Якстере теште/1924/37/А стуфтсынек ялганок
| ←Прявтлопа | Якстере теште, № 37, 9 декабря 1924 г. редактор Глухов, Пётр Семёнович А стуфтсынек ялганок |
Ниле миллион ломань совасть МОПР-ань членкс→ |
| Якстере теште. Еженедельный орган Мордовской секции при Ц. К. Р. К. П. (б.). — № 37, 9 декабря 1924 г. — с. 1 |
[ 1 ]
| Илимизь истувт ялгат! |
| А стуфтсынек ялганок. |
Ноябрь месецень 30 чистэнть топоцть кавто иеть, кода теевсь весе масторлангонь робочейтнень лездамонь Общества — МОПР!
Кавто иень робота нефтизе кодамо покш лезэ максы те Обществась робочейтненень капиталистнэнь карчо туриманть тевсэ.
Анцяк минек Советэнь Республикасо властесь робочейтнень ды сокицятнень кецэ. Лия масторга властенть кирдить эсь кецэст буржуйть, капиталист. Сынь олясто лекстямс а максыть трудиця ломатненень. Зняро робочейть сокицят лия масторга ащить пекстазь тюрьмава, буржуйтнень карчо пшкадимань гис, трудицятнэнь паро эрямо чинь гис бороцямонь кувалт.
Капиталистнэ, не верень потиця верьгистнэ, повсить, леднить робочейтнень ды сокицятнэнь эйсэ. Анцяк не читнестэ Эстониянь капиталистнэ судясть 149 робочей. Вейкень эстэдест (Ян Томп) ледизь судямонть прядовмодо икелев, 148 ломань пингест эрямозот пекстызь тюрьмас, калмизь живстэ. Капиталистической государстватнесэ острогтнэ пешкедсть робочейде ды сокицядо. Ки максы сынест тюрьмасо чождынестэ лекстямо, ки семияст туртов максы помощь? Анцяк МОПР, конань членкс совить весе масторлангонь робочейть ды сокицят. Миньденек башка кияк а максы помощь робочейтнень ды сокицятнэнь, конатнэ журить буржуйтнень, капиталистнэнь карчо.
А стуфтсынек лия масторонь эсинек ялганок. Соватанок весе МОПР‘ань ячейкас членкс. МОПР максы помога аволь анцяк сетненень, конатнэ ащить тюрьмава, аволь анцяк сынст семияст эйсэ кирьди. МОПР максы вий лия масторонь робочейтненень ды сокицятнэнень бороцямо капиталистнэнь карчо, кравтомо сявдикс ланга весе верень потицятнэнь ды тееме эсист масторсо Советэнь робочеень сокицянь власть.
Минек Советэнь Республинань келес илязо кадовт вейкеяк робочей ды сокиця МОПР‘ань ячейкас апак сермадст.