Эрзянь ёвкст (М. Е. Евсевьев, 1928)/43
СЕИНЕ.
Пекиясь, лангиясь сеине, тусь вирев левксыямо. Мольсь пекше алов и мери: „Пекшине, а пекшине, нолдамак алот левксыямо!”
Пекшине мери: „пры лопинем, чавови левкскеть!”
Мольсь сеине тумо алов и мери: „Тумине, а тумине, нолдамак алот левксыямо!”
— „Пры сэринем, чавови левкскеть!”
Тусь сеине тумоньть ваксто. Мольсь, мольсь, мусь кудыне.
— „Кудыне, а кудыне, нолдамак левксыямо!”
— „Совак, левксыяк”, мери кудынесь.
Совась сеине, левксыясь.
Аштесь, аштесь левксэнзэ вакссо, пекезэ вачсь и мери левкснэнень: „Тынь, эйдень, ащеде кудосо, а мон молян вирьга-укшторга якамо, тантей тикшеде ярцлеме, кельме ведьнеде симнеме, ды ванодо, моньтемень киньгак илядо нолда!”
Тусь сеине. Якась вирьга-укшторга, ярцась тантей тикшеде, симсь кельме ведьнеде, сась кенкш удалов и моры: „Паншт, эйдем! паншт, эйдем! ве потесэнь ойне кандан, омбоцесэ ловцо кандан!”
Панчсть левкснэ. Симдинзе, андынзе, таго тусь вирьга якамо.
Маризе сеинень овто. Сась кенкш удалов ды моры эчке вайгельсэ: „Паншт, эйдем! паншт, эйдем! ве потесэнь ойне кандан, омбоцесэ ловцо кандан!”
[ 128 ]Левкскетьне мерить: „Иля, иля маньче, а панчтанок, аволь авамокат, — минек аванок вайгельзэ човине ды мазы, а тонть эчке ды а мазы.”
Тусь овтыне кузницяв, човавтызе келензэ, таго сась кенкш удалов ды чова вайгельсэ моры: „Панчт, эйдем, панчт эйдем! ве потесэнь ойне кандан, омбоцесэ ловсо кандан!”
Левкскетьне манявсть, сынь мерьсть аваст сась, панжизь кенкшенть. Совась овто кудостень, каподиньзе левкснэнь и тусь.
Сась авась и моры кенкш удало: „Паншт, эйдем, паншт эйдем! ве потесэнь ойне кандан, омбоцесэ ловсо кандан!”
Морась, морась — кияк тензэ эзь панчт. Тусь аварьдезь мекев велес и течемень чис тосо эри.