Эрязденть арсезь (2010)/Олячи теть, "букаска!"
[10]
| Олячи теть, «букаска!» |
Перкаень, Перкаень... Зяро ёжонь эждиця ледстнемат кадыде аволь кувать шабракс улеманк перть! Ульниде — арастядо. Талайстэ туицятне умок калмазырьсэть, полавтыцяст човорявсть Амур леенть чирева эрицятнень марто, ды уш кияк эйстэст а ледстни покштятнень покштяст эрямо таркадонть, кияк а соды — сынь ульнесть эрзят, ды одтнэнь санга течис пансеви эрзянь верь.
Тетям аволь «хозяйственноель». Кудонь-кардазонь тевтнеде прянзо пек эзь сэредсте. Сон, неень валсо ёвтазь, седе романтикель. А стяко, кадык эзь тейне, кода маряви, ве фотографияяк, рамсесь фотоаппарат, мельганзо — велосипед, снартнесь кирдеме ашо гулькат. Эзь яво покш мель кудонтень. Паряк, секскак немецень каршо тюреме саемадонзо мейле куроксто лиссь кажо — каладсь каштомпочконок — трубанок. Савсь телень куншкат совамс зярскак Перкаень кадозь кудос. Эринек эйсэнзэ ковшка. Беряндеяк эрсить вадрят. Ломань кудосо пиштема шкастонть, зярс покштям эзизе вачка почконть, эсенексэнть якшамодонть муизь калмост раужо ды тюжа таракантнэ.
Те ульнесь Перкаень кудо стенас понгавтозь «Кровавое воскресенье» картинанть васенцеде неемадонзо мейле зярыя иень ютазь. Эйпаро цёрынелинь. Сисемтнень трокс эскельдякшнынь. Перкаень кедьсэ эрямстонок, покштям кодакшнось тень, мельсэнь ашти, «атякшке» марто карнеть, ды карсекшнынь уш монсь. Сюкпря, покштяй! Тонь кувака, теине сакалот, мизолдыця вановтот ды «чакшокс» наразь чопода тюс череть эзть нардаво превстэнь ламо иетненень.
Перкайтнеде а стувтовиця ледстнемакс кадовсь Миколь [11] цёраст, сонзэ марто налксематне. Весть ютксонок верьгедекшнесь апаро тев. Вана кода те ульнесь.
...Миколь мельспаросо кундси панжий балягас валгониця промот, мекшть. Мон лездыцязо. Понкс зепинесэм суликине, сардынень зярыя чаво коробкат. Миколь пельспанжадо кедьгинесэнзэ вельтясы чиньжарамонь ожо чамас валгиця мекшенть ды стамбарнэ совавтсы эйзэнзэ. Цюр, вейке понгсь! Цюр, омбоце! Полонс понгицятнень марто коробкиненть Миколь пекстасы ды венстьсы кирдемс монень. «Бз-з-з, бр-р-р», — маряви потстонзо. А вечкеви, а вечкеви тенст пекстазь эрямось!
Чипаесь сэнь паксяванзо апак неяво кепететсь весемеде сэрей тарказонзо. Пси. Кизэнь чись жойни баягакс. Мезеяк а редятано. Рожодоминек, тейтяно эсь тевенек. Ютынек васня Перкаень пирева, рединек ды кундсинек медень кандтницятнень, мейле совинек минек пирес. Зепинесэм бизнэсть зярыя «горобиинеть». Кепедия кедьсэм кирдевксэнть вить пилем малас, маряви, кода каштордыть ды бизныть, бажить менеме туворстонть полонс саезетне.
...Чикуншка малава кундынек «букашка» мода мекш. Истя кецнинек!
Сардынень коробкинеде а мезть кортамскак — каня кельги «букашкась»? Секскак Миколь таргась зепстэнзэ седе келей курго суликине ды совавтызе эйзэнзэ раужосэнь «буканть».
— Неят зяроска? Букаска... — мерсь кенярдозь Миколь суликиненть нулынесэ тапардамсто. Мельспародонть сельмензэ цимбельдить. Цёрынентень мезе мартояк эзь ёвтаво «ш» гайтесь, тарказозо лиснесь «с»-ь. «Карска», «сапка», «веснемс», «астемс»... Миколь беряньстэ мари, ды секс «валанясто» а кортави. Берянь, ды мезе теят? Сон ялатеке ульнесь тень «прявтокс» ды тонавтыцякс. Эно кода, кинь пельде таштыть эйкакштне содамочи? Авадост мейле патяст-леляст ды седе покш ялгаст пельде. Миколь кавтошка иеде мондень покш. Секскак...
— Адя, ней ку-кудов, — ёвтызе мелензэ ялгам, ансяк кенерсь потомдамонзо кедьсэнзэ суликиненть, — адя ми-миненек...
Шабранок весе пирест модамарьсэ а путневи. Куншкасонзо умарьпире: зяро-бути умарькст, атямарть, чукшторовт... Чукшторов курынетнень эйстэ вейкенть умарнензэ, зярдо кенерить, — якстереть.
Панжиков. Тундонь прядовома шка. Чувттнэнь алга сравтнезь лугине. Мизолдыть, сельметь а саевить, ожо тештинекс [12] цитнить таташкатне! Панжиков, буй тундонть ды кизэнть ютксо, прянь невтнема шка. Кода а кецнемс?!
«Ку-кудов...» — те умарьпирев. Тесэ Миколень «кудынезэ». Эсензэ ёнксозо-масторозо, эсензэ мелявксонзо. Чувсь коймень кшнинть сэрьсэ латкине. Верьга кошокс путнесь тарадкеть, лангаст ацась пельснаксадозь мелень коське лопат, тикше, меельцекс вельтизе луганарсо. Кудынесь анок! Эряк. Ды Миколь эрясь. Эрясь эсензэ, ансяк эстензэ содавикс беряньстэ мариця эйкакшонь эрямосо. Кудынесэнзэ, прок паро азор, кирдсь эрьмечинзэ: суревтеме шпулькат, банкинеть, менчевезь чеменев эскть, чаво суликинеть... Мацг-кентень мусь паро тарка — рацяня умарькс алов.
Минек ды Перкаень юткова тинге кияванть Миколь марто берть-берть чиинек «кудынезэнзэ». Ялгам пульзясь икелензэ. Мон таргинь зепстэм улим-паром ды венстнинь Микольнень. Ландинь каршонзо монгак.
— Марят? — венстизе тень Миколь вейке коробкиненть. Аравтыя пилем ёжос. Кунсолозевинь.
— Ага, — меринь апак кавтолдо ды максыя мекев.
Миколь апак капша, эрьва ёндо ваннозь-пувсезь, путнинзе «эрьмезензэ» чоподадо пешксе утомнезэнзэ. Меельцекс совавтызе «каштанчинзэ» — раужосэнь «букасканзо». Зяроль цёрыненть чачосо покшкавтнема ды мельспаро! Аламос аштезь, таргась кудынестэнзэ чоподасэнь, чинь каршо кувтолдыця суликань штелькске. «Кинь истямозо ули? — кортасть истямо сюпавчинь азоронть сельмензэ. — Ансяк монь!»
Налксинек-гулдордынек талайс. Миколь, окойники, пекстызе рукшна лопасо «кенкшенть», ды ношкстынек кудов: Миколь эстест, мон, кудонь таркас, — покштянень. Сынь, Ёгань, эрясть Перкаень каршо. Тосоль, редия совамсто ды тунь эзинь абунгадо, явозь кудонь лелям, Вася. Кеняркстонть талнозь, ёвтыя тензэ, кодамо покш промо кундынек Перкаень Миколь марто, ды кодамо покш-мазый кудыне ялгам путсь эсест умарьпиресэ. «Удомояк кельгат», — лиссь, эзимим кевксте, кургстон прянь шнамка. Лелям покш цёра. Сонензэ сисемшка. Цёрынесь наян ды верка, эци эрьва ков ламонь ды киньгак апак кевкстне. А стяко сеедьстэ марсевсь покштянь пельде: «У-у, шишига!»
Вася кортымим теемс нулгодькс тев — саламс Миколень каштанчинзэ, «букаска» мода мекшензэ. Омбоце чинь валскестэнть чийсь сон миненек ансяк невтизе прянзо чись. Удынь кудыкеле.
[13] Эрязасто пувтымим, ды кавонек кепе-штапо, кельме росанть апак маря, чиинек пире юткова янганть Перкаень умарьпирес. Невтия Миколень «дворецэнзэ». Вася капшазь таргсинзе улитнень-паротнень, саизе пондакш мода мекш марто раужосэнь суликиненть, ды ношкстынек мекев. Стакасто лексезь, совинек покшгямезнснь. Мельспаронь кирдезь, паро кайкссэ ваннынек суликанть пачка парсте неявиця полонс саезенть. Бз-з-з! — эчкстэ бизнэсь, машнетесь, яла бажась лисемс туворстонть. Мазый... Теке пондакш овтыне...
Явовинек. Вася мадсь теске, Ёгань кедьс, кудыкелев, мон бырсэ чиезь туинь эстенек, кудов. Матедевинь, ансяк прям путыя прялксонтень.
Зярс удынь, а содан.
Сыргозтимим пиже-ожо вайгельсэ, ильсезь лайшема. Кепедия прям. Мезеяк а чарькодян. Верьга вайгельть лайшезь, совась кудыкелев, кенкшентькак мельганзо кадызе панжадо, Миколь оям. Петерьсэ певерсть сельмстэнзэ сельведтне. Мезе, мезе лиссь? — абунгадынь, ванан лангозонзо.
— Косо, косо «бу-букаскам»?! — сеересь Миколь граж вайгельсэ лайшеманть сезнезь. — Тынь са-алынк Ёга Вася марто! Косо «букаскам»? Косо, косо...
Визькстэнть валгак эзинь ёвтаво. Аволдыя лангстон велькс нуланть, кундыя Миколень кедте, меринь «адя», ды ношкстынек Ёганень. Кудыкельга ютынек каштмолезь — а пувтамс Васянь, стамбарнэ совинек кудос. Суликинесь таркасонзоль — вальма-лангсоль. Автордыя, венстия Микольнень, ды лисинек кургонь автезь удыця Васянь вакска. Удок, удок, злыдарь Васька!
Чипаесь кенерсь уштомо каштомонзо. Матрызе валскень экшенть. Росась пильге серькатнень истя эзь пице. Апак капша ютынек Перкаень умарьпирев. Миколь ландясь ды улинзэ-паронзо марто кортнезь-кольнезь, аравтнинзе таркаваст. Мон аштинь вакссонзо стядо. Ванынь лангозонзо. Саламопельксэнть путызе мекс-бути ве ёнов, кудынентень эзизе совавто.
Прядынзе урядамонь тевензэ, саизе кедезэнзэ вечкевикс суликинензэ ды стясь ваксозон.
— Э-эряви нолдамс «бу-букасканть», — мизолксонь пачк, теке эзь рангаяк, эзь ульнеяк сельведь потсо, мерсь Миколь ды кундась юксеме потомксонь таркас нулыненть суликинестэнть, — ва-вачодо а мезть кирдемс.
«Букаскань», неявсь, виензэ лавшомгадсть. Икелекс эзь [14] бизнэ, эзь правто лисеме туворстонть. Миколь чиремтизе суликиненть. «Букаска» ютась варянть чирес ды, вельть марявиксстэ бизнэзь, кадызе тюрьманзо. Ванынек мельганзо, зярс эзь ёма сельменек икельде. Олячи теть, «букаска»!
Кенярксов мизолксось налксесь аволь ансяк Миколень турвасо, сельмсэнзэяк. Моненьгак пароль. Цёрынесь пульзясь ды таргинзе утомстонзо лия коробкинетнень.
— На, — венстизе тень вейкень, — панжик!
Сеске эзия чарькоде мелензэ.
Састыне-састыне, апак лексе панжия калгодо конёвонь коробкиненть, ды эйстэнзэ, марявсь монень, кецнемадонть моразь, бизык ношкстасть кавто мекшть. Мельган текень жо теизе Миколь. Макссь омбоце кедьгине. Мон таго нолдынь пекстазь колмошка аштицят. Истя исяк кундсезь «пачанок» нолдтнинек мельцек-мельцек вейкень пес.