Эрязденть арсезь (2010)/Телень ильтема чи
[109]
| Телень ильтема чи |
Покштянок ды покштянок покштяст пингестэ пингес, аволь ве тёжа иень перть сюлмавозельть виртнень-паксятнень ды лейтнень-эрькетнень марто. Эрьва сынст лекстявксост тешкстнесть покшчисэ эли кодамояк койсэ-иласо, паро валсо. Телень ильтема чи, Эрьбань чи, Инечи, Тундонь ильтема чи, Норовжорчонь чи, Тавунся... Зяро оймеёжосто лисиця лембе, зяро элякалиця кеняркст, кодашка смусть ульнесь сынст эйсэ!
Кодат сумборят ютазь пингень ниленьгеменце иетне эзть ульне, кодат вармат-даволт эзть пувсе, чипаесь эзинзе стувтне лембень учицянзо. Кецневтсь валдо вановтсонзо. Мезе лангскак апак вано, весе покшчитнень покштянок бажасть тешкстамс. Сынь, васняяк эйкакштненень, ульнесть бурядо мейле чипаень мизолксокс.
[110] Телень ильтема чистэнть, Киряксчистэ, авам паниль «пештть». Покшолмаст грекень пештешкат. Танстест — те уш кинь кодат почтонь, оень-алонь таштавксонзо. Чапаксонть тейнесть ловсос, кайсесть эйзэнзэ велькс ды куш аламошка верек ой. Войнань иетнестэ, содави-чарькодеви, ламонь сынь арасельть, секскак тантейдеяк тантейкс марявильть розень почтсто ведьс панезтнеяк. Сыргат валске марто школав — тонгат зепезэть зярыя: максомс варчамс ялгатненень, аламнеде пря шнамс.
— Монь весемеде тантейть! — сергеди васенцекс классонь келес Захар Лиза.
— Монь, монь седе тантейть! — сеске поладсы тейтернстнеде Сергей Аню, эци икелев, невтни.
— Эрьга варчаса... — удалце партанть экшстэ маряви Пошань Юрикень вайгелезэ.
— Варчик, варчик, келеть нильсак! — классонь келес ранги, венсти эсь «пештензэ» Оверь Миколь.
...Телень ильтеметь пандопря. Истямокс лововсь Понкспе ды Покшпе ютксо велень лавканть каршо таркась. Тесэ цёратне невтнесть виест, набойчист, кинь седе стакат ды калгодот мокшнанзо. Вийсэ-ливчанячисэ пелькстницятне пачколесть всрьскак. Теде башка Пичепесь стякшнось Алопенть каршо, Понкспссь — Покшкуронть. Кие кинь изни. «Пивсэсть» вейкест-вейкест виень апак вансто. Недявицятнень пси лексемадост сув кепсевсь, теке банянь уштомсто качамо. Порксазь судоткак эрсесть. А вана кежть-покордавомат — зярдояк. Кой. Ванькс оймельть се шкань ломантне. Те ней чирьстэ ёвтазь валонть кис сельгенетядызь прясто пильгс, ойметь, вант ды вант, таргасызь.
Войнань шкасто пандопрясо «мокшнасо налксемат» арасельть. Цёратне тюрсть лия тюремасо ды Орданьбуеде васоло лия таркасо. Тосо, косо ломанесь мезеяк эзь аште. Косо азорокс ульнесть кежтне. Илась велесэнек ялатеке кирдевсь. Ве куринкань цёрынетне, теке атякшкеть, кайсевсть, пансесть лия куринкансетнень. Мекс-бути Алопенсетнеде ламольть, Пичепенсетнеде виевельть. «Урась!» ялатеке кайсететсь кавто ёндо.
Тюремань иладонть башка, эрсесть пандопрянь морсемат.
Пень одирьватне пурнавить ве таркас, тейтертне — лиятас. Лангсост кувака платият: кинь пиже, кинь якстере, кинь сэнь, ожо... Ланга, пукшо видьга, чопода тюсонь лембе манаркат. Пильгсэст кемть. Понань. Эйсэст, седеяк понань носка марто, [111] пильгеть зярдояк а кельмить. Тундось чинь-кавтонь ютазь сы, те ансяк ковкерьксэнь коряс. Зярс — сыре, ловов, ацирьгалиця ды якшамосо пешксе теле.
Морыцятне стить кирьксс. Карадо-каршо. Вайгельтне пурнавост ве таркас ды марявост васов. Кунсоломскак морамсто вейке-вейкень седе ён.
— Ну, кие ушодыцясь? — пеедькшнезь, прясонзо та-кода эсензэ ладсо чиртнезь пшкадсь весенень Дораень Матя.
— Мезть кевкстнят? Каня а содат, кинь вайгелезэ Пичепесэ — вайгель. Ушодт, Элина! — каясь трокс вал вакссонзо аштицясь — Кажань Олдай.
— Мон? — виздезь мерсь Элина.
— Эно кие, ушодт... — кармавтсь Олдай.
Элина нардтнинзе турванзо, витизе прясонзо лембе пацянть ды верьга вайгельть серьгедизе кезэрень пингень весеменень содавикс нусманя-нусманя моронть:
Вай, исень саевть одирьвась Ды, вай, улконь максовт тейтересь.
Морыть аватне мелень путозь, вайгелест ванькст ды гайгицят, човат-эчкеть, алцеть-верцеть. Велесь моротнеде жойни. Морыть зярыя таркава тесэ, Алопесэ, Понкспесэ... Кунсолыть ловсо вельтязь кудотне, икельгаст кальтне, латотне, менелесь. А марявить, кунсолыть атякштнеяк.
Поланзо ды марто а корты,
Вастанзо марто а яки...
...Тетянь-авань од пингестэст — покштянь шкатнеде кортамскак а мезть — те чистэнть ю иьдтнильть лишметь ды ардневтнилыъ тейтертнень-одирьватнень, пакшатнень велень кувалт. Чирькетнень ало дильнесть баягинеть, чольдердсть горниповт. Тейнесть пелькстамот: кинь лишмезэ сехте эряза, варманеньгак а сасави. Велесэнек сеть шкатнестэ кудотнеде, паряк, колмо сядодо ламольть. Малав эрьвасонть лишме. Зяро ардтницятнедельть? А?
Эйкакшпингстэнь лишметнень азорост ульнесь уш колхоз. Секскак истят ардтнематнеде арсематкак арасельть. Сень кис Кирданов лейненть чирева седе ватола пандочаматне жойнесть [112] эйкакшонь гайгиця вайгельсэ. Кирякстнесть кие мейсэ маштсь ды мезезэ ульнесь. Эйгакайть, салазкеть, сокст, натой нурдсояк седе покштне ардтнесть. Эйкакшонь кенярксов вайгельде пешксе те кирякстнемась, телень ильтема чись, таргавиль чоподас.
Сат кудов карксамга начко. Амольдят, ансяк кенерят совамо, потолокс уське вельде понгавтозь ведрастонть кельме ведь кечине, гилк-гилк симсак ды — каштлангов, лембе кирьпецтнень ёжос. Вадря!
* * *
Ней?
Ней ниле стенат ды, тагояк ледстяса, телевизор марто компьютер. Сынь нардызь Телень ильтема чинть, сынь кандызь музейс сокстнэнь-салазкетнень ды эйкакшонь чольдердиця-бийниця вайгельтнень.
Ней?
Вана истямо куля. Саезь газетасто... Россиясо уроз эйкакшонь кудотнестэ лисицятнень эйстэ 40% аштить тюрьмасо, 40% — инвалидт, 10% — бажить повамс пряст. Истя ульнесь 2009-це иестэ.