Эрязденть арсезь (2010)/Аниська
[42]
| Аниська |
Те лемесь войнань шкасто ды мейлеяк эзь валгоне кельпрястонок. Седеяк тунда, пиже панжиковонть прядовомга. Аниська ды аниська.
Мезень парось те тикшинесэнть? Мезень мазысь? Варштат лангозонзо: кода кортыть, а сэрь, а келе. Мейсэяк пек а явови лиятнень эйстэ. Панжи ашосто. Прязо моли зонтик ёнов. Лопанзо теке пурькань. Явови-арась, тейтерень, истя чевтьстэ ёвтавиця те лемесь, эрясь ламонь превсэ. Нейгак, ламо иень ютазь, мартонзо вастовомсто Потмовам юты кепе-штапо, ялатеке кеняркс ёжодо пешксе эйкакшпингедем ледстнемань лембе коштке. Нейгак ваксканзо ютамсто сюконян тензэ.
...Кизэнь маней валске. Мизолдозь мизолды Теряй васоло покштянь кудопрясто чипаесь. Ваны сон минек пелев. Те ёнксонь кудотне, пирявкстнэ, латотне, чувттнэ — весе экшелить вечкевикс сырнень валдосонзо. Паро! Ойметь солы мельспародонть — аштемс, ансяк лисят лембе вельксэнть потсто, валскень экшесэнть чипаенть каршо. Допрок а сыргозяткак — седе курок ушов.
Озынь кузтемпес. Кецнян од чинтень.
Лембе таркадонть мейле маряви экше. Саимим сурневкс. Ялатеке аштян. Ванан лопинень пес содавикс кальтнень лангс, ванан, кода поксарить-пулькить кинь пелькссэнть саразтнэ. Оно шабранок Эремкань Миша ялгамгак прянзо невтизе. Сонзэяк, ванан, палси чипаесь. Неимим, ды сась минек кузтемпес. Сёрмадозь Мишакс. Ансяк минь, куринкань цёрынетне, мертяно тензэ Эрьмай. Кудолемсэ.
— Калмоньчей лангов молят? А? Молят-арась? Аниськат-неде тосо... вана! — педясь эйзэнь Эрьмай, теке педякай тикше, адя ды адя. — Кемат? Куш, келя, улав уск. Ёгань Вашур [43] тень мерсь. Сон сырькаензэ марто якась. Кандсть. Монсь неия. Молят? Адя, а маняват...
Эрьмай истямо цёрынесь: куроксто эйстэнзэ а менят. Мон озадо аштян кузтемпень вере чалгавкссонть, Эрьмай — икелень, стядо.
— Ды мон, ды... — кавтолдозевинь, сеске тень превс эзь са мезе меремс. — Мон молевлинь, ансяк сазорнэм, Веруш... Ков сонзэ марто?
— Ков, ков — тесэяк эзь талакадт, мусь, нонай левкс, мезе меремс, — мартонок сайсынек! Вейсэ седеяк вадря.
— Паро, сайсынек Верушоньгак! — меринь жой вайгельсэ, прынь вемельс ялгань марто.
...Кись аволь нурькине. Эскелямс тенек сави колмошка вайгельпеть.
Ютынек Кардалейненть трокс сэденть ды куроксто лисинек веленть томбалев. Кись паксянь, ардтницят эзганзо аламо, таргавсь пижелдыця лисевкстнэнь-сюротнень юткова. Терди эйсэнек икелев. Менелень сэньксэсь гайгезь гайги норовжорчонь вайгельтнеде.
Вана Калмоньчей лугинеськак.
Мекс, а чарькодеви, тандавтнить эйсэнек, пакшатнень, те лемсэнть? Кодат тесэ чопачат? Кодат сулейкст? Лемесь ансяк... Мейле мезе? Мезде пелемс? Кодат теть те чеядавксов луга панкскесэнть Ведяват?
...Тандавтнесть эйсэнек, атятнень ёвтнемга, оно мезень кувалма.
Зярдо-бути те таркасонть ульнесь тусто вирь. Пачканзо а юта-вилить. Ней, ков а варштат, — паксят. Ледстнемакс эйстэст кадовсь ансяк Пичепе лемесь. Начко таркинеденть авасоло ульнесь Орданьбуень умонь эрицятнень ознома таркаст — Репештяст. Эйстэнзэ пельвайгельпешкань ютко — Сёвонь латкось. Домка ды ватола. Потмаксканзо чии-чольдерди, теке уцясканзо вешни, Керь лейнесь. Ине куронть маласо, сэрей пиче ютксо, ульнесь калмазырь. Калмсесть тозонь, зярдо Христосто эрзятне эзть марсеяк, зярдо озность Инешкипазонтень. Секс Сёвонь латкочирева начко таркатнень лемдекшнызь Калмоньчеекс...
...Триця-андыця тикшиненек вастневсь чуросто. Аволь Эрьмаень валонзо коряс: кандт, зяро кандови. Сонзэ мельга минденек башкаяк ульнесь кинень пансемс. Тикшесэ прянь трицятнеде ламо. Эскелят-эскелят, муят. Рунговат зыйть юты кеняркстонть. Сезьсак ды — седе курок кургозот. Верушонь пеензэ, [44] ванан, пижелдыть, теке пиже артомкасо ваднинзе.
«Хрып-хрып, хрып-хрып-хрып...» — прок нумолнэть порнетяно ламбамне нетькскетнеде. Тантейть! Мик ламбсть мерить.
Шкась мольсь.
Чивалгома ёнксось, эзинек фатяяк, кода чополгадсь. Пелензэ менеленть вельтизе алга уиця раужосэнь пель. Сон аламонь-аламонь копачизе (шольумок мизолдыця чипаенть. Проксунцерьгадсь.
Чарькодинек, ды ансяк шкань ютазь: пелесь сравтовсь малав менеленть келес ды тандавтни виев пиземесэ.
«Курок, седе курок, Веруш...» — яла эрязкавтнян сазорнэм. Чийтяно видьстэ-видьстэ. Пек а чиеват. Чей, лишмень сэрьсэ пупиця татарник... Икеленек ювкаи, кивчк тейни Эрьмаень сэнь-олашт панарозо. Мезе сонензэ? Ськамонзо. Покшкак монь коряс. Вейксэ тензэ топодсть. Кенерть, варчик, мельганзо.
Чийтяно сильдейтнень юткова прянь-полдань синдезь. Веруш эль кенери. Кирдян эйсэнзэ кедте. Паро куш а аварди. Вить кедьсэнзэ, теке пусмине, аниськат. «Седе курок, Веруш, курок!» — сельведень пачк, эль кургом автневи, капшавтан эйсэнзэ. Сизесь тейтернесь. Лекси, оймезэ а таргсеви. Эль а лайши.
Ёндолось кивчк-кивчк лазнызе менеленть пельксэнь-пелькс. Мельганзо прок кие-бути ацирьгалезь сыргавтынзе таркастост кудодо покш якстере толсо палыця кевтнень. Трах-та-ра-ра, — каятотсь верде тандавтниця зэрть.
Цяпадимим човоньс васень петнявксось. Мельганзо — омбоцесь...
Калмоньчей нарнэнть чиресэ лазонь, чувтонь чарыне лангсо трактористэнь кудыне. Кадовкшностькак эйзэнзэ эскелькст...
Эзинек кенере.
Пиземесь тусь лосьсэ. Таго гувкадсь ёндолось, ды рангстась-онгозевсь пурьгинесь. Кепе кочкарязонок авторясь пиземеденть тикшень кашторксось. Ж-ж-ж... — теке сисем прясо гуй вешксь мельганок.
Начкинек сурень пес.
Поцорсо совинек кудынентень. Ойсинек эйсэнзэ эземнентень. Кукорьгадынек, теке ципакинеть. Верушонь почаня-тусто черьстэнзэ кольги лавтовонзо лангс ведне. Кельмемадонть сорнотано пой лопакс.
Эрьмаень тарказо шанжавонь коцтсо копачазь вальминенть вакссо. Кавонек шкань-шкань кепсетяно вановтонок ушов: кода, [45] мезе тосо, курок лотки ацирьгалемадо менелесь, зярдо прядсы урноманзо? Ютасть, паряк, зярыя минутат, маряви — певтеме.
Энгами течи? Арась?
Овсе маласо, зяроцеде уш, кивчкадсь, мик кашторкс марто, ёндол. Мерят кияк букань пряшка сярдыне кирвазтсь. Сеске мельганзо цярадсть прок ламо-ламо цяк кепсевиця мушкирсэ... — «Бом-бом-бом!»
Пиземесь теке азаргадсь. Эскелькс а неят.
Арси оймамо? Арась?
Менелень-пелень прявтось теке маринзе эсь пачкань энялдоманок. Аламонь-аламонь кудынентень паницянок кармась сэтьменеме. Кода ведрук уставась, истя прядовськак. Меельцеде зярс-бути та-кода сизезь дубордсь, нать, кирданзо кис, лазонь латонть ланга ды, сюкпря Пазонтень, оймась.
Минь вейкенек-вейкенек мельга лисинек «кошинестэнек» ды сыргинек эсенек киява кудов.
Кинть кавто ёнга сэняждсть-цитнесть ведьсельметне. Эйсэст налксесь, шлясь налсонзо чипаесь. Ёрвалдозь вере ёнкстнэстэ седеяк кецнезь мизолдсь менелень келей чама азорось.
Эрямось одс совась эсензэ лувс. Теке эзь тандавтнеяк эйсэнек пурьгине атясь. Оймсесть-тейсть, ды седеяк виевстэ гайгстасть норовжорчтне, пингеде пингень менелень неть баягинетне. Валдоми ойме ёжот келес панжадо сэняжа ёнкстнень лангс ванозь. Зяро мазычи перьканок!
Сазоркань кис седеем китнэсь. Пелинь илязо ормалгадо. Кие соды, кона ёндо велявты кельме ведьсэ экшелямось? Парт учнемс а мезть, оно кода кельмекшнинек.
Авань сёвномадо эзинь арсеяк. Содынь, понги тень.
Зыян, кецнинь, кодамояк эзь лисе. Кияк эйстэнек «экшелямодонть» эзь ормалгадо.
Паряк, певтеме аразьчись, свал чаво пекетне идимизь? Паряк. Ансяк васенце идицякс, васенце ормаменьксэкс тенек ульнесь сестэ ды войнань кувака иетнень перть аниськась.
* * *
Те ульнесь умок.
А ней?
Ней кудотнень икельга, цицинатнень ёжова, ашолды те тикшинесь панжиковонь менеленть ало, ков иля варшта. Икеле [46] Пичепесэ скалонь ды ревень истят стадат ульнесть, новолемстэст а кельгильть куронь кудотнень юткс. Аволь аниськась, пиципалакстнэяк шешкевильть. Теде башка минськак эйсэнзэ пря тринек, пеке пештинек. Кодат аниськат! Чить тол марто а муилик. Секскак пазось кандтнимизь Калмоньчеев.
Те — сестэ. Течи? Течи стуворонть лангсто ашо кшись а валгони. Ансяк вана Пичепесэ кемень скалт ды зяро-бути кирмалав потсо ревинеть кадовсть. Молить сынь панемстэст-самстост мельга-мельцек куринканть куншкава. Саты тенст машинань калгодо киськак. Аламолгадсть, чуролгадсть эрицятне, кудотне, ракшатне. Секс истя раськии, касы эрьва кува, теевсь киненьгак а эрявиксэкс монь вечкема аниськам. Порть куш нильтякадомазот.