вергис кепедизе и мери: „Я, Пелькине листь!”
Пелькине лись, кундызе вергизэнь пулодо ды сергець: „Тетяй! кант седе курок узере, маштык верьгизэнь: пулонзо керик монень шаркс, а кедензэ — тулупокс.” Тетясь стясь ды маштызе вергизэнь.