Эрязденть арсезь (2010)/Эрьва шканть казнензэ эсензэ
[93]
| Эрьва шканть казнензэ эсензэ |
_ТОКОНОК прядовсть.
— Ней, эйкакшт, эрявить айгшемс партатнень, — мерсь тенек Анна Яковлевна стуворонзо экшстэ стямсто. — Аравтнемс стенатнень ёжова.
Калдор-калдор стякшнынек таркастонок ды мелень путозь кундынек мерезенть топавтомо. Чожолк-чожолк шаштнинек таркаваст партатнень. Топавтынектетевенть куроксто.
— Течис, эйкакшт, весе! — яволявтсь тонавтыцянок ды нолдымизь кудов.
Омбоце чистэнть классонок эзь содаво. Куншкасонзо одирьвакс аштесь Од иень пичине. Эзганзо понгавтнезь якстерькай ведьсэ артозь, ташто газетасто керсезь-педявтнезь рисьминеть, тештть, чопода-тюжа пичалт. Кува-кува пиже салмукстнэнь ланга ловонь таркас ашолдыть ватань пакшкеть. Од иень мазыйненть тёкшкесэ якстерестэ кувтолды вете ужосо теште. Потолоконть алга-ёжова ушкс-трокс понгавтнезь фл ажоконь керькст.
Анна Яковлевна кундсевтимизь кедте кедьс. Серьгедизе «В лесу родинась ёлочка» моронть. Моры, мерть, ськамонзо. Минь валтнэнь вадрясто а содасынек. Косто, аволь минек, рузонь... Секскак чаратано сонзэ «Од иензэ» перька моткодезь.
Ютынек чувтыненть перька зярыя кирькст. Морось мерсь општ. Пурнавинек курынес ды мерсть стямс вейкень-вейкень ёжос. Кие-бути ёролдозь пичиненть ваксс путсь «керязь» эземне. Кузсь лангозонзо Шабай Миша. Понксонзо ланга нолдазь ашо панарнэ. Карксазь цёко марто раужо тюс понань карькскесэ.
Шапказо човоньсэ, |
Секе тев Чипайнень Сельмсэнзэ кончтни... — [94] гайги классонть келес цёрыненть пшти ванькс вайгелезэ.
Прядовсть моротне-чарамотне, стихтне-мезтне. Тонавтыцянок та-ков лиссь ды куроксто мурдась мекев. Кедьсэнзэ кирдсь якстере коцтонь кескав.
— Якшаматясь тенек эзь саво, — пейдезь яволявтсь классонь прявтонок, сонсензэ сельмензэ налксезь налксить, — сень кис кучсь тенек Од иень казнеть! Стядоя, пакшат, стядоя пиже пичиненть малас.
Стинек кода эрявсь. Пецек-пецек. Цёрынеть ды тейтернеть. Икельганок шаштнезь, Анна Яковлевна домка кескавстонзо эрьванень таргась газета панкс потс тапардазь казне. А уш чинесь, чинесь эйстэнзэ кодамо тантей! Эцезь эци судоварятнес. Истямо содавикс, истямо вечкевикс! Эзинь кирдеве, салавине штавтыя ве таркинева конёвонть. Потсонзоль... кши печть! Алкуксонь. Войнадо икеле тетям важодсь агрономокс МТС-сэ ды тукшныль истямонть мартонзо тосто. Аволь лопа почтонь эли пешкс пупоркань. Розень. Чинедензэ пешкедят.
Мольтяно кудов. Ёжом паро. А маряви якшамоськак. Кирданов лейненть трокс сэдьганть ютамсто эзинь цидярдо. «Кодамо сон, розень кшись, варштамс куш», — арсезевинь ды нерьгстыя кедем юдминезэнь. Тосо, книган-мезень ютксо, кирдевсь Якшаматянь казнесь. Таргия. Панжия конёв тапаркскенть ды мик лотказевинь, сельмень апак кончта ванынь кши печтенть лангс. Скирдынь паморькске. Каия кургозон. Тантей! «Саты, аванень кадса!» — кардыя эсь прям. Путыя Од иень кенярксом тарказонзо ды эрязкалезь туинь ялгатнень сасамо.
* * *
Ней, ёвтындерят истямо казнеде, ракатадызь. Ловсызь анекдотонь кондямокс. «Ормалгадсь ломанесь, — ламот мерить эсь пачкаст — допрок сравтневсть пайстомонть превензэ». Неень шкава казнить машинат, самолётт, квартират, кудот, ламо ярмакт, мик усият... Кить? Те уш лия кортамось.
Те — ней. Сестэ вана кши печтесь неень пномаркатнедеяк питнеель. Секскак столь лангс кадовикс кши паморькстнэнь ведрас а ёртним, свал кайсесынь кургозон. Нейгак, пейтеме-чертеме шкастон. Тонадынь. Мезеяк а теят, ковгак а туят: эрьва шканть, пингенть эсензэ чачозо, эсензэ коензэ, эсензэ казнензэ.