Якстере теште/1924/19/Кооперативень чи

Якстере теште, № 19, 1 июля 1924 г. редактор Васильев, Тимофей Васильевич
Кооперативень чи

Якстере теште. Еженедельный орган Мордовской секции при Ц. К. Р. К. П. (б.). — № 19, 1 июля 1924 г. — с. 1

[ 1 ]

Кооперативень чи.

Ялгат! Тедиде 5-6 июль месеценть весиме таркава мастортнэнь ланга ули праздник „кооперативень чи“.

Косто появась те праздникесь?

Август месецтэ 1921 иестэ, кода лоткасть веси войнатне, кода лия масторонь эчке пекне кадымизь миник, — сестэ весе масторонь кооперациень роботникне пуромсть вейс и тейсть „весе масторонь кооперативень союз“. Истямо союз ульнись икилеяк, но сон лоткакшнось роботамодо войнанть пингстэ. Союзось, кода анцяк кармась роботамо, тейсь „кооперативень чи“. Те чинть и кармить праздновамонзо июль месецтэ васинь суббутасто веси масторга.

Те чистэ эрьва кооперативсэ кармить улиме собраният, лекцият кооперативень кувалт и эрьва член, кона ашти кооперативсэ, улизэ собраниясо и тердизэ шабранзо совамо кооперативс. Те чись кооператорнэнь (конат аштить членкс кооперативсэ) ули истямо же праздник, кодамо маинь васинь чись веси робочей народонтень.

Особенна неть читнень эйстэ пек эряви роботамс велисэ, косо еще аламо кооперативтнень эзга члент, чтобу эрьва трудиця ломань содазо лезынзэ кооперативенть и дух апак пель совазо членкс.

Веси те роботанть велисэ эряви ветямс ячейкатненень Р. К. П. и Р. К. С. М. вейсэ учительтнень марто. Эрьва таркава тейнест собраният, лекцият, ефтнест, мези лезызэ кооперациенть советской властинь пингстэ. Те чинтень анокстаст кинижкат, весиме таркава ульцява и лавкава педяфнест плакатт, чтобу эрьва ловныця ломань содазо, что тече кооперативень праздник. Кооперативень роботникне веси члентнэнь марто ютаст велива флаг марто, чекшне теист спектаклят, косо улист веси члентнэ.

Ячейкатне Р. К. П. и Р. К. С. М., учительтне и кооперативень роботниктне заботяст седе ламо и курок добовамо, мезе эряви праздникинтень.

Те праздникенть эйстэ истяжо эряви ламо роботамо и тень кувалт, чтобу аватне улист праздниксэнть истя жо, кода и цератне и кооперативс соваст членкс седе ламо, аволь кода те порас. Евтамс, мезе лезызэ аванть кооперативсэ и кодамо лезы ули эстензэ.

Эрзянь ялгат! Мон думан, что тынь содасынк кооперативенть лезынзэ и те праздникенть ютавсынк парсте, кода эряви. Праздникте мейле илядо стувт сермадомо „Якстере Тештес“, кода ютавтынк се чинть.