Эрязденть арсезь (2010)/Чанстень тешкс
[144]
| Чанстень тешкс |
ВОЙНАНТЬ пекезэ пешкедсь. Ниле иеть эрявсть тенень. Эрямось, кадык чикордозь, лисиця тикшекс анеявиксстэ ушодсь шаштомо ломанькс эрямонть ёнов. Школасо панжсть библиотека. Книгатнеде пурнавсть покш шкап. Ловнок! Иля яксе, кода войнань шкасто ды седе мейлеяк, велеванть, теке пурнакай, книгань вешнезь. Вельмесь киштемань-морамонь олимпиадань ютавтнема коеськак.
Даволковонь прядовомсто Дубинькасо ушодови школатнень ютксо пелькстамось — кие седе сюпав талантсо. Анокстамось моли лушсо. Клавдия Васильевна, пионерэнь прявтонок, пурнакшны эйсэнек малав эрьва чистэ. Лекстямс шка а максы, лепшти «пирамидатнень» лангс. Те — физкультурань номер. Сонзэ «чапомо» сценанть удалдо листяно, содан, мельцек-мельцек кавто ёндо. Листяно маршонь моразь:
Чтобы тело и душа
Были молоды, были молоды,
Ты не бойся ни жары и ни холода,
Закаляйся, как сталь!..
Мейле, кедте кедьс кундсезь, вейке-вейкень кепсезь, кутьмере, лавтов лангс кузнезь, тейтяно пирамида ёнов молиця [145] фигурат. Теемат куроксто, апак эвте, мазыйстэ, кармавтомань коряс. Ваныцятнень мельс туезэ.
Моратано, кода кортыть, коськстэ, кодаткак баянт-гармошкат школасо арасть.
— Тонеть, теде башка, пионер, лия тев, — мерсь тень весть репетициядо мейле Клавдия Васильевна, валдо черь-чама, ноцковтозь судыне тейтересь. — Кадовт аламнес.
— Кодамо? — сельмезэнзэ ванозь, кевкстия апак визде.
— Олимпиадасо невтема аволь ансяк морот-пирамидат, невтема рисовамонь дошузчинекак. Тонеть рисовавить покш конёвс войнань шкань кавто-колмо ордент?
— Рисовавить, — апак кавтолдо, мик аламнеде прянь шназь, наянсто видькстынь пионерэнь ветиентень.
Совинек нупальнес. Тесэ книгат, масторкоцт, барабант-мезть.
— Вана теть конёв, ламо тюсонь карандашт, книга. Эйсэнзэ невтезь ордентнэ. Кавто-колмо чис тееви тевесь? — кевкстимим Клавдия Ивановна ёвтазтнень максомсто монень.
— Тееви! — кемевтия тонавтыцям.
Саинь кедьстэнзэ конёвтнень-мезтнень ды лисинь нупальнестэнть.
...Якстере карандашонть а ванстан. Мелень путозь ёзан эйсэнзэ ватманонть. Лисезэ седе парсте. Вечкевикс тевенть теемстэ шкась а марявияк. Ёвтазь чинтень «орденэнь» — Ине Отечественной войнань ды Якстере тештень — кувтолдсть Инечинь алокс.
— Шумбрачи, Клавдия Ивановна! Вана, анокт, — меринь, ансяк сынь школав ды совинь нупальнентень, конёв тапарксонть панжомсто.
Олимпиадантень анокстыцясь сялгинзе ашо сельмечирьке сельмензэ кедьчелькезэнь. Ваны. Турванзо аламнеде явовсть, кургозо панжовсь. Лопанть истя велявтсы, истя путсы.
— Ды тон минек алкуксонь артыця, Художник! — окойники менсть кургстонзо валтнэ, сезизе каштмолезь ванноманзо. — Кеман, васень таркась коморсот.
Артыця-аволь, кие илязан уле, рисовинь, артынь карандашсо, седьсэ-уголиясо, ваднинь порсо, седе тов понгсть кедезэнь акварельть. Седеяк сыремтезь мелем улемс артыцякс Левитан ды Пукирев марто «вастовоматне». Васенценть «Над вечным покоем» картиназо, конань репродукциянзо [146] неекшныя открыткасто, совась эйзэнь ды кадсь седейзэнь а нардтневиця ризксэнь тешкст. Кодат нусманя ёжот ансяк а совить потмозот эйсэнзэ алга-алга уиця чоподасэнь, та-ков чииця пельтнень лангс ванозь. Кадозь-стувтозь, кавто ёнга лейсэ пирязь калмолангине. вармадонть майсевиця, нучк менчевиця килейть... Ванат, ванат... А фатяткак, кода сельметь начкить.
Вановтом педсесь эсенек велесэ «асодавикс авторонь» рисункатнескак. Вейкень эйстэст невтекшнизе тень эсест кедьсэ Долгов Але. ...Стулонь копорьёнкс. Ланганзо каязь чахмат-чахмат покш шаль. Чиреванзо нурьгить цёкинеть... Неяви эрьва мендявкскесь, эрьва сормсевкскесь, эрьва суринесь. А кемеви! Каня весемесь те истя невтеви карандаш вельде?! Ванан, ванан абунгадозь. Маряви, венстьсынь, а кирдевить кедень, сайса ды каяса лавтовон ланга те лембе, покш, понань сурестэ кодазь шаленть.
Омбоце рисунканть казицязо Филянь Петя... Ушман. Лангсонзо гимнастёрка, прясонзо пилотка, конязонзо педявтозь якстере тештине. Якстереармеец. Вакссонзо, модань чувовкссо, — пушка. Снарядонь ящик лангсо озадо аштезь, цёрась сёрмады сёрмине. Маряви, аванстэнь. Паряк, вечкема тейтерензэ туртов? Ванан, сельмень а саевить — истя парсте, истя маштозь, истя видестэ ды зярыя тюссо рисовазь.
* * *
Лисевель-арась эйстэнь артыця? Паряк, лисевельгак. Пазось максокшнось, а кавтолдан, тень ёрокчи неемс сень ды неемс истя, кода эзть нее ялган ютксто ламотне. Неемс седеень пачк нолдазь. Лиссь вана лиякс, эрямонь янось саимим лия ёнов.