Якстере теште/1924/07/III-це Коммунистическ. Интернационал

Якстере теште, № 7, 9 марта 1924 г.
III-це Коммунистическ. Интернационал

Якстере теште. Еженедельный орган мордовской секции при Ц. К. Р. К. П. (б.). — № 7, 9 марта 1924 г. — с. 1

[ 1 ]

III-це Коммунистическ. Интернационал.

Мартунь 5-це чистэ топодить 5 иензэ Коммун. Интернационалсть. Сон теевсь 1919 иестэ тожо мартунь 5-це чистэ.

Но васня эряви кафтошка вал сермадмокс, кода и мейсь сон теевсь. Мееле жо серматтанок, мезе сон тейсь не ютась 5 иетьнестэ.

Васня масторсть лангсо ульнесь анцяк вейке интернационал — 2-це. Интернационалсь — истямо организация, конась пурны кругомганзо весе масторунь робочейтьнесэ и теевель социализма. Сонзэ эзэс совить робочеинь партият и сон боруци буржуазия марто те социализмасть кис. 1914 иестэ, зярдо теевсь мировой война, те 2-це Интернационалсь калаць. Сонзэ вожактнэ кармасть тыргадьме сыньцист государствань кис. Германиянь социалистэ — Германиянь кис, Россиянь социалистнэ — Россиннь кис. Истяжо кармасть тонафтомо робочейтьнесэ и крестьятнэсэ мольмекс войнав турьме истямо жо робочей и крестьян марто. Сестэ анцяк коммунист кармасть лиякс кортамо, войнасть карчо. Минек социалистнэ ютксо анцяк Ленин партиянзо марто кармась кортамо и тонафтомо, что те войнасть теизь капиталист, чтобу зепест парынестэ пештемс, секс робочейнень и крестьяннэнь а эряви мольмекс войнав. Эряви ряц теймекс забастовкат. Ки ульнесь се шкастость покш городга, се соды, что войнадость икеле алкукс ульнесть забастовкат. Но робочейтьне и крестьятнэ ульнесть аволь весе сознательнойть и сынь се шкастость манявсть. Тень кис сынь ламо ойме пуцть Польшань паксяс.

Истя вана и калаць 1914 иестэ 2-це Интернационалсь. Арцек, кодамо те тыргадиця трудиця кис, зярдо эснынзэ партиятнэ кармасть тыргадьме сыньцист буржуазиянь кис. Сынь миизь буржуйнень робочей и крестянунь тевсть.

Истя тевсь молсь 1919 иес. Зярдо теевсь Совецкой власть, то Россиянь Коммунистынь партиясть кругом кармасть пурнавмо весе и лия масторунь коммунистнэ. Сестэ Ленин неизе, что эряви теймекс истямо организация, истямо жо мировой, конась зярдыяк илязо бу тей предателинь тев и конась кармазо пурнамс весе настоящей робочеинь коммунистической партиятнэсэ соньцинзэ перть и тонафтомо и ведямо эсныст социалистической эрямонь строямо, перьгафтомо капиталистической стройсть, нельгеме властесть буржуазиянь кецтэ и максмокс робочейнень и крестьяннэнь.

1919 иестэ мартунь 5-це чистэ пурнавсть Московс представителть эрьва масторунь коммунистической партиянь. Те промксось (конгресс) и тейсь III-це Коммунистической Интернационал.

Ютасть 5 иеть се шкастость. Аламо. Да, иетьне ютасть аламо, но тень кис ламо тев теезь. Савсь боруцямс аволь анцяк буржуазия марто, но и не социалистической партиятнэ марто, конатнэ маньчить робочейтьнесэ и тыргадить буржуазиянь кис. Омбоце Интериационалсь таго кармась робутамо, конастень совасть таго не маньчиця социалистической партиятнэ. Появась еще 2½ интернационал. Шкась жо ульнесь пек пси.

Ряц молилть революцият. Венгриясо теевсь Совецкой власт. Германиясо молиль революция. Бавариясо тожо теевкшнесь Совецкой власть. Робочейть аздылть кона киявасть мольмекс. Ульнесть колмо интернационалт и весе колмонеск невтилть разной кить. Савсь ламо робутамс, чтобу эрьва масторга робочейтьнень чаркодефтемс, что анцяк Коммунистынь Интернационалсь тыргади робочеинь и крестьянунь тев-кис.

Васня весе пеецть сонзо лангсо (сон сестэ еще вишине ульнесь) и кияк а ловныль, истя мермекс, ломанькс эснынзэ. (Эряви содамс, что буржуйть ловныть ломанькс анцяк сенесэ, киде сынь пелить). Но курок весе неизь, кода бойкасто касы те Интернационалсь. Кода богатырь, сон вете иес теевсь истямо организациякс, конасть икеле кармась сорномо весе буржуазиясь. Арась ней истямо государства, косо арась коммунистической партия.

И не весе эрьва годударствань Коммунистической партиятнэ роботыть истя, кода тенст мери, кода тонафты эсныст те III-це Интернационалсь. Сон тонафты, чтобу робочейть и крестьят иляст кульцоно лия партиясо, — эс—эрынь, меньшевикинь и лия эрьва кодат черносотенной партият. Сон тонафты, что робочейть и крестьят анцяк сыньцист вийсэ вицызь эрямость. Вана мейсь сынь кетьте кец кундазь пурнавост Коммунистической Интернационалсть кругом и вейсэ турест буржуазияст марто.

И ней зярдо топоцть вете иэнээ те Интернационалсть, сон пек смелстэ может ванмо икелэв. Трудиця нароць кармась анцяк сонзэ ендо учомо помога. И тэ помогась курок сы.