Эрязденть арсезь (2010)/Кие калавты эрямонь кирьксэнть?

by Нуянь Видяз

[76]

Кие калавты эрямонь кирьксэнть?

...Уроз эйкакшт. Войнанть эйстэ веленек васололь. Ялатеке «сонзэ эйкакшонзо» пачколесть минек пелевгак. Ламольть истятнэде. А тетя, а ава. Андыця тарадкестэст празь пайстомо лопинеть. Вешкиця толонь вармась пансесь эйсэст масторонь келес. Усксызь, теленть кодаяк ютавтсызь, сы кизэсь — срадыть. Бешоконь та-кодамо ачарькодевикс потмо вий кармавтсь сынст вешнеме нельгезь аваст-тиринест, чачома таркаст, уцяскаст. Андсть эйсэст, якасть мельгаст, ялатеке ламот тукшность. Тердсь эйсэст те виесь. Ансяк кой-конат кадновсть велентень иес-кавтос. Натой школавгак якасть. Теевемс мартост оякс аволь шождынель. Сынь эзть [77] машто кортамо эрзякс, минь паро ладсо — рузокс. Кие, кодамо чопода ойме тейсь те чопода тевенть?

Гена Спицын аламнеде лияталь. Кортась чуросто, валтнэнь путнезь-путнесь. Секс тень ёвтнеманзо чарькодевсть. Удсинек кой-зярдо конторасо кавонек. Мон голландка удало лазсто теезь кониксэнь, сон — пецек-пецек аравтнезь стул лангсо, эли эземсэ. Мекс тензэ вечкевсь тей сакшномась, монь марто вастневематне, а содан. Кортнинек, явнынек чокшнень ярсамопеленек, ламо ёвтнесь эсь нурькине, майсемадо-ризкстэ пешксе эрямодонзо, авадонзо, войнадонть. Талайс кирдевкшнэсь велесэнек. Кармакшнось эрзякс чарькодеме, монгак куш ков «мендердинь» рузокс.

— Гена, тон течи валске сускить мезеяк? — кевкстия цёрабаенть, Течи сон сась аволь чопоньпелев, кода свал. а чикуншка малава.

— Чокшне кадовозь кавто модамартнень сэвинь, — лангозон сэтьместэ ванозь, вайгелень апак кепеде, апак капша мерсь тень цёрынесь. — Вейсэ чокшне ярсынек.

Сон, паряк, иешкадо мондень покш, седе сэрейне. Валдо тюс черь-чама. Прязо наразь нурькинестэ. Аламнеде чувтола. Кортамсто валт а ёмсевти.

— Адя миненек, авам мезеяк муи, сусктано мездеяк, — тердия ялгань.

— Адя, — арсезевезь ёвтызе мелензэ Гена.

Эзинь маняво. Кудосо авам каванимизь модамарень кшиде ды ловсодо.

— Сюкпря, Васют пати, — мерсь Гена ды копордызе кружкастонзо кадовикс ловсонть. Вайгелезэ седе кенярксоволь.

Эскелятано кудотнень икельга янганть мекев, конторав.

— Гена, тон веть таго?.. — кевкстия молемстэ.

— Ага, — аволь сеске ёвтызе те, сонензэ аволь шождыне, нурькине валонть. Генанень кевейкее-кемгавтово петь, цёрыне. Шумбрачизэ вана аволь кеметнеде. «Якси» эсензэ алов. Понкскензэ валске марто сеедьстэ эрсить начкт ды васов маряви эйстэст апаро, судос эциця чинесь. Теде сон визди, пели улемс маласо. Мари эсь прянзо аволь ёнсто, лепштязекс.

— Течи пси, Гена, адя лейчирев. Покш Сельме лейнесь веленек пева чуди. Ванькс-ванькс ведезэ. Тосо лопавтнесыть понкскетькак.

— Ага, — маринь каршо.

— Нейке?

— А-адя нейке...

[78] ...Кизэнь вейке мазый чистэ Гена лепштизе кедем, каизе лавтовонзо трокс котомкинензэ, варштась сельмезэнь ды чатьмонезь лиссь «конторастонть». Лисинь мельганзо. Кузтемпестэ ютась ашназа челькесэ вельтязь кинтень. Кепе, ве панарнэсэ сыргась наразь, ашо пря цёрынесь Дубинька ёнов. Ков, паряк, сонськак эзь сода.

Ульнесь велесэнек ды вана арась. Кода эрямосонть весе: сынек ды тутано. Полавтсамизь лият, сынст...

 

*  *  *

Сельведть, верь, кувсемат, вачодо майсевемат, урозт... Сынсграштась(?) войнась, сонзэ кирвазтицянзо. Ламот ялатеке невтнить верев, менелень сэнынтенть пелев ды сиземань апак сода ледстнить Пазонть лемензэ. Сон, келя, азорось лангсонок, сон весементь теи, мезе мелезэ — сень тенек кучи. Аволь, аволь сон! Идемевсесь калавты эрямонь кирьксэнть. Сон, сон! Каня Пазось пештекшнынзе сестэ, пештинзе, ней, покш войнавтомо каднозь эйкакшонь кудотнень? Кие, кодамо вий ламолгавтынзе сынст? Кие мери эйстэст, тетявтомо-ававтомо пакшатнеде, миллиондо ламо, кие — зярыя миллионт. Кие сынст раштыцяст?.. Таго Пазось? Пазось кадовты Россиясо эриця раськетнень лембе-валдо кудовтомо?