Эрязденть арсезь (2010)/Эх, тетинем-тиринем!..
[59]
| Эх, тетинем-тиринем!.. |
ТАРАБАЙКА... Кой-кить мерить таратайка. Неень од ломантне, кеман, а содасызьгак мезе те истямось, а содасызь те валонтькак... Кода видестэ ёвтави-сёрмадови — пазось соды. Тевесь, мерема, аволь лемсэнть. Кода иляк лемде, кадови кавто чаросо крандазнэкс. Усксеви ломанень вийсэ. Ажиятнень юткс кильдеви седе нардевесь, шуморксовось. Кавто ёнганзо — пикс вельде ускицятне.
...Саинек авань марто тарабайканок ды сыргинек Петровка руз веленть трокс ютыця кияванть вирев. Тикшес.
Кальдерь-кальдерь ютынек колмошка вайгельпетнень. Сасынек-ютынек Петровканть. Вана виреськак.
Кува леднезь, кува тарвазкесэ нуезь, ноцорязь, пурнатано тикше. Те аволь лугасо-косо. Сави сюконякшномс эрьва куракшкентень. Ваннома, вешнема. Мон кандтнян анокстазенть штеминес тарабайканть ваксс.
Котьминек ават-цёрат талайс. Псилгадомазонок. Окойники пурнынек зяро ускови. Вачкинек улавонок. Ней мезе? Сюлмасынек, илязт певере, пикскесэ ды — кудов. Чизэяк уш эскельдясь менель тёкшкенть трокс.
— Это что такое?! — апак учо зэрнезевсь удалонок цёрань граж вайгель. Куракштнень экшстэ култык-култык лиссь эйзэнек вирьваныесь. — Своим не хватает, атут ещё мордва!
Авам... Мезе авам? Таймазкадсь. Сельведензэ тусть.
— Сваливай сейчас же! Иначе... — рангстась нурька пильгесь, перьканок чаразь.
— Кадык, иляк сявордовто, вете урозт кирьгасон, — энялдозевсь авам, вановтсонзо мельганзо яказь. — Тоньгак, паряк, дети есть.
— Не слышал я ещё ваши каля-маля. Сваливай, сказал! — мерсь тона ды кежень сазь кундызе тарабайканть петькельде, велявтызе митялкат. — Убирайтесь, сказал! Чтобыдуху не было!
Кувать ёзынь мокшнынесэнь начко сельмень, ансяк мезеяк а теят. Чатьмонезь путынек крандазкенек чаро лангс, пурнынек [60] кедьёнксонок ды сыргинек кальдерь-кальдерь теке кияванть, кода кортыть, чавонь кедть кудов.
— Паро, куш пелюманок-тарвазонок эзинзе нельге, — мерсь авам зярыя шкань ютазь, — кедстеме кадовлинек. Инешкипазось лездась...
— Мезе виде — виде, — прынь авань марто вемельс. — Пиксэнтькак эзизе сае. Эзизе керсеяк.
— Улевельгак тетят... — ушодсь тирякам ды мекс-бути чатьмонезевсь.
Авам ажиятнень ютксо. Мон вакссонзо. Лавтовом трокс пикске. Лездан ускомс чаво тарабайканть. Кодаяк а оймаван, потсон яла лаки покорксось.
* * *
Сельмс сельгенемат, покордамот... Сельведть... Кие чумось? Чумондомс лиятнень, чумондомс свал а пек виде. Варштнема эсеть лангскак.
А содылинь — те эрямосонть ломантнень ды пачатнень-ракшатнень ютксо ламот койтне вейкеть: ансяк нолдасак прят, невтьсак лавшочить, шешктядызь, «вай» а кенерят серьгедеме. Стявлинекак сестэ авань марто, кадык эйкакшоль шьгак, нурька шьтьге цёранть каршо, секень вант, потаволь. Минек, ансяк каятотсь корсяня вайгелезэ, соракадсть канжамонок, тусть сельведенек. Кис сыненст ке___? Кие сьгаст лангс ваны? Набойчи, ила аштемс, аштемс ды тагояк аштемс эсеть кис арасель авасон, арась сон монь эйсэяк. Мезеяк а теят. кие кодамо, кинь кодамокс Пазось теизе. Секскак чумондомс, сялдомс вейкень пес кинь-бути — а виде. Ламось-мезесь ашти эсеть эйстэ, эсеть обуцядо.