Эрязденть арсезь (2010)/"Аттестат зрелости"
[175]
| «Аттестат зрелости» |
ЯКАН, ардтнян Каспий морянть чирева, келейстэ сравтневезь ошканть. Прописка марто паспортом, сюкпря Элина патянень ды Мишок лелянень, зепсэнь. Вешнян важодема тарка. Ков а сован, эрявить нефтань таргамо тевень операторт. Кие те истямось, мезе теи, парсте эзинь сода. Содамскак эзинь бажа. Якан, карть калавтан, кенкшть панжтнян чи, омбоце... Козонь а сован, теке: арась. Апак учо Сабунчисэ сельмень икелев понгсь ве учреждениянь келей кузтемань латочирес понгавтозь яволявтома: «Бакинскому театру юного зрителя имени Максима Горького срочно требуется рабочий сцены. Оплата по штатному расписанию».
«Театр имени...» — тошказь, пельксэнь-пелькс ды апак эрязкале лиссть турван юткова валтнэ. Эзь кемеве! Он? Мираж? Ютынь конёвонть ланга омбоцеде. Мезеяк эзь полавтово: «требуется», икелекс — «срочно». Кеняркстонть седеяк сеедьстэ токнозевсь седеем. Уцяскам, лисни, сонсь вешни эйсэнь. Варштынь алга тешкстазь адресэнть лангс ды сеске, шкань апак ёмавтне сыргинь вешнемензэ. Сабунчистэ, буень центрастонть, эрявсь ардомс ошонть куншкас.
Кувать чийнемс-ардтнемс тень эзь саво. Вана сон, тешкстазь адресэсь, вана театрась! Келей вальма колмо этажсо кудо. Совинь. Ванстыцясь мерсь ютамс кадрань нупальс. Ютынь. Невтинь паспортон-мезень. Ламонь апак корта мерсть сёрмадомс энялдо-
[176] «Бакинскому театру юного зрителя имени Максима Горького срочно требуется рабочий сцены»... Омбоце чистэнть уш кундынь важодеме. Баку. 1952 ие
ма. Савсь аламос учомс. Печатасть кармавтома, макссть важодицянь книжкине, ды омбоце чистэнть уш кундынь важодеме.
...Залось чаво. Азорозо удыця вецана чоподась. Лангозон ваныть, лип а мерить, сонзэ партерэнь ды бельэтажонь якстере коцтсо оршазь креслатне. Кодамо сон, зярс сакшныцятнеде оймсицясь, покш, кодамо сэрей потолокозо! Чокшне пешкеди тыц. Ваныцятне кармить сценанть лангсто неезденть-марязденть пейдеме, кецнеме, авардеме, ризнэме, кежиявтнеме. .. Кортыцятне-налксицятне, артисттнэ, зярыя шкас теевить лангсост прявтокс, валдочинь ды паро ёжонь кандыцякс.
Ютко шка. Ськамон. Чатьмониця чоподантень ванозь, аштян стядо сценанть икелькссэ. Ёжомарямотне мештезэнь а кельгстявить. А марявить пильгень сталмост, улемась кияксонть лазонзо лангсо. Маряви кодамо-бути асодавикс вий састо-састо кепеди эйсэнь потолоконть, сюпав, ламо толсо палыця люстранть пелев. Анокт либорк ливтямс кельпрястон валтнэ: «Вана, вана мезде арсинь зярыя иень перть, вана мезесь а весть тень сакшнось онстон! Вана мезде ёвтнекшнэсь тень Дубинькань ялгам Азиков Миша!».
Тестэ, те кепедезь-сэдязь таркастонть, пшкалесть, тердсть эрямо седе валдо, ванькс эрямосо мода-масторонь инетнестэ инетне: Шекспир ды Сервантес, мельгаст — Островский, Щепкин, Каратыгин, Станиславский... Ламодояк ламоксть невтневсть Мирза Фатали Ахундовонь, Низаминь, Гоголень, Чеховонь, Толстоень, сень, кинь лемсэ лемдезь минек театрась, Горькиень, пьесаст.
Московсо, Вишка Театрань сцена лангсо невтезель, карминь содамо, эрзянь сёрмадеенть Коломасов Василиень аволь шожда велень эрямодонть «Прокопыч» пьесазо. Путомстонзо режиссёрось а весть тердтнизе авторонть Московов.
Аштетяно сценанть икеле кавонек: мон ды талномань ёжом.
[177] Курок пешкеди залось, мадстьсызь залсонть толтнэнь, ды ушодови, карми ютамо, перькан эрямонть коряс седе мазый ды видечиде пешксе эрямо.
Цяк-цяк сыть цёратне — сценань важотне. Сыть, ды вейсэ карматано декорациятнень аравтнеме ваныцятненень вечкевикс, секскак театрасонть сеедьстэ молиця «Аттестат зрелости» спектаклянтень. Сонзэ эйстэ ушодови театрасо важодемам. Сон — эрямосон васенце спектакля.
* * *
Истя удалов кадовозь 1952-це иень сёксень вейке чистэ эрямосон васенцеде вастовкшнынь покш бажамон марто, конань лемезэль Театра, васенцеде эскельдякшнынь сцена лангс. Марявкшнось тень: муия кудонть, косо карман эрямо оймень лисемс, сонзэ эйсэ — эрямонь смустем. Истя эзь лисе. Ды а янксян, мекс шкань ютазь кадыя кувать ветневиця ды окойники муезь эрямо таркам. Арсиця, оймамонь а содыця, содамочинь вешниця ломаненть эрямосо, седеяк од шкасто, истямо чарькодема — «саты» — арась. Оймень сюпавчинзэ, келензэ-валонзо, содамочинзэ кенерить пингензэ прядовомс.