Эрязденть арсезь (2010)/Теде Марфа патям эзь сода...
[82]
| Теде Марфа патям эзь сода... |
Сёксень ушодкс.
Ушосонть кизэнь лембе.
Чувттнэ зярс оршазь пижесэ. Модамарень пиретне урядазь. Пиженть полавтызе раужо тюс — модась. Юв-яв ливтнить вельксканзо, вешнить ярсамопель нузякс раужо варакат.
Марфа сырепатянь модамарень умаст песэ, Кирданав лейненть кавто ёнга гувны «недявкс»: Пичепень кеветее-кемсисемге иень алятне «верь валыть», тюрить Понкспенсетнень марто. Кие эйстэст, кона песь седе виев? Лейненть кавто ёнганзо, каль куракштнень велькска, цянавокс ливтнить мекев-васов мода покольть, кевнеть, кадовозь модамарнеть... «Минектне», кода «ятон-сетнеяк», бажить ёртомс «гранатаст» седе васов, понгомс арсезь таркантень. Вант, прякасмот иляк аравто! «Маштовомс» а «маштоват», сэнь тарка эли таргозевкс киськезэть кадови.
Пичепень ушмодеенек — Оверень Дёдя — сырепатянь покш цёразо. Од цёрась, кемсисемде ламо тензэ, машты «леднеме» ды кода прявт кармавтомо. Ушманонзо — седе од ялганзо. Миньгак, сисем-кавксо иесэ «пижекайтне», эсь превсэнек арсетяно: ушмантано. Ёртнетяно, «ура» валонтькак мик содасынек. Кадык «р»-сь аволь весенень ёвтави, сеерить «у-я-я», ялатеке миньгак вий. Вант, «ят», тапатадызь!
* * *
Эзь сода Дёдя. явозь кудонь лелям, тюри налксемань тюремасо меельцеде. Арсесь, войнась курок прядови, тетязо велявты кудов.
Арсесь...
Омбоце иень телестэнть саизь тов, косо тетязоль, косо кодаткак «войнасо» налксемат арасельть, косо порсь пеензэ аволь налксемансесь.
Шкань ютазь Марфа патянь лемс, ве чистэ, почтань кандтницясь кандсь кавто раужо кулят — «калмонькайть». Эйсэст сёрмадозель: «Ваш погиб за Родину, за Сталина смертью героя...»
Кие те Сталинэсь? Мекс сонзэ кисэ пряяк максома?
Косо, косо те самай Родинась? Кодамо? Тюсозо, куш ёвтавлизь, кодамо.
Кемгавксово иесэ Оверень Дёдя ды тетязо, Оверь Петя, теде эзть сода.
[83] Эзь сода Марфа патямгак. Совавтызь сынст превс, ды сынь кемсть: Сталин — те сонсь Пазось, Родинась — те... Валось лиссь Сталинэнь кургсто, лиси сонгак, казеви эрьванень Пазонть пельде.
А Марфа патям, а мирдезэ, а Дёдя цёразо эзть сода: мода-масторсонть эри маятникень кой. Тей каяви — тов, тей — тов... Зярдо-бути, Чингизтнэнь-Батыйтнень шкасто, маятникесь бамкадсь Япониясто-Китайстэ саезь Германия видьс. Теде мейле маятникесь-налось эскельдясь ве морясто саезь омбоце морянть, Япониянть видьс. Те эскелькстэнть кармасть мереме Россия. Ней, маряви, чилисемась люкштяди стамбарнэ мадеманзо пелев.
Эрьва люкштядеманть питнезэ ламодояк ламо маштозь, саезь ойметь, верень эрькеть.
Теде Марфа патям эзь сода.