Янгамо (2006)/Вандынь чинь куловтома
[134]
| Евтнемат
ВАНДЫНЬ ЧИНЬ КУЛОВТОМА |
Веленть ве песэ эрясть Перкаень.
Юронь кирдиесь, Важдай атя, паксянь тевтнеде башка, телень шкава стакшныль оршамопельть, васняяк, шубат ды шапкат. Истямо кол ульнесь тень кувалма — ютак куш сядо вайгельпеть, сонзэ кондят а муят. Бути кияк мериль: «Шубам стызе Важдай атя», теньсэ ёвтавиль весе. Сюпавчи мельга атясь зярдояк эзь пансе. Важодеманзо кис питне кажовтнень пельде эзь сайне.
Эрясь Важдай кавто цёранзо марто. Вейкесь эйстэст, Лугай, урьвакстозель, ульнесть уш зярыя эйкакшонзо, ялатеке явомадо зярс эзть арсе. Важдаень низэ, Олдай сырявась, поладонзо эзь кадново. Нежедсь, ветясь кудонь-кардазонь тевтнень виень апак вансто. Тейсь сынст шкастонзо, ваньксчинь кирдезь.
Кие сестэ содась — сы шка, ды паро тевень кис, тевень вечкемань кис кармить чумондомо, пансеме, нарьгамо? Кияк сонзэ эзь учо. Сонсь сась.
Васняяк муинзе Перкаень.
...Састь ашолгадома ланга. Мекс истя вечксть эрямо пизэнь сокарицятне те шканть, кияк а содыль. Совасть. Ютксост ульнесть зярыя милиционерт.
— Сынек велестэнть панемеяк. Тынь — сюпавтадо! — мерсь, теке локшосо лакштядсь, «кулактнень» почаксыцятнестэ вейкесь.
— Чачома велестэнь ковгак а туян! — керязь керизе Важдай апак терде инженть.
Атясь аштесь сыцятнень икеле асыргавтовиця кевекс. Сэрей, келей лавтов, лангсонзо ашо коцтонь панарось неявсь вишкинекс. Те ломанентень кияк кодгеменде ламо эзь максне.
Милиционертнэнень валонзо ютавтызь рузкс.
Тонат бизмолгадсть: «Те кода истя — а туян?»
— Связа-ать!!! — пиже-ожо вайгельсэ рангстась покшост. Чамазо якстерьгадсь, алце турвазо сорнозевсь кежтнеде. Вакссонзо аштиця «кшнань каркссотне», теке вачо верьгизт, каявсть атянть лангс ды мендизь кедензэ удалов, сюлмизь.
Кудось увнось, човорявсть вайгельть: цёрань, авань, эйкакшонь. Сёвномат-лайшемат... Те мольсь а кувать. Весень кшувавтызь ушов.
— Ну-у... И дальше будешь упрямиться? — ней уш лия, сэтьме вайгельсэ, теке мерят седеймарязь, одс пшкадсь «кулаконь» прявтонтень милициятнень покшост. Атясь чатьмонсь. Рузкс эзь чарькоде. [135] Ютавтызь тензэ, мезе тона мерсь, однэ «камсаултнэ».
— Чачома модам лангсто, чачома масторстон ковгак а туян, — апак пеле, видьстэ сельмс ванозь ды валтнэнь вейкень-вейкень путнезь, омбоцеде ёвтызе эсь мелензэ кудонь азорось.
— Приведите его в чувство, — сельмсэ кончтазь, мерсь милициянь прявтось. Вакссонзо аштиця лездыцязо чомболксокс совась каштом икелев, сайсь ведра ды куроксто кандсь лисьмасто ансяк таргазь ведь — ланганзо эйть укшныть. Кепедизе ведранть ды жойневтизе веденть коронь акирдицянть ланга. Покордамодонть, лакиця кежтнеде Важдай кувакасто таргизе оймензэ ды ноцковтынзе удалов сюлмазь кедензэ. Варштась икелензэ аштицятнень сельмс. «Мезе тынь, пайстомо ломанть, тейтядо? Каня а нетядо — икеленк покштянк? Кинень теинь чумо, а? Мекс чатьмонетядо?» — кортась чамасто чамас ютниця вановтозо.
Кой-кить нолдызь пряст. Кода а нолдамс, ансяк исяк оршась, лездась кода маштсь, течи оно кодамо нулгодькс тев теить мартонзо.
Ожа петнестэ кольгсь ведь.
Сельмстэнзэ мельцек-мельцек прасть сельведень зярыя байгеть.
— Ну-с... Каково? — апак ранго, нарьгазь ладсо пшкадсь покшось.
Валтнэнь ютавтызь эрзякс.
— Кулан — чачома модам лангсто ковгак а туян.
Каятотсь ютавтыцянть вайгелезэ.
— Ты, старик, оказывается, орешек тот ещё! Придётся подкинуть жару. Жалко, конечно, тебя, но ты ведь сам жаждешь этого, я так понял. Иванов, мигом!
Ивановось совавтсь мокшнадо покш колмо-ниле эй покольть ды сивева тонгинзе атянть карксазь панаронзо потс.
Важдай сырк эзь тее.
— Ну как? Жжёт маленечко? Ничего, ничего, ты ещё старик хоть куда... — стувор вакссо озадо аштезь, яла кижнэсь «седеймарицясь». — Знай, старче, и не таких переламывали. Значит, говоришь, умру, но землю родную не покину? Спрашиваю, да или нет?
Валонзо ютавтызь эрзякс.
Прясто пильгс начко Важдай видемтизе рунгонзо, прянь кепедезь варштась нарьгицянзо лангс ды мерсь:
— Нет! Кадык кулан, ковгак тестэ а сырган!
Ла-ла-ла... — сеске ютавтызь рузкс.
— Кы-ы-лан? Так сказал? Да?
— Что ж, рука дающего, говорят, не оскудеет. Нехорошо отказывать просящему. Грех. Иванов! Открой подпол! Мигом!
Зэрть, сёвномат, рузонь визькс валт... Курок Важдай атя ульнесь уш каськасо. Колмо чинь ютазь таргизь тосто кулозь.