Якстере теште/1924/20/Коминтерн

Якстере теште, № 20, 15 июля редактор Васильев, Тимофей Васильевич
Коминтерн

Якстере теште. Еженедельный орган Мордовской секции при Ц. К. Р. К. П. (б.). — № 20, 15 июля 1924 г. — с. 2

[ 2 ]

Коминтерн.

Те валусь теизь кавто валсто: коммунистэнь интернационал. „Коммунистэнь“ мереть тензэ секс, что меньшевикиньгак ули Интернационалуст. Миник коммунистынь Интернационалусь — колмоце интернационал, меньшевикнень — омбоце, а васиньценть теикшнызь Карл Маркс ды Фридрих Энгельс 1864 иестэ. Теикшнызь сонзо сень кис, чтобу веси мастортнэнь робочейтне теивелть вейке комитет, кона кармаволь бу робочейтнень ветямо буржуинь карчо и кона моливель бу войнатнень карчо. Те комитетэнтень и мереть Интернационал. Кода мон мерень, Интернационалунтень могут совамо эрьва кодамо масторонь робочейть.

Васиньце Интернационалусь а кувать цидярць — сонзо буржуйтне панцизь и калавтызь веси робочеинь тевист.

1889 иестэ те комитетэсь пуромсь омбоциде — омбоце интернационал. Сон тожо кармась робочейтнень пурнамо кругомганзо, кармась таго арсиме, кода бу буржуйтнень киртямс войнадунть. Сон арсись истя: кода устави война, веси робочейтне кадык теить ряц забастовкат.

Но кода сась 1914 иесь, кода сыргась войнась, омбоце Интернационалунь ветецетне таго мекс потасть удалов. Сынь стувтызь, мезис тонавсть робочейтнень и забастовкань таркас кармасть кучумо сынст чавомо вейкист вейкист буржуинь кис.

Веси меньшевикне (омбоце Интернационалунь кирдицетне) човорявсть буржуй марто.

Истя омбоце Интернационалусь эсь прянзо гадизе, истя потась сон эсь валунзо эйстэ, истя прянзо калмизе 1914 иестэ.

Кода войнась уставась, кода омбоце Интернационалусь эсь прянзо робочеинь икиле срамизе, покойник Ленин ялгась, кармась кортамо, что эряви теимс колмоце Интернационал, чтобу робочейтне авулть кадовт ськамост и аволть тук, кона ков. Ленин ялгась мези мере, сень и теи. Сонзо валунзо коряс 1919 иестэ Московсо пуромсь колмоце Интернационал, те уж коммунистэнь Интернационал, а седе нурькинестэ „коминтерн“.

Ней ветициде пуромсь Московсо коминтернэсь. Састь робочейть лия масторсто кортамо миник робочеинь марто тевист кувалт. Сынь миник союзникенек. Лия масторонь буржуйтне сисем иеть порить пеист советэнь масторонть лангс, но токамонок пелить. Пелить секс, что сыненст а мереть самай неть робочейтне, миник союзникне!

Арситям чумбра чи Коминтернэнень.