I
Вашкала вунонтэм даурез
Нырысяз кылбурам пыртӥсько.
Данлыко удмуртэз, Юберез,
Азяды, эшъёсы, поттӥсько.
Со тӧро, со визьмо, со майбыр,
Чупчи шур котырын со батыр.
Тодамы
Ваёмы
Ужъёссэ.
Кык арен кык сю пол лыдъяса,
Со вылэ кызь сизьым ватсаса,
Берлань чигналэ каль[1] улэмлэсь.
Соку тӥ верано муртэлэсь
Шедьтоды
Улон дыр
Вадессэ[2].
II
Чупчи шур ёросысь удмуртъёс
Юберез тӧрое бырйизы.
Ватка пал ушкуй ӟуч калыкъёс[3]
Кусыпсэс соин ӟеч возизы.
Вошъяло чечыез
Буртчинэн,
Кыр пӧйшур куосыз
Анданэн.
Огесэп тазь умой вал улон.
Тӧролэн кылъёсыз визьмоесь.
Дондӥен Покчиен — пичиесь,
Тӧроос — Юберен кенешо,
Батырлэсь косэмзэ быдэсто,
Трос визь-нод асьсэлы басьтыло.
III
Юберлэн нылъёсыз-пиосыз
Корка пуш тырмымон люкасько.
Ачиз кадь ик таза кышноез
Возь вылысь италмас кадь улэ.
Пиослэн будэмзы
Батырлэсь лӧпкытэ
Мылкыдзэ.
Бадӟымез,
Дэлет-Бур, эктытэ
Сюлэмзэ.
Визьмыныз,
Кужмыныз
Будэмъяз бубизлэсь азьпалскоз.
Нош Бисар
Туж етӥз нюлэскась —
Гондырлэн пумитаз
Со кӧбертэк султоз.
IV
Тури-Кук кадь шудо мушкасез
Дасо дас ар утчад ке, шедьтод
Оло уд.
Та сяна но вань на
Юберлэн куинь кузя пиосыз —
Ортчытэсь
Огезлэсь
Мукетыз.
Вералом на пичи Пужеез,
Таизлы
Мырдэм вить ар тырме.
Ньыль пыдо пужейлэсь но чырткем
Бызьылэ.
Пазьырес вал вылын туж шӧртчи
Ворттылэ.
V
«Нылъёслэн туж пичи пайдазы», —
Шуылоз вал Юбер.
Саля-Шуд нимтуло нылызлэсь
Кызьы-мар будэмзэ чаклатэк,
Сое со ас эрказ возьылӥз.
Саля-Шуд — лек пӧськы кадь керӟег,
Тушо кеч кадь луиз ваменэс, —
Нокинлэсь верамзэ кылзытэк
Сэрпалтоз киужзэ беренэс.
Арлыдын быдэсмем нылмуртлы
Туж ӝоген синмаськись но кемдэ.
Мултэс кыл вератэк,
Курасьлы
Дондӥлы
Батыр ныл ки сётэ.
Озь кылдӥз Юберлы эмеспи.
VI
Кыдёкын
Москваын,
Кар пушказ,
Зарниен буёлам ӝӧк сьӧраз
Ӟуч тӧро, Янсар князь[4],
Винаен тырмытэм сюмыксэ,
Йыр вадьсаз ӝутыса,
Калыклы возьматэ:
«Тазь шулдыр улэмды ке потэ,
Музъемез кун улам
Быдэсак
Пыртыны туртсконо.
Котырак
Трос пӧртэм калыкъёс улыло,
Та дырозь асьмелы люкето».
VII
— Зэм верад тон, Янсар! —
Вераны потыса,
Кучыран[5] пуртэссэ сэзъялтэ.
— Чупчи шур ёросысь удмуртъёс
Музъемдэ лёгаса саптало.
Москвалэсь зӥбетсэ шӧмъятэк
Улыны йыринто на соос.
Инмарлы
Вӧсяськон
Сямъёсмес
Сереме уськыто.
Кристослэсь кироссэ
Шуръёсы куяло.
Ясаксэс октыны
Ыстылэм муртъёсмес
Жугыса келяло…
VIII
«Кин?!. Соос-а оло дӥсьтыло
Мынэсьтым калыкме исаны?»
Ӝуало Янсарлэн синъёсыз,
Со урдэ кӧй куаем мыжыксэ.
«Янсарлы пумитась
Музъемлэн бам вылаз улэмзэ
Каргалоз.
Уд тӧро нош мыным
Йыбырттоз.
Йыр вылаз султыса,
Пыд улам лёгыса,
Мон нелько мытӥсез!»
IX
Ӟукырто Янсарлэн пиньёсыз.
«Эй тӥ!..
Коралэ,
Ыбылэ,
Жуге удэз!
Выжылы тӥ эн кельтэ кидыс!
Кристослэсь нимзэ ӝутэ вылэ!»
Веранзэ со быдтӥз оло ӧз,
Ляльчиос быдэско ин пумен
Уй пала потыны лек ожен.
Корт андан тӥрлыкъёс шарккето,
Ӵуж ыргон пулъёссы жингырто.
Кисьтаськись сабляос
Синъёсыз мальдыто.
Киязы пыӵалъёс.
Вылазы жильыё дэремъёс,
Йыр вылэ корт изьы чуртнамын.
X
Нюлэсэз сайкыса, кораса,
Нюръёстӥ, шур вамен коласа,
Соос ялан мыно уй пала.
Чупчи шур выжыын
Ушкуй ӟуч калыкен пумисько,
Соослэсь выль Болванка карзэс
Пазяло.
Отысен Юберлы иворзэс
Келяло.
«Ай туннэ ми татын.
Усьсэ, вить,
Тон дӥняд вуомы.
Ваньбурдэ,
Азвесьтэ
Милем дася тырмыт.
Чурытад ке али Янсарлы
Санэзъя кузьымдэ сётыны,
Люкетӥз ке визьмо попмылы
Кристослы осконэз вӧлмытны, —
Ми тонэ
Выжытэм
Быдтомы!»
XI
Уг, уг вала батыр кышканэз,
Куалекъян со бордысь пезьдэмын,
Ӧтьымтэ кунозэ — тушмонэз
Узатны мылкыдэз ӝутскемын:
«Кыткыны ми ум сётэ асмес,
Утиськом, гажаськом эрикмес.
Кулэтэм оскон сям лякондэс
Палэнэ куштӥськом.
Ваньбурдэс,
Зарнидэс но ум куриське ми.
Ожмаськон ӝутылӥсь адями
Одӥг пол оскалтэм вал ини
Кораськись тӥрмылэсь
Секытсэ,
Кузь ныдо шимылэсь
Лэчытсэ.
Мар кулэ на тӥлед та сяна?!
Ожалскись пыӵалдэс ныпъяса,
Берлань кошке, тӧлэз уйыса».
XII
Ожмаськон поттонлы ивортон
Нюлэслы ваменак чузъяське,
Янсар князь ляльчилэн пельдораз
Тышкалтон нушыен шуккиське…
Кужымъёс кык ласянь дасясько.
Зуркалскиз,
Сэзъялскиз
Шулдыр-кар.
Вырӟизы
Чупчи шур ёросысь
Удмуртъёс.
Бадӟым сьӧд нюлэскысь каръёсын
Улон кар кенерзэс юнмато,
Шур вуэз ӧръяса котырско.
XIII
Сирпуэз
Выль пукыӵ куасалто.
Пукыӵез
Сюмысэн золъяло.
Пумен трос
Пукыӵ вень йылсало.
Ымдурзэс куртчыса,
Тӥр-пуртсэс шерыло.
Кышноос,
Пиналъёс
Воргорон урдэскын йыринто,
Быгамзэ, вормемзэ быдэсто.
Тушмонлэн ки улаз сётскыны
Нокинлэн но уг поты мылыз.
XIV
Уд тӧро люкылэ калыксэ
Куиньмослы.
Донды-кар
Дондӥлы возьманы сётэмын.
Покчилы Гуӵин-кар усемын.
Ӧтьылэ уд батыр
Ас дораз пиоссэ,
Туж визьмын,
Лякытэн,
Каньылэн
Валэктэ:
«Бисарлы
Гуӵинэ мыноно.
Дондӥлы
Тури-Кук юрттылоз.
Дэлет-Бур мон бордам ожмаськоз».
XV
«Урдэс пал каръёсмес
Ӟучъёслы сётэмлэсь
Возькыса улоно.
Вормонтэм кужымлэн пумитаз
Потатэк, лачмытак пуконо.
Котресэ шедемлэсь,
Мон дорам, Шулдыр-кар пушкамы,
Люкаськом огинэ.
Лымшор пал тӧролы
Ивор ыстэ сэрыт.
Мед лыктоз со татчы,
Кужымзэ люкаса.
Куспамы огкылысь ужаса,
Ум, ум сётске та виысь тушмонлы!»
XVI
Юберлэн косэмъяз
Дондӥен Покчиен
Калыксэс нуизы.
Сюресэз вылысен
Покчилы ӝегатскон но кемдэ.
Кыр-бусы шорысен
Уд вӧсясь могатэ:
«Вӧсяськоме татын, пиналъёс.
Мед юрттоз асьмелы мукылчин.
Горд ошпи вандыса, вӧсяса,
Курбонэн сюлвором нюнямес.
Йыбырттон веть витё пересьёс».
Кык но куинь уй-нунал тазь ортче.
Со сьӧркын соосыз тушмонъёс
Котырто,
Ыбыло,
Корало…
XVII
Дондӥлэн кышноез, Саля-Шуд,
Кузпалзэ ас йӧназ узатэ:
«Ӟучъёсыз тон огнад но вормод,
Калыкез уженыд мальдытод,
Батырлэсь сӥ-бурзэ шобыртод.
Тон эн келя шуддэ киысьтыд!»
Кышнолэн
Кыл вылаз пыремен
Куасалскиз кужымез
Дондӥлэн.
Донды-кар Янсарлэн кун улаз,
Нош Дондӥ му вылэ ик пограз.
Со вӧзын Саля-Шуд но кылле,
Вир пушкын синъёссэ кыньылэ…
XVIII
Кык карез пазяса, лек тушмон
Шулдыр-кар котыре
Люкаське.
Сьӧд кырныж кроктэмлы лэсямон
Шимесэсь иворъёс
Кылӥсько,
Юберлэсь сюлэмзэ портыло.
Одӥген-одӥген вуыло
Куашкатэм каръёсысь пегӟемъёс,
Пыӵаллэсь мозмытскем йыр-лулъёс.
Батырмы ӟырдамын,
Лекъяське.
Син шораз уд вӧсясь
Вадьсаське.
XIX
«Тон, пересь, —
Шуд келясь,
Кый сюлэм!
Улэмез пуш ласянь сисьтӥськод,
Визь-нодэз кылчинэн воштӥськод.
Сьӧд нюлэс нюняен пӧямед
Кужыммес тӥялтӥз.
Тон — силё,
Визь сьӧлтась!
Утялтоз ни тонэ кылчинэд!»
Вӧсясез
Интыяз ик ӵоге
Вож ваись батырмы.
XX
Со куспын ӟуч попез,
Кунултӥз валтыса,
Юберлэн син азяз султыто.
«Бен кытысь тон, вумурт?»
— Отче наш!
Покориши под нозе… всех вас!
«Чупчиысь чорыгъёс йыръёзы
Лысьӧмдэ.
Отчы куштэ тае!..
Кылчинлы,
Инмарлы
Оскон сям
Асьмедыз ужмылэсь палэнтэ.
Ин уг юртты милем,
Ӟуч попен уд вӧсясь
Огвыллем
Шумесысь».
XXI
Борд сьӧрын ож куара.
Урмытэ со пелез.
Пукыӵ вень лобамен,
Инкуазьлэн югытэз согиське.
Санапал узвесен сялаське.
Някырто
Кужымез кужымен.
Погыльто
Мугорез кор пумен
Вожомем адями
Борд борды ӝабырске,
Кор вамен кечырске.
Тышкалто ук пумен йырбераз,
Нискылске кенерлэн ӧр сьӧраз.
XXII
Тӥрлы тӥр урдӥське.
Дары ӵын.
Кытын кин ожмаське?
Котькытын
Одӥг кадь йыр бырон,
Вир киське,
Мугорез тӥр кора.
«Мон бӧрсям, эшъёсы, мон дорам!»
Сэзъялске
Юберлэн куараез,
Со доры люкасько
Кылемез удмуртъёс.
Ӵогемзы омырез шултытэ,
Йыръёсыз пильылэ, пыргытэ…
XXIII
Юберлэн кышноез
Буйгатэ,
Лӥятэ
Аслэсьтыз Пужейзэ:
«Гыдыке-мусое!
Татын вить тон монэ.
Кужыме суземъя,
Бубидлы юрттыны мынӥсько.
Сиёнлы мон тыныд
Кеч макес,
Со борды нянь туриж кельтӥсько».
— Ой, мусо нэнэе, нэнэе!
Мон уг кыльы огнам, кышкасько.
Яратон Пужейдэ
Тушмонлэн ки улаз-а кельтод?
Ой, нэнэ!!
XXIV
«Зарние-бугоре!» —
Верасал на, вылды, чебер кыл,
Кыл уг шедьы, синву вия жаль.
«Ай лыкто мон дӥняд, нуные!»
— Виёзы ук сьӧсьёс! —
«Пужее! Уть, эн бӧрды, пие!
Тон ватскод тӥнь отчы сэреге!»
Ымнырзэ киыныз ӵоксаса,
Батырлэн кышноез
Пиеныз люкиськиз,
Ӧсэз шарк! пытсаса,
Ож пала вамыштӥз.
XXV
Акылес луизы
Москваысь тушмонъёс.
Дэлет-Бур мекалскиз.
Батырлэн кышноез но погра.
Пут путэ ни сюлэм.
Сэрегпум кадь, Юбер сьӧдэктэм.
Пельпумыз ӵогемын,
Мугорыз ыльӟектэм,
Суйёсыз жуммемын.
«Эк, Юбер!
Аналтӥд тон нылдэ!
Утялтэм, валэктэм бордысен
Саля-Шуд пайдазэ возьматсал.
Аналтэм нылъёсмурт азгынме».
Озь батыр малпаське ас понназ,
Бер ини табере,
Кать быриз.
Батырез Кучыран кокчалтэ…
Шеромо ыбылон куараос,
Ӝуштыло юдылэм мугоръёс…
XXVI
Нош пичи Пужеймы?
Кӧт уг чида солэн
Сэрегаз пукыны.
Йырвизьзэ бергатэ,
Йыраз визь чилектэ:
«Тазь бырод ук татчы!»
Зумыттэм кеч куксэ,
Вуж ӟег нянь турижзэ
Со куштэ киысьтыз.
Укнолэн пасетӥз нюжтӥське,
Лушкемен гид пала кыстӥське.
Ас шӧртчи шӧмыныз
Ӝабырске ужпилэн изнэсаз,
Пазьырес валэныз
Со лобӟе шур йыллэн нюлэсаз,
Санапал но уг сут ни сое,
Со мозмиз,
Со пегӟиз
Янсар князь ратникъёс ки улысь…
Кылдымтэ на вылэм Янсарлы
Юберез выжытэм быдтыны.
Ай кылиз на Пужей
Выльысен зол выжы лэзьыны.
