Янгамо (2006)/Ламбамо нартемкс/1
[6]
| ЛАМБАМО НАРТЕМКС
Келей ёвтнема |
— 1 —
Виряз видемтизе нуемадонть каназкадозь рунгонзо ды, тарвазонть кедьстэнзэ апак нолда, варштась удалов — чивалгома ёнов. Чипаесь, якстере мокшнасонзо тандавтнезь, теке марто мизолдозь, ваннось эстензэ удома тарка. Чинь-чоп эльниця, сюронь певердиця вармась прядынзе тевензэ, меельцеде келейстэ лекстясь ды, якстере паргонть лангс ванозь, ношкстась та-ков оймсеме.
«Саты течис, шказо кудов, — мерсь эстензэ нуицясь, теезенть лангс ванозь. — Ловт, тедедень нуеманок изнявсть. Кадови сурось. А мезть «ловомс», эйстэнзэ аламо. Ванды кундама пултонь усксеме. Истя вана: ве тевенть прядсак, ушодт омбоце».
Уманть трокс-келес ветень-ветень аравтнезь товсюронь пултнэ, прок сырнень кудынеть, кецневтсть сельмть. Кизэсь летькель ды лембель. Менелесь видицянть мелензэ витизе. Товсюронь стака прятне пултнэстэ нурьгезь нурьгсть. Эрьва копонястонть таргавсь сундерьёнксонь сулеень сэнь кувака леха. Качадсь кенерезь сюронь, олгонь ды модань чинесэ. Овсе а умок Пиргужонь умаст копачазель ожо тюссо, варма шкасто лымбиця велькссэ, ней сон неявсь кудопотмокс, конань азоронзо анокстызь курмост-кармост васоло эрямо таркав туемстэ.
Виряз атя, панар ожасо чаманзо нардтнезь, апак капша ютась тарвазонзо марто ума пес, ярсамо-симема таркинезэнзэ; комась, ведьмеде кепедизе чаво, эйсэнзэ кедьгеденть калдордыця пешторонзо ды каизе лавтовонзо трокс. Меельцеде оймень витезь варштась ваньксстэ нуезь, прок наразь, уманть лангс, нолажтсь кельпрястонзо «окойники» валось, ды сыргась уматнень юткова яннэванть покш кинть ёнов.
Молема талай. Колмо вайгельпеде ламо. Онкстнемстэст шкась юты байтяк. Ськамот улемстэ прясонть сюлмавить-чачить эрьва кодат арсемат. Удемесь ансяк веть оймси эйстэст. Лиясто те шкастонтькак таркас-эземс а пракшны. Седеесь мейсэяк пицеви, сови эйзэнзэ ризкс-мелявкс, сави веньперть велявтнемс, керш боканть лангс мадемс, витенть... Верень пиди арсематнеде весь маряви чопода пингекс — калавтат, калавтат тапарксонть, пе тензэ а неяви.
«Сисем иеть уш, сисем... Арась, аволь «уш», — [7] велясть Вирязонь превсэ ледстнематне. — Пинге, маряви, кода туинь эсь кудостон, туинь, виде, эйкакшон кастомадост мейле, ловт, сыречисэнь. Превсэнь вейкель: муян сэтьме эрямо, а карман марямо эрьва чистэ покордамонь валт, сёвномат, рангомат монськак а содан мезень кис. Мартон свал эрясь: туемс, туемс те оймень лембевтеме эрямостонть, куш куломадон икеле меельце кемень иетнень эрямс ломанькс, валдо эрямосо. Кеминь...»
Неень эрямосонть ды ютазь иетнесэ сокарязь, мельтнень тей-тов кайсезь, нуемстэ сыцясь эзизе редяяк кинть кувалмонзо; кепедизе вановтонзо — икелензэ кудозо.
Панжизе кузтемпень кенкшенть. Каршонзо, эль эзть эртеве, — Элюва, эриця ялгазо. Виряз сонськак а соды, кода тензэ меремс ды кикс сонзэ ловомс: ялга, ни? Кедьсэнзэ ведра — сыргась ведьс кудост икеле лисьмантень.
— Мекс чавонь кедть?! Куш пултке кандовлить! Мезеяк а теи монстемень, мезеяк тензэ а эряви, ансяк мон, мон эрьва тевентень кундазан... — мотордозь тусь лисьманть ёнов. Теке стака мокшнасо лоштизь Виряз атянь, шик-шик — марявсь пштикс седейсэнзэ. «Туян, туян, саты, зняро кирдемс...» — ютасть превганзо валтнэ, аванть мельга серьгедсь:
— Мезекс теть пултось?! Ванды лишмесэ усксесынек!
Элюва, кудазоравась, — ёлганя, сэрьс аволь сэрей ломань, коськана рунго. Сыречинь сормсевкстнэ чаманзо пек эзизь нарьга. Кодгемень иеть тензэ а максат. Мейсэ, кодамо толнэсэ сисем иеде икеле эждекшнизе «пулттомо сыцянть»? Паряк, мизолксозо ды ашо кумбря мазый пеензэ кецневтекшнызь седеензэ? Ней уш сонськак атясь тень а ёвтасы — шкадонть оно зяро ютась. Эждекшнизе, эли лия кодамояк сюлмо ульнесь, ледстик азё. Эрямосонть мезть а эрсить.
Элювань лангсо покай. Пулай карксни ансяк покшчистэ ды тейтерень чиявтомо молемстэ. «Вельть стака монь сталмом коряс», — яла пеедькшнезь мери кевкстницятненень эсь прянь идемга. Мазыйстэ оршнемстэ мель явсь пангонтень — аламнеде сэрейгавтсь рунгонзо. Пилысэнзэ карть. Прясонзо конякакс теезь ашо паця.
Виряз атя ацирьгалезь юхадсь кедьсэнзэ ведьс молицянть мельга ды эрязасто эскелязь совась кудыкелев. Озась кенкшенть вакссо эземнентень, юксинзе пильгензэ, карензэ-пракстанзо путынзе аксялов. Кепе ютась удало кудов. Ёрвалдызе, потолокс понгавтозь [8] ведрастонть ведень амолязь, ливезев-сэксэв чаманзо, нардась ды чошк таргизе каштомсто ям марто чакшонть.
Совась «кудонь прявтось».
— Тон васня лишметнень лангс варштавлить — ули-арась мезеяк икелест. Мейле уш тонсь... — пшкадсь каштом икеле чарыцянтень.
— Юртай кильдтнесь. Каня мезеяк тенст эзь кая? — машнетезь ладсо кевкстизе ведра марто совицянть атясь.
— Юртай, Юртай... А содат сонзэ кирьгапарде? Сась обедстэ. Чарькодеви — симезь. Пания.
— Допрок?
— Эли тон, атя, превстэ лисить? Сядоксть теть мернинь: асимицянтень пандт целковой, симагаесь трёшникентеньгак кецни. Чарькодить? Ко-о-сто... Варштак эно лишметнень лангс... — седе чевтинестэ, прок арасельтькак ёвтазь казямо валт, чольдердсь Вишкайнянь, кода велесэнть ламот сельме удалга мерить Элюванень, гайгиця пшти вайгелезэ. Аволь эрьванть сатыть виензэ теемс сонзэ амарицякс.
Элюва кундась стуворонь анокстамо, полазо-ялгазо тонгсь кардазонь кузтемпестэ полда видьга керязь кедень ташто кемть ды пилысэнзэ чошкиезь ютась Вишкайнянь валонзо топавтомо.
«Зяроцеде мон туян те ёзнэнть эйстэ... Пе сакшны, куш килькш каяк кирьгават! Яла туян, туян... Вант, таго потан, таго таркастон а сыргаван. Кодамо вий кирди — монсь а содан. Сон, бешоконь, алкукскак, колдовимим. «Эждинзеть», — кортыть тень. А содан, а содан, авань седеесь чопода. Пазоськак а соды, кодат прякат ды кинень паневить тосо. Ансяк кискакс ирнэсь лангозон, пулт тензэ, ванодояк, сявдикс лангсо эряволь кандомс, ней уш цёковокс цёкорды. Кургоськак мизолкстонть а пекстави. Истя меревлинь: авась — поптнень пазаваст, ве ёнкссонзо паз артозь, омбоце ёнкссонзо — идемевсь».
Эсь мелявксонзо марто, седей ёжонь колазь, совась Элювань ялгазо-полазо кардазс, варштась очкотнес — Пинеме каязель сатышка, — вадяшизе Тештине пичкавтозь айгоронть, тошказь, прок вечкемадо, ёвтась колмо-ниле валт Варманень ды лиссь пельсчопода кардостонть.
Паникудонь стуворось полавтовсь, мазылгавтызь сонзэ чувтонь вакансо сывель ям, чапамо ловсо, ловсос пидезь модарькат. Вакашкесэ — рошксень печтть. Ямстонть судоварятнес эцесь тантей, кутькиця чине. Истямо [9] качадокшны ансяк каштомсо пидезь ды тосо кувать кирдезь ямсто. А стяко, лисни, кой-кува тензэ мерить «велень ям». Танте-е-ей, секень вант, келетькак нильсак.
— Озак, — окойники тердизе столь экшс азоравась.
— Озан, — эзь кирдеве, згилязь ладсо — стувтовсь сиземаськак — мерсь, прок чапо тейсь, Виряз.
— Ярсак.
— Ярсан, — икеле ладсо пеедькшнезь ёвтызе валонть кудонь кирдись пенчень ды кшинь саемстэ.
— Ярсамсто чартьчинь содыця ломанть келест а невтнить. Ярсамсто болдордомась лезэ а канды. Содат?
— Содан. Тонь весе?
— Весе.
— Ней совак икеле кудос. Поладса ярсамом чатьмонезь. Мелеть коряс, — кургсонзо чевелязь, мизолксонь пачк мерсь Виряз каршонзо стядо аштиця нинстэнь. Лиссь аймельгадомань тев: Элюва топавтызе атянзо меленть — кадызе ськамонзо. Чуросто истя эрси, валгак эзь ёвта.
Прядовсь ярсамонь шкась. Пенчтне-вакантнэ шлямодост-нардтнемадост мейле путнезельть таркаваст. Стуворось нардтнезель. Кавтонь кирда. «Ней мезе, атя? Оймсеме? Одирьванть бокас?.. Течи аволь аламо теезь. Ванды таго чи ули. Пиземе илязо туе. Вана мезде, атя, пельть. Кеман, а туи. Чизэ валгсь манейстэ, теке каштомсо тол якстердсь...»
Совась пешксе пеке атя кудонть ванькс пельксэзэнзэ. Низэ уш таркасоль. Тодовось прянзо ало чачк мендязь, седе сэрей улезэ.
— Я! Ёвтыка, кодат кулят туить паксясто? — ансяк Виряз пекстызе мельганзо кенкшенть, гайгезевсь Элювань вайгелезэ.
— Паксянь, кодат лият... Товсюронь умась прядовсь. Копонятне теке лагоря ават пезнавтнезь. Ванат вановлить. Эрьва пултось — пондо. Сэрьскак меште малава. Истямо менть умок арасель...
— Ва, иля уле сезьганокс, иля чикордо. Сёксесь кадык валонзо ёвтасы, — каясь трокс вал, кардызе мирдензэ Элюва.
— Те истя, дугай, — ве мельс прамга мерсь панаронзо каямсто Виряз, — седеем аламнеде а таркасонзо. Содат, Нороваванень апак нуе панкске эзинь кадо. Кода истя лиссь?..
— Ризнэмс а мезть, суронь панкскенть урядамсто кадтано. Шабратнень ламо кадовсть нуемкаст?
— Тон жо улкоть тосолить.
«Одсто, ловт, ведьгеменьшка иесэ, марявсь тень: кинень кодгеменде ламо, зяро ней эстень, сеть а вечкить, а талнокшныть, а кулелить. Арсекшнинь: пе, кодамояк ава истямо цёранть верензэ а кирвазтьсы, весе, прядовсь паломапелезэ. Ильвелинь. Тевесь лиякс ашти. Одолинь, а содылинь, кодат чадыведть лиясто лажныть сыретнень мештьсэ...» — неть арсематнень марто Виряз кайсесь, путынзе оршамопелензэ эсь коникензэ песэ табуретэнть лангс ды чопавтсь нинзэ ваксс.
— Кавто чис мезеяк пек эзь полавтово.
— Тон вандынь чиденть арсят-арась? — яла исковась Элюва.
— Эно кода! Кеман, лиси тевенек.
Ломанть эрявить.
— Эно кода, — мерсь Виряз ды нежедизе прянзо нинзэ лавтовс, конинзе сельмензэ.
Удоманть учомс эзь саво.