Эрязденть арсезь (2010)/Сюкпря, Инешкипаз!
[183]
| Сюкпря, Инешкипаз! |
ИЕТНЕ ней монь лиятат. Умок-умок шержейть. Сетнеяк неемга чуролгадсть. Кода пиже пакша пингстэнь, удозь дюм веть а якан. «Лунатик» валонтькак эйзэнь уш а поводьсак. Мезе-бути теке басом эйстэнзэ кадовсь. Арсезеван — теян мезеяк лия эли понган кодамояк лия таркас. Зяроксть кепсевинь шабра кудонь ветеце этажс ды гайневтнинь прок эсень квартирас. Весть тень эль эзть туцкаякшне неть гайневтнематнень кис. Мезеяк а теят, икелень лунатик.
...Ардан театрасто кудов.
Сабунчи — буень куншка тарка. Тесэ ким поладома — озама лия электричкас. Стинь допрок перрононть чирес. Стинь, учан. Эйстэнь авасоло, челькев асфальтонть лангсо, котьмить, пештить тутминест озязт. «Тесэяк сынь, вана истят. Теке, мерят, Орданьбуестэ састь, — тешкстыя эськан. Вановтом ютась эйстэст рельсатнень лангс. — Сынь, сынь ускимизь те васоло масторонтень, сынь совавтымизь од эрямонтень! Сынь?! Аволь монсь?»
Арсезевинь лиядо. Ледсь мелезэнь а умонь чокшнесь.
Ульнесь та-кодамо покшчи. Моргонь содавикс ломантнень кедьсан. Сынст марто сынь Бакув. Стувор экшсан. Икелень ярсамопельть, пенчть-пеельть, рюмка. Инжетне кортнить вейкест-вейкест марто. Ушодсть моро. Мезеяк од, лия арась. Кода свал, кода эрьва покшчистэ: вайгельть, морот, кортамот... Апак учо панжовсь каршон ашосо артозь кенкшесь, ды совась тейтерь. Совась, ды, марявсь, валдо нупалесь седеяк валдомгадсь. Прок од килейне, стёжна, виде рунго, валдо чачо. Сельмензэ покшт, [184] сэнть, мерят совась потмозост менелень весе сэняжась. Сельме понанзо кувакат. Совицянть лангсо чова-чова коцтонь нурька ожа валдо-сэнь платия. Карксазь човине раужо каркскесэ.
Талакадынь. Пачкан ютась лембе ялтке. Каня эрсить истят мазый тейтерть? Кие истямось? Косто валгсь?
«Здравствуйте!» — гайгезевсь валаня ванькс вайгелезэ.
Цивтёрк тейсть лов ашо вейкеть пеензэ. Ёвтызе валонть, вырк мурдась ды совась, цянк-цянк кочкарясонзо чавозь, шабра нупалентень.
Ёмась.
Кадовсь превзэнь. Совась седеезэнь.
Салавине, теке теян кодамояк берянь тев ды кундасамизь кедте, варштнян ашо «килейненть» кекшиця кенкшенть ёнов. «Листь, листь! Невтик мазычить! — энялдан эсь пачкан. — Макст варштамс, куш варштамс лавтовот ланга парсеекс лымбиця олгонь тюс череть лангс, чопавтемс лип шкас сэнь, домка вановтозот...»
Шказо ве таркасо эзь аште. Кортамотне кортавсть, моротне моравсть. Инжетне стясть симемкадо-каванямкадо пешксе стуворонть экшстэ. Сыненст, келя, кецнекшнить кавксть: самстост ды туемстэст. Мон яла шка таргсян, яла учан — лиси нупальнесэнзэ «чипайнесь». Таргсек-иля, сави моненьгак стямс. Нузякссто видемтия рунгом ды меельцекс лисинь стуворонть экшстэ. Явовомсто, тарчкс вакссо аштезь, ёвтынь сюкпря Катя патянень, Моргонь авантень, ды эзинь кирдеве, кевкстия:
— Катя пати, те тонь истя ёнот молиця тейтересь?
— Монь нильксэсь. Видестэ редик, — мельспародонть мизолдозь, мерсь авась.
«Вайгелесткак вейкеть», — тешкстыя эсь пачкан ды таго кевкстинь:
— Мекс уш юткозонокак эзь оза?
— Шказо тунь арась. Ванды экзамен... Тон мезеяк эзить стувто? — мелявтозь ледстизе ильтицям.
— Ды арась, маряви... Кода лемезэ экзаменэнь максыцянть? — набойгадынь, ёвтыя кельпрясон тарныця кевкстеманть.
— Тоня, — капшазь мерсь азоравась.
— Тоня... Паро лемесь, пек паро, — арсезевезь ёвтынь валтнэнь ды панжия кенкшенть. — Весемень кис тенк тагояк сюкпря. Вастомазонок, Катя пати!
[185] ...Мезеяк а неян, а марян. Сельмень икеле Тонянь мизолксозо, стёжна, теке метьказонь, менчевиця рунгозо, сэнь сельмензэ. Молян, молян тенст неть читнестэ! Кода истят мазыйть нолдтни Пазось? Паряк, течике ким тов таргаса? А? Куш сельме понань пачк варштан лангозонзо, несынь роза балягань бельгинекс панжовиця турванзо. Ужока, цёра, тон аволь азмонгадомо кармить? Молят — Тоня, мадят — Тоня, валске сыргозят — таго Тоня... Варштак перькат! Каня кияк сонзэ а полавтсы? Арась, иля арсеяк, сонзэ кондямо мода-масторонть лангсто а муят. Иля корта стяконь валт. Азмонгадыть...
— Задавит, задавит!
— Отойди, уйди!
— Что делаешь?!
— Сам того хочет!
Васня «Уйди, уйди!!!» марявикс вайгельтне, шалтось, мельгаст поездэнть весе виень «ду-ду»-зо сезизь менельга ливтнеман. Эскелькс удалов, ды поездэсь стакасто лексиця раужо стенакс выж ютась судом икельга.
* * *
Содамс, кодамокс кармавольть эрзянь тевтнень ёжост, аволинь потаяк сестэ эскельксэнь туро ды понговлиньгак поездэнть алов? Чачовольть-арась «Масторава» вейсэндявксось, эрзянь келень идема фондось, «Эрзянь Мастор» газетась? Пелян, авольть, пелян, мон кеменьшкатнеде вейкесь, кона лекси эрзякс, лекси ды, эрзякс лексезь, кулыяк. Истят мельтькак содавтнесамизь: Инешкипазось, паряк, идимимгак сестэ поездэнть эйстэ, ванстымимгак шкадо икеле куломадон ансяк тень кисэ.