Янгамо (2006)/Седеень лазкс
[141]
| СЕДЕЕНЬ ЛАЗКС |
Шалань анокт. Содыть: усксызь васня Отяжелень станцияв, тосто — васов чилисема пелев, эрицявтомо таркав. Мезе меревсь саемс, пурнызь-сэрнизь. Ды кодат пурнамот, саемс мерить ансяк зняро, зяро кандови. Скалонть эли лишменть ланга иля арсеяк. Кудоськак сявдиксэть лангс а вачкави. Кадовсь явомс «кулаконь левкскетнень» — эйкакштнэнь. Шалань Отяень эйстэст вете. Покшонтень кемнилеешка. Лиятне — стувор алга [142] чийницят. Кортазель истя: седе покшкетне кадовить Пиргуж покштяст марто, седе вишкинетнень Отяй сайсынзе мартонзо. Ков — сонськак эзь сода.
Евтамс шождыне — явомс. Зярдо явовить пенгть, тикше, реветь, саразт, сестэяк талномат эрсить. Аволь шождыне сезнемс ды юксемс сюлмавкстнэнь полатнень ютксо. Кие тень пачка ютась, содасы, зяро седеень раздемат, зяро апак удо веть лиснить тень эйстэ. Седеяк кости ойме пакшань явомась. Стака ютамс тень пачка тетянтень, седеяк стака — аваст туртов. Сонензэ, пиштякантень, седе шождыне венемемс эземпряс, куломс. Отянинзэ превстэ те валось — явомс — эзь тукшно а чить, а веть. Ялатеке кудосто лисема шказонзо истямо ойме Сэредькс эзь маряво. Састь мельгаст, ды ризксэсь тапардызе прясто пильгс.
Лиссть вальмалов.
Отяй чатьмонезь вачкась улавонтень ливтнезь курмост-кармост. Перьканзо чарасть-велясть цёрынензэ — Виряз ды Каштай.
— Косо Черькай? — пшкадсь Отяй нинстэнь, кона аштесь вакссонзо ды нильнесь сельведть.
— А содан... Паряк, кудосо? Азёка, Виряз, чийнека, — мерсь авась покш цёранстэнь.
Тона велявтсь сеске.
— Авай, кудосо сон арась! — серьгедсь кузтемпестэ.
— Парсте ванныть? Аксялга варштнить? Паряк, каштом алов кекшсь?
— Кудосо косояк арась, авай! — таго рангстась Виряз.
— Черькай! Черькай! — серьгедсь Отянизэ кардазс совамсто.
А куш а каш.
— Вай, те мезень тамаша? Мезень апарот?! — талномадонть вайкснезевсь азоравась.
— Черькай, листь! Косат? — эзь кирдеве Отяень седеезэяк.
Ускицяст, эсест велень цёрась, ды милиционерэсь капшавтсть. Эрявсь кенеремс поездэнтень.
— Азёдояк, эйкакшт, чийнеде пире пес, паряк, шлямкудос совась, — кармавтынзе нуцьканзо Пиргуж атя. Сон те шкас аштесь чатьмонезь. Вансь, кода цёразо ды урьвазо анокстыть, вачкить-теить васоло кинь улавост.
Эйкакштнэ ношкстасть тов, ков кучинзе покштяст.
Пансицятне секе тев ванкшность часост лангс.
— Черькай шлямкудосо арась! Натой потмарскак кузнинек! — сеедьстэ лексезь, яволявтсть лелят-ялакст.
— Вай, вай, те ков истя мольсь эйкакшось?! — [143] талнозевсь Отянизэ. — Тынь кардазонть удалга таркинет-нень ваннынк?
— Ваннынек, кода эно! — ве вайгельсэ ёвтызь мелест Виряз ды Каштай.
— Сестэ оно мезе: кудопотмарс кузеде! — макссь превть Пиргуж. Эйкакштнэ либорк срадсть тееме сень, мезе мерсь покштяст. Мельгаст тусь тетясткак. Уцор-ацор кузсть колмонест кудопряс. Тесэ сундерькс чопода. Пилытнень ало каштордыть лазтнэнь ланга ацазь коське лопатне. Ве таркасонть кадовозь мелень тикше. Васня эйкакштнэ, мельгаст тетяст эскельдясть потмо ёнов ды редизь Черькаень. Прянзо алов кедензэ путозь, сон удось тикшень штеминенть вакссо.
Тетят-цёрат вансть лангозонзо ды эзть сода, мезе теемс, — истя тантейстэ, истя мазыйстэ тона удось. Отяень мельс васняяк кирвазсь толнэ: ноцорямс те тевенть кис пиледе. Ансяк те мелесь сеске мадсь. Мезень чумозо, мезе сон чарькоди сисем иесэнзэ? Отяй пульзясь, састыне-састыне велявтызе удыцянть кунст, видемтизе рунгинензэ. Саиксэлизе беремазонзо — эзь саеве, сыргозсь. Эзь чарькодеве тензэ, косо ды мекс тесэть тетязо ды лелянзо. Отяй кепедизе пакшанть ды сыргакшнось потмарстонть валгомо. Те шкастонть кекшницясь брикстядсь кедьсэнзэ-пильгсэнзэ ды менчевиця калнэкс менсь тетянзо кедьстэ.
— А молян, а молян мартонк! Покштянь марто кадован! — серьгедсь цёрынесь пиже-ожо вайгельсэ ды ильсезь лайшезевсь; кирдсь мель козоньгак эцемс, кекшемс.
— Адя, адя, орголькай. Туемс эряви. Панить эйсэнек, ков молят. Вадря куш тон мезеяк а чарькодят, — ладсесь-оймавтнесь цёрынензэ Отяй.
— Адя, Черькай! Тосо учить эйсэнек. Сёвныть... — лездасть тетянстэнь Виряз марто Каштайгак.
— Оргодеде тестэ! Мон покштянь а кадса! — эсензэ содась пакшась.
Отяй саиксэлизе вийсэ, тона седеяк ацирьгадсь. Эцесь тикше потс.
— Кадык седе курок покштянк тей кузи, — кучинзе Отяй лездыцянзо, сонсь кундась ордакшкали-цянть ладсеме.
Кузсть потмарс Пиргуж ды нуцьканзо.
— Косат тон, Черькай? Сельмень эзть тонадо чоподантень. А неяват. А-а, оно косат! Неян, неян. Тон кода истя, сяткинем, тезэнь понгить? Адяка валгтано ды кудосо кортнесынек мелявксонок. Листь, листь [144] чоподастонть, — атясь саизе нуцькинензэ кедте, кепедизе ды лепштизе мештезэнзэ. Тона палызе покштянзо чамаумарьс. Атянть чевте валонзо ды кутькиця сакалонзо оймавтызь эйкакшонть седеензэ.
— Покштяй, кадсамизь эсеть марто? Кадсамизь, а?
— Адя, сяткинем, валгтано тестэ ды уш тосо, кудосо, вансынек, кода тенек улемс седе тов, — теке покш марто кирдсь кортамо сыре Ппргуж.
Истя, ялгаксчисэ кортнезь, валгсть чопода потмарстонть. Кудось уш ульнесь аволь сынст. Пекстазель панжома экшс. Чалгасть кузтемпес. Пиргуж косто-бути зепстэнзэ таргась конфетка ды венстизе Черькайнень. Тонань сельведьсэ вельтязь чамазо валдомгадсь.
— Покштяй, тетянень а макссамак? Истя? Мерть — а макстан! Марят-арась? — яла энялдсь цёрынесь покштянзо сельмс ваномсто.
— А макстан, сяткинем, карматано эрямо вейсэ. Сы сёксь — школав ильтятан, тонавтнеме кармат, — паро ялгакс кортнесть ушов лисемстэ.
— Мериде, а муеви... Муевсь. Покштядонзо ковгак а оргоди, — мельспаросо мерсь шержей Пиргуж ды седеймарязь тулкадизе ёмаськенть тетянзо-аванзо ёнов, конат эвтсть крандазонть перька. — Отяй ды урьва, оймадояк аламошкас. Мон истямо мельс прынь: мартон эряви кадомс Черькаеныак. Тосонь ят ёнкстнэсэ улить-арасть школат, кияк а соды. Тесэ ули. Тонавтнеме карми. Сестэ, лисни, кадовтано ниленек, ниле цёрат. Тынк кедь лангс кадовить кавто эйкакшт, монь — колмо. Кодаяк а ёматано.
— Моньгак истят арсемат чарасть превган. Ве мельс, тетяй, прынек. Кадомс пакшанть чопода ломанькс — пежеттеяк пежеть, — ёвтызе валонзо Отяй.
— Кода тон, урьва? — пшкадсь Отянинстэнь атявтозо.
— Те кода истя — кадомс эсь эйкакшот? — якстерьгадсь авась. — Сисемгак тензэ арасть. Кода монтемень?
— Виде, урьва, ава тензэ, Черькайнень, эряви. Вельть вишкине. Седе покштнэненьгак эряват. Ну мезе теят, бути явить эйсэнек? Минь а чумот. Эсенек масторсо, эсенек юртсо седе ён ули. А ёматано, а ёмавтса Черькаеньгак, — мерсь атявтозо, кона ламо мезе несь эрямонзо перть.
Палсесть-тейсть, сельведень нардтнезь, ды улавось сыргась. Пачкоди сон веле куншкас, ёми сельме икельде.
Ильтицятне аштесть малацек-малацек — шержей, келей лавтов Пиргуж, вакссонзо ёлганя, малав сонзэ сэрьсэ Виряз покш нуцьказо, Каштай ды някинешка Черькай. Ниле цёрат — сыре ды сонзэ поладыцянзо.
[145] Зярдо вишкинетнень озавтызь крандазс ды покштнэ сыргасть мельганзо, Черькаень седеезэ эзь кирдеве.
— Ава-а-ай! — ниреждезь серьгедсь сон верьга вайгельть.
Те валось кельме налтокс ютась аванзо седеенть пачк ды марявсь тензэ калмсто лисицякс. Цёрынесь ёртовиксэль туицятнень мельга, покштязо кирдизе.
— Ава-а-ай!.. — каятотсь меельцекс, ды теевсь општ.
Вансть чачома велезэст ды натой эсь пезэст кадовицятне, зярс улавось эзь мурда кершев ды эзь ёма сельмест икельде. Вансть ниленест. Ков ветясынзе истя ушодозь кись? Мельскак киньгак эзь сакшно: сынь, ве чувтонь неть кавто тарадтнэ, зярдояк вейкест-вейкест а неить...
Теленть самс Пиргуж шлямкудостонть, конань кадызь сонензэ, тейсь кудыне. Вишкине, берякшке — сень кис эсеть ды лембе. Кецневтсь сеяк: эйкакштнэ якасть школав, тонавтнесть. Ламбамо тансть эрямонть пельде пелькашка кудыненть азорозо эзь учне. Сялдомскак пек эзь сялдо.
Ютась малав ие.
Таркатнестэ, козонь кие соды мезень кис ускизь цёранзо-урьванзо, окойники сась-пачкодсь сёрма. Кецнемантень — седей киторкс марто човор — арасель пе. Кандызь те учовикс конёвненть, зярдо весе кудосольть. Пиргуж «озавтынзе» сельмукшонзо, панжизе конвертэнть ды верендясь ловномо. Ловнось марямга. Перьканзо цёратне кунсолость апак лексе. Вайгелезэ эзь кельге кудынентень. Ды тесэ... Ловныцянтень яла эзь кемеве, мезде кортыть икелензэ букватне. Сон кувакасто таргизе оймензэ ды тошказь ладсо, валонь-вал ловнызе: «...кадовинек ськамонок, Эрьмай ды Кудаш кулость. Вачодо. Нолдык, тетяй, чумонок — эзть ванстово. Маряви, Пазось Эсенекак пурнасамизь...»