Ѱалти́рь слѣ́дованнаѧ/Каѳі́сма і҃

Дв҃да прⷪ҇рка и҆ цр҃ѧ̀ пѣ́снь.

Каѳі́сма і҃.

Дв҃дꙋ ѱало́мъ, сынѡ́въ і҆ѡнада́вовыхъ
и҆ пе́рвыхъ плѣ́ншихсѧ,
не надпи́санъ ᲂу҆ є҆врє́й, ѻ҃.

На тѧ̀, гдⷭ҇и, ᲂу҆пова́хъ, да не постыжꙋ́сѧ въ вѣ́къ. в҃. Пра́вдою твое́ю и҆зба́ви мѧ̀ и҆ и҆зми́ мѧ: приклонѝ ко мнѣ̀ ᲂу҆́хо твоѐ и҆ сп҃си́ мѧ. г҃. Бꙋ́ди мѝ въ бг҃а защи́тителѧ и҆ въ мѣ́сто крѣ́пко сп҃сти́ мѧ: ꙗ҆́кѡ ᲂу҆твержде́нїе моѐ и҆ прибѣ́жище моѐ є҆сѝ ты̀. д҃. Бж҃е мо́й, и҆зба́ви мѧ̀ и҆з̾ рꙋкѝ грѣ́шнагѡ, и҆з̾ рꙋкѝ законопрестꙋ́пнагѡ и҆ ѡ҆би́дѧщагѡ: є҃. Ꙗ҆́кѡ ты̀ є҆сѝ терпѣ́нїе моѐ, гдⷭ҇и, гдⷭ҇и, ᲂу҆пова́нїе моѐ ѿ ю҆́ности моеѧ̀. ѕ҃. Въ тебѣ̀ ᲂу҆тверди́хсѧ ѿ ᲂу҆тро́бы, ѿ чре́ва ма́тере моеѧ̀ ты̀ є҆сѝ мо́й покрови́тель: ѡ҆ тебѣ̀ пѣ́нїе моѐ вы́нꙋ. з҃. Ꙗ҆́кѡ чꙋ́до бы́хъ мнѡ́гимъ: и҆ ты̀ помо́щникъ мо́й крѣ́покъ. и҃. Да и҆спо́лнѧтсѧ ᲂу҆ста̀ моѧ̑ хвале́нїѧ, ꙗ҆́кѡ да воспою̀ сла́вꙋ твою̀, ве́сь де́нь великолѣ́пїе твоѐ. ѳ҃. Не ѿве́ржи менѐ во вре́мѧ ста́рости: внегда̀ ѡ҆скꙋдѣва́ти крѣ́пости мое́й, не ѡ҆ста́ви менѐ. і҃. Ꙗ҆́кѡ рѣ́ша вразѝ моѝ мнѣ̀, и҆ стрегꙋ́щїи дꙋ́шꙋ мою̀ совѣща́ша вкꙋ́пѣ, а҃і. Глаго́люще: бг҃ъ ѡ҆ста́вилъ є҆́сть є҆го̀, пожени́те и҆ и҆ми́те є҆го̀, ꙗ҆́кѡ нѣ́сть и҆збавлѧ́ѧй. в҃і. Бж҃е мо́й, не ᲂу҆дали́сѧ ѿ менѐ: бж҃е мо́й, въ по́мощь мою̀ вонмѝ. г҃і. Да постыдѧ́тсѧ и҆ и҆сче́знꙋтъ ѡ҆клевета́ющїи дꙋ́шꙋ мою̀, да ѡ҆блекꙋ́тсѧ въ стꙋ́дъ и҆ сра́мъ и҆́щꙋщїи ѕла̑ѧ мнѣ̀. д҃і. А҆́зъ же всегда̀ воз̾ꙋпова́ю на тѧ̀, и҆ приложꙋ̀ на всѧ́кꙋ похвалꙋ̀ твою̀. є҃і. Оу҆ста̀ моѧ̑ возвѣстѧ́тъ пра́вдꙋ твою̀, ве́сь де́нь сп҃се́нїе твоѐ, ꙗ҆́кѡ не позна́хъ кни̑жнаѧ. ѕ҃і. Вни́дꙋ въ си́лѣ гдⷭ҇ни: гдⷭ҇и, помѧнꙋ̀ пра́вдꙋ тебє̀ є҆ди́нагѡ. з҃і. Бж҃е мо́й, и҆̀мже наꙋчи́лъ мѧ̀ є҆сѝ ѿ ю҆́ности моеѧ̀, и҆ до ны́нѣ возвѣщꙋ̀ чꙋдеса̀ твоѧ̑. и҃і. И҆ да́же до ста́рости и҆ престарѣ́нїѧ, бж҃е мо́й, не ѡ҆ста́ви менѐ, до́ндеже возвѣщꙋ̀ мы́шцꙋ твою̀ ро́дꙋ всемꙋ̀ грѧдꙋ́щемꙋ, ѳ҃і. Си́лꙋ твою̀ и҆ пра́вдꙋ твою̀, бж҃е, да́же до вы́шнихъ, ꙗ҆̀же сотвори́лъ мѝ є҆сѝ вели̑чїѧ: бж҃е, кто̀ подо́бенъ тебѣ̀; к҃. Є҆ли̑ки ꙗ҆ви́лъ мѝ є҆сѝ скѡ́рби мнѡ́ги и҆ ѕлы̀; и҆ ѡ҆бра́щьсѧ ѡ҆животвори́лъ мѧ̀ є҆сѝ и҆ ѿ бе́зднъ землѝ возве́лъ мѧ̀ є҆сѝ. к҃а. Оу҆мно́жилъ є҆сѝ на мнѣ̀ вели́чествїе твоѐ, и҆ ѡ҆бра́щьсѧ ᲂу҆тѣ́шилъ мѧ̀ є҆сѝ, и҆ ѿ бе́зднъ землѝ па́ки возве́лъ мѧ̀ є҆сѝ. к҃в. И҆́бо а҆́зъ и҆сповѣ́мсѧ тебѣ̀ въ лю́дехъ, гдⷭ҇и, въ сосꙋ́дѣхъ ѱало́мскихъ и҆́стинꙋ твою̀, бж҃е: воспою̀ тебѣ̀ въ гꙋ́слехъ, ст҃ы́й і҆и҃левъ. к҃г. Возра́дꙋетѣсѧ ᲂу҆стнѣ̀ моѝ, є҆гда̀ воспою̀ тебѣ̀, и҆ дꙋша̀ моѧ̀, ю҆́же є҆сѝ и҆зба́вилъ: к҃д. Є҆ще́ же и҆ ѧ҆зы́къ мо́й ве́сь де́нь поꙋчи́тсѧ пра́вдѣ твое́й, є҆гда̀ постыдѧ́тсѧ и҆ посра́мѧтсѧ и҆́щꙋщїй ѕла̑ѧ мнѣ̀.

Ѡ҆ соломѡ́нѣ, ѱало́мъ дв҃дꙋ, ѻ҃а.

Бж҃е, сꙋ́дъ тво́й царе́ви да́ждь, и҆ пра́вдꙋ твою̀ сы́нꙋ царе́вꙋ: в҃. Сꙋди́ти лю́демъ твои̑мъ въ пра́вдѣ и҆ ни́щымъ твои̑мъ въ сꙋдѣ̀. г҃. Да воспрїи́мꙋтъ го́ры ми́ръ лю́демъ и҆ хо́лми пра́вдꙋ. д҃. Сꙋ́дитъ ни́щымъ людски̑мъ, и҆ спасе́тъ сы́ны ᲂу҆бо́гихъ, и҆ смири́тъ клеветника̀. є҃. И҆ пребꙋ́детъ съ со́лнцемъ, и҆ пре́жде лꙋны̀ ро́да родѡ́въ. ѕ҃. Сни́детъ ꙗ҆́кѡ до́ждь на рꙋно̀, и҆ ꙗ҆́кѡ ка́плѧ ка́плющаѧ на зе́млю. з҃. Возсїѧ́етъ во дне́хъ є҆гѡ̀ пра́вда и҆ мно́жество ми́ра, до́ндеже ѿи́метсѧ лꙋна̀. и҃. И҆ ѡ҆блада́етъ ѿ мо́рѧ до мо́рѧ, и҆ ѿ рѣ́къ до конє́цъ вселе́нныѧ. ѳ҃. Пред̾ ни́мъ припадꙋ́тъ є҆ѳїо́плѧне, и҆ вразѝ є҆гѡ̀ пе́рсть поли́жꙋтъ. і҃. Ца́рїе ѳарсі́йстїи и҆ ѻ҆́строви да́ры принесꙋ́тъ, ца́рїе а҆ра́встїи и҆ сава̀ да́ры приведꙋ́тъ: а҃і. И҆ покло́нѧтсѧ є҆мꙋ̀ всѝ ца́рїе зе́мстїи, всѝ ꙗ҆зы́цы порабо́таютъ є҆мꙋ̀. в҃і. Ꙗ҆́кѡ и҆зба́ви ни́ща ѿ си́льна, и҆ ᲂу҆бо́га, є҆мꙋ́же не бѣ̀ помо́щника. г҃і. Пощади́тъ ни́ща и҆ ᲂу҆бо́га, и҆ дꙋ́шы ᲂу҆бо́гихъ спасе́тъ: д҃і. Ѿ ли́хвы и҆ ѿ непра́вды и҆зба́витъ дꙋ́шы и҆́хъ, и҆ че́стно и҆́мѧ є҆гѡ̀ пред̾ ни́ми. є҃і. И҆ жи́въ бꙋ́детъ, и҆ да́стсѧ є҆мꙋ̀ ѿ зла́та а҆раві́йска: и҆ помо́лѧтсѧ ѡ҆ не́мъ вы́нꙋ, ве́сь де́нь бл҃гословѧ́тъ є҆го̀. ѕ҃і. Бꙋ́детъ ᲂу҆твержде́нїе на землѝ на версѣ́хъ го́ръ: превознесе́тсѧ па́че лїва́на пло́дъ є҆гѡ̀, и҆ процвѣтꙋ́тъ ѿ гра́да ꙗ҆́кѡ трава̀ земна́ѧ. з҃і. Бꙋ́детъ и҆́мѧ є҆гѡ̀ бл҃гослове́но во вѣ́ки, пре́жде со́лнца пребыва́етъ и҆́мѧ є҆гѡ̀: и҆ бл҃гословѧ́тсѧ въ не́мъ всѧ̑ кѡлѣ́на земна́ѧ, всѝ ꙗ҆зы́цы ᲂу҆блажа́тъ є҆го̀. и҃і. Бл҃гослове́нъ гдⷭ҇ь бг҃ъ і҆и҃левъ, творѧ́й чꙋдеса̀ є҆ди́нъ, ѳ҃і. И҆ бл҃гослове́но и҆́мѧ сла́вы є҆гѡ̀ во вѣ́къ и҆ въ вѣ́къ вѣ́ка: и҆ и҆спо́лнитсѧ сла́вы є҆гѡ̀ всѧ̀ землѧ̀: бꙋ́ди, бꙋ́ди.

Сла́ва:

Ѡ҆скꙋдѣ́ша пѣ̑сни дв҃да, сы́на і҆ессе́ова.

Ѱало́мъ а҆са́фꙋ, ѻ҃в.

Ко́ль бл҃гъ бг҃ъ і҆и҃левъ пра̑вымъ се́рдцемъ. в҃. Мои́ же вма́лѣ не подвижа́стѣсѧ но́зѣ: вма́лѣ не пролїѧ́шасѧ стопы̑ моѧ̑: г҃. Ꙗ҆́кѡ возревнова́хъ на беззакѡ́нныѧ, ми́ръ грѣ́шникѡвъ зрѧ̀: д҃. Ꙗ҆́кѡ нѣ́сть восклоне́нїѧ въ сме́рти и҆́хъ и҆ ᲂу҆твержде́нїѧ въ ра́нѣ и҆́хъ: є҃. Въ трꙋдѣ́хъ человѣ́ческихъ не сꙋ́ть, и҆ съ человѣ́ки не прїи́мꙋтъ ра́нъ. ѕ҃. Сегѡ̀ ра́ди ᲂу҆держа̀ ѧ҆̀ горды́нѧ и҆́хъ до конца̀: ѡ҆дѣ́ѧшасѧ непра́вдою и҆ нече́стїемъ свои́мъ. з҃. И҆зы́детъ ꙗ҆́кѡ и҆з̾ тꙋ́ка непра́вда и҆́хъ: преидо́ша въ любо́вь се́рдца. и҃. Помы́слиша и҆ глаго́лаша въ лꙋка́вствѣ, непра́вдꙋ въ высотꙋ̀ глаго́лаша: ѳ҃. Положи́ша на небесѝ ᲂу҆ста̀ своѧ̑, и҆ ѧ҆зы́къ и҆́хъ пре́йде по землѝ. і҃. Сегѡ̀ ра́ди ѡ҆братѧ́тсѧ лю́дїе моѝ сѣ́мѡ, и҆ дні́е и҆спо́лнени ѡ҆брѧ́щꙋтсѧ въ ни́хъ. а҃і. И҆ рѣ́ша: ка́кѡ ᲂу҆вѣ́дѣ бг҃ъ; и҆ а҆́ще є҆́сть ра́зꙋмъ въ вы́шнѣмъ; в҃і. Сѐ, сі́и грѣ̑шницы и҆ гобзꙋ́ющїи въ вѣ́къ ᲂу҆держа́ша бога́тство. г҃і. И҆ рѣ́хъ: ꙾є҆да̀^[1] всꙋ́е ѡ҆правди́хъ се́рдце моѐ и҆ ᲂу҆мы́хъ въ непови́нныхъ рꙋ́цѣ моѝ, д҃і. И҆ бы́хъ ꙗ҆́звенъ ве́сь де́нь, и҆ ѡ҆бличе́нїе моѐ на ᲂу҆́треннихъ; є҃і. А҆́ще глаго́лахъ, повѣ́мъ та́кѡ: ꙾сѐ, ро́дꙋ сынѡ́въ твои́хъ, є҆мꙋ́же ѡ҆бѣща́хсѧ꙾^[2]: ѕ҃і. И҆ непщева́хъ разꙋмѣ́ти: сїѐ трꙋ́дъ є҆́сть предо мно́ю, з҃і. До́ндеже вни́дꙋ во ст҃и́ло бж҃їе и҆ разꙋмѣ́ю въ послѣ̑днѧѧ и҆́хъ. и҃і. Ѻ҆ба́че за льщє́нїѧ и҆́хъ положи́лъ є҆сѝ и҆̀мъ ѕла̑ѧ, низложи́лъ є҆сѝ ѧ҆̀, внегда̀ разгордѣ́шасѧ. ѳ҃і. Ка́кѡ бы́ша въ запꙋстѣ́нїе; внеза́пꙋ и҆счезо́ша, погибо́ша за беззако́нїе своѐ. к҃. Ꙗ҆́кѡ со́нїе востаю́щагѡ, гдⷭ҇и, во гра́дѣ твое́мъ ѡ҆́бразъ и҆́хъ ᲂу҆ничижи́ши. к҃а. Ꙗ҆́кѡ разжже́сѧ се́рдце моѐ, и҆ ᲂу҆трѡ́бы моѧ̑ и҆змѣни́шасѧ: к҃в. И҆ а҆́зъ ᲂу҆ничиже́нъ, и҆ не разꙋмѣ́хъ, ско́тенъ бы́хъ ᲂу҆ тебє̀. к҃г. И҆ а҆́зъ вы́нꙋ съ тобо́ю: ᲂу҆держа́лъ є҆сѝ рꙋ́кꙋ деснꙋ́ю мою̀, к҃д. И҆ совѣ́томъ твои́мъ наста́вилъ мѧ̀ є҆сѝ, и҆ со сла́вою прїѧ́лъ мѧ̀ є҆сѝ. к҃є. Что́ бо мѝ є҆́сть на нб҃сѝ; и҆ ѿ тебє̀ что̀ восхотѣ́хъ на землѝ; к҃ѕ. И҆счезѐ се́рдце моѐ и҆ пло́ть моѧ̀, бж҃е се́рдца моегѡ̀, и҆ ча́сть моѧ̀, бж҃е, во вѣ́къ. к҃з. Ꙗ҆́кѡ сѐ, ᲂу҆далѧ́ющїи себѐ ѿ тебє̀ поги́бнꙋтъ: потреби́лъ є҆сѝ всѧ́каго любодѣ́ющаго ѿ тебє̀. к҃и. Мнѣ́ же прилѣплѧ́тисѧ бг҃ови бла́го є҆́сть, полага́ти на гдⷭ҇а ᲂу҆пова́нїе моѐ, возвѣсти́ти мѝ всѧ̑ хвалы̑ твоѧ̑, во вратѣ́хъ дще́ре сїѡ́ни.

Ра́зꙋма а҆са́фꙋ, ѻ҃г.

Вскꙋ́ю, бж҃е, ѿри́нꙋлъ є҆сѝ до конца̀; разгнѣ́васѧ ꙗ҆́рость твоѧ̀ на ѻ҆́вцы па́жити твоеѧ̀; в҃. Помѧнѝ со́нмъ тво́й, є҆го́же стѧжа́лъ є҆сѝ и҆спе́рва, и҆зба́вилъ є҆сѝ жезло́мъ достоѧ́нїѧ твоегѡ̀, гора̀ сїѡ́нъ сїѧ̀꙾^[3], въ не́йже всели́лсѧ є҆сѝ. г҃. Воздви́гни рꙋ́цѣ твоѝ на горды̑ни и҆́хъ въ коне́цъ, є҆ли̑ка лꙋка́внова вра́гъ во ст҃ѣ́мъ твое́мъ. д҃. И҆ восхвали́шасѧ ненави́дѧщїи тѧ̀ посредѣ̀ пра́здника твоегѡ̀: положи́ша зна́мєнїѧ своѧ̑ зна́мєнїѧ, и҆ не позна́ша, є҃. Ꙗ҆́кѡ во и҆схо́дѣ превы́ше: ꙗ҆́кѡ въ дꙋбра́вѣ дре́вѧнѣ сѣки́рами разсѣко́ша ѕ҃. Двє́ри є҆гѡ̀ вкꙋ́пѣ, сѣ́чивомъ и҆ ѻ҆ско́рдомъ разрꙋши́ша и҆̀. з҃. Возжго́ша ѻ҆гне́мъ ст҃и́ло твоѐ: на землѝ ѡ҆скверни́ша жили́ще и҆́мене твоегѡ̀. и҃. Рѣ́ша въ се́рдцы свое́мъ ю҆́жики и҆́хъ вкꙋ́пѣ: прїиди́те, и҆ ѿста́вимъ всѧ̑ пра́здники бж҃їѧ ѿ землѝ. ѳ҃. ꙾Зна́мєнїѧ и҆́хъ꙾^[4] не ви́дѣхомъ: нѣ́сть ктомꙋ̀ прⷪ҇ро́ка, и҆ на́съ не позна́етъ ктомꙋ̀. і҃. Доко́лѣ, бж҃е, поно́ситъ вра́гъ; раздражи́тъ проти́вный и҆́мѧ твоѐ до конца̀; а҃і. Вскꙋ́ю ѿвраща́еши рꙋ́кꙋ твою̀ и҆ десни́цꙋ твою̀ ѿ среды̀ нѣ́дра твоегѡ̀ въ коне́цъ; в҃і. Бг҃ъ же, цр҃ь на́шъ, пре́жде вѣ́ка содѣ́ла сп҃се́нїе посредѣ̀ землѝ. г҃і. Ты̀ ᲂу҆тверди́лъ є҆сѝ си́лою твое́ю мо́ре: ты̀ сте́рлъ є҆сѝ главы̑ ѕмїє́въ въ водѣ̀: д҃і. Ты̀ сокрꙋши́лъ є҆сѝ главꙋ̀ ѕмі́евꙋ, да́лъ є҆сѝ того̀ бра́шно лю́демъ є҆ѳїѡ́пскимъ. є҃і. Ты̀ расто́рглъ є҆сѝ и҆сто́чники и҆ пото́ки: ты̀ и҆зсꙋши́лъ є҆сѝ рѣ́ки и҆ѳа̑мскїѧ. ѕ҃і. Тво́й є҆́сть де́нь, и҆ твоѧ̀ є҆́сть но́щь: ты̀ соверши́лъ є҆сѝ зарю̀ и҆ со́лнце. з҃і. Ты̀ сотвори́лъ є҆сѝ всѧ̑ предѣ́лы землѝ: жа́твꙋ и҆ ве́снꙋ ты̀ созда́лъ є҆сѝ ѧ҆̀. и҃і. Помѧнѝ сїѧ̑: вра́гъ поносѝ гдⷭ҇еви, и҆ лю́дїе безꙋ́мнїи раздражи́ша и҆́мѧ твоѐ. ѳ҃і. Не преда́ждь ѕвѣрє́мъ дꙋ́шꙋ и҆сповѣ́дающꙋюсѧ тебѣ̀: дꙋ́шъ ᲂу҆бо́гихъ твои́хъ не забꙋ́ди до конца̀. к҃. При́зри на завѣ́тъ тво́й: ꙗ҆́кѡ и҆спо́лнишасѧ помраче́ннїи землѝ домѡ́въ беззако́нїй. к҃а. Да не возврати́тсѧ смире́нный посра́мленъ: ни́щъ и҆ ᲂу҆бо́гъ восхвали́та и҆́мѧ твоѐ. к҃в. Воста́ни, бж҃е, сꙋдѝ прю̀ твою̀: помѧнѝ поноше́нїе твоѐ, є҆́же ѿ безꙋ́мнагѡ ве́сь де́нь. к҃г. Не забꙋ́ди гла́са моли́твєнникъ твои́хъ: горды́нѧ ненави́дѧщихъ тѧ̀ ꙾взы́де вы́нꙋ꙾^[5].

Сла́ва:

Въ коне́цъ, да не растли́ши,
ѱало́мъ пѣ́сни а҆са́фꙋ, ѻ҃д.

И҆сповѣ́мысѧ тебѣ̀, бж҃е, и҆сповѣ́мысѧ тебѣ̀ и҆ призове́мъ и҆́мѧ твоѐ: повѣ́мъ всѧ̑ чꙋдеса̀ твоѧ̑. г҃. Є҆гда̀ прїимꙋ̀ вре́мѧ, а҆́зъ правѡты̀ возсꙋждꙋ̀. д҃. Раста́ѧсѧ землѧ̀ и҆ всѝ живꙋ́щїи на не́й, а҆́зъ ᲂу҆тверди́хъ столпы̀ є҆ѧ̀. є҃. Рѣ́хъ беззако́ннꙋющымъ, не беззако́ннꙋйте: и҆ согрѣша́ющымъ, не возноси́те ро́га. ѕ҃. Не воздвиза́йте на высотꙋ̀ ро́га ва́шегѡ и҆ не глаго́лите на бг҃а непра́вдꙋ: з҃. Ꙗ҆́кѡ нижѐ ѿ и҆схѡ́дъ, нижѐ и҆ за̑падъ, нижѐ ѿ пꙋсты́хъ го́ръ. и҃. Ꙗ҆́кѡ бг҃ъ сꙋдїѧ̀ є҆́сть: сего̀ смирѧ́етъ, и҆ сего̀ возно́ситъ. ѳ҃. Ꙗ҆́кѡ ча́ша въ рꙋцѣ̀ гдⷭ҇ни, вїна̀ нерастворе́на и҆спо́лнь растворе́нїѧ, и҆ ᲂу҆клонѝ ѿ сеѧ̀ въ сїю̀: ѻ҆ба́че дро́ждїе є҆гѡ̀ не и҆стощи́сѧ, и҆спїю́тъ всѝ грѣ́шнїи землѝ. і҃. А҆́зъ же возра́дꙋюсѧ въ вѣ́къ, воспою̀ бг҃ꙋ і҆а́кѡвлю: а҃і. И҆ всѧ̑ ро́ги грѣ́шныхъ сломлю̀, и҆ вознесе́тсѧ ро́гъ првⷣнагѡ.

Въ коне́цъ, въ пѣ́снехъ,
ѱало́мъ а҆са́фꙋ, пѣ́снь ко а҆ссѷрі́анинꙋ, ѻ҃є.

Вѣ́домъ во і҆ꙋде́и бг҃ъ: во і҆и҃ли ве́лїе и҆́мѧ є҆гѡ̀. г҃. И҆ бы́сть въ ми́рѣ мѣ́сто є҆гѡ̀, и҆ жили́ще є҆гѡ̀ въ сїѡ́нѣ. д҃. Та́мѡ сокрꙋшѝ крѣ́пѡсти лꙋкѡ́въ, ѻ҆рꙋ́жїе и҆ ме́чь и҆ бра́нь. є҃. Просвѣща́еши ты̀ ди́внѡ ѿ го́ръ вѣ́чныхъ. ѕ҃. Смѧто́шасѧ всѝ неразꙋ́мнїи се́рдцемъ: ᲂу҆снꙋ́ша сно́мъ свои́мъ, и҆ ничто́же ѡ҆брѣто́ша всѝ мꙋ́жїе бога́тства въ рꙋка́хъ свои́хъ. з҃. Ѿ запреще́нїѧ твоегѡ̀, бж҃е і҆а́кѡвль, воздрема́ша всѣ́дшїи на ко́ни. и҃. Ты̀ стра́шенъ є҆сѝ, и҆ кто̀ противоста́нетъ тебѣ̀; ѿто́лѣ гнѣ́въ тво́й. ѳ҃. Съ нб҃сѐ слы́шанъ сотвори́лъ є҆сѝ сꙋ́дъ: землѧ̀ ᲂу҆боѧ́сѧ и҆ ᲂу҆молча̀, і҃. Внегда̀ воста́ти на сꙋ́дъ бг҃ꙋ, сп҃стѝ всѧ̑ крѡ́ткїѧ землѝ. а҃і. Ꙗ҆́кѡ помышле́нїе человѣ́ческое и҆сповѣ́стсѧ тебѣ̀, и҆ ѡ҆ста́нокъ помышле́нїѧ пра́зднꙋетъ тѝ. в҃і. Помоли́тесѧ и҆ воздади́те гдⷭ҇еви бг҃ꙋ на́шемꙋ: всѝ, и҆̀же ѡ҆́крестъ є҆гѡ̀, принесꙋ́тъ да́ры г҃і. Стра́шномꙋ и҆ ѿе́млющемꙋ дꙋ́хи кнѧзе́й, стра́шномꙋ па́че царе́й земны́хъ.

Въ коне́цъ, ѡ҆ і҆дїѳꙋ́мѣ,
ѱало́мъ а҆са́фꙋ, ѻ҃ѕ.

Гла́сомъ мои́мъ ко гдⷭ҇ꙋ воззва́хъ, гла́сомъ мои́мъ къ бг҃ꙋ, и҆ внѧ́тъ мѝ. г҃. Въ де́нь ско́рби моеѧ̀ бг҃а взыска́хъ рꙋка́ма мои́ма, но́щїю пред̾ ни́мъ, и҆ не прельще́нъ бы́хъ: ѿве́ржесѧ ᲂу҆тѣ́шитисѧ дꙋша̀ моѧ̀. д҃. Помѧнꙋ́хъ бг҃а и҆ возвесели́хсѧ, ꙾поглꙋмлѧ́хсѧ꙾^[6], и҆ малодꙋ́шствоваше дꙋ́хъ мо́й. є҃. Предвари́стѣ стражбы̑ ѻ҆́чи моѝ: смѧто́хсѧ и҆ не глаго́лахъ. ѕ҃. Помы́слихъ дни̑ пє́рвыѧ, и҆ лѣ̑та вѣ̑чнаѧ помѧнꙋ́хъ, и҆ поꙋча́хсѧ: з҃. Но́щїю се́рдцемъ мои́мъ ꙾глꙋмлѧ́хсѧ, и҆ тꙋжа́ше꙾^[7] дꙋ́хъ мо́й: и҃. Є҆да̀ во вѣ́ки ѿри́нетъ гдⷭ҇ь и҆ не приложи́тъ бл҃говоли́ти па́ки; ѳ҃. И҆лѝ до конца̀ млⷭ҇ть свою̀ ѿсѣче́тъ, сконча̀ глаго́лъ ѿ ро́да въ ро́дъ; і҃. Є҆да̀ забꙋ́детъ ᲂу҆ще́дрити бг҃ъ; и҆лѝ ᲂу҆держи́тъ во гнѣ́вѣ свое́мъ щедрѡ́ты своѧ̑; а҃і. И҆ рѣ́хъ: ны́нѣ нача́хъ, сїѧ̀ и҆змѣ́на десни́цы вы́шнѧгѡ. в҃і. Помѧнꙋ́хъ дѣла̀ гдⷭ҇нѧ: ꙗ҆́кѡ помѧнꙋ̀ ѿ нача́ла чꙋдеса̀ твоѧ̑, г҃і. И҆ поꙋчꙋ́сѧ во всѣ́хъ дѣ́лѣхъ твои́хъ, и҆ въ начина́нїихъ твои́хъ ꙾поглꙋмлю́сѧ꙾^[8]. д҃і. Бж҃е, во ст҃ѣ́мъ пꙋ́ть тво́й: кто̀ бг҃ъ ве́лїй, ꙗ҆́кѡ бг҃ъ на́шъ; є҃і. Ты̀ є҆сѝ бг҃ъ творѧ́й чꙋдеса̀: сказа́лъ є҆сѝ въ лю́дехъ си́лꙋ твою̀, ѕ҃і. И҆зба́вилъ є҆сѝ мы́шцею твое́ю лю́ди твоѧ̑, сы́ны і҆а̑кѡвли и҆ і҆ѡ́сифѡвы. з҃і. Ви́дѣша тѧ̀ во́ды, бж҃е, ви́дѣша тѧ̀ во́ды и҆ ᲂу҆боѧ́шасѧ: смѧто́шасѧ бє́здны. и҃і. Мно́жество шꙋ́ма во́дъ: гла́съ да́ша ѻ҆́блацы, и҆́бо стрѣ́лы твоѧ̑ прехо́дѧтъ. ѳ҃і. Гла́съ гро́ма твоегѡ̀ въ колесѝ, ѡ҆свѣти́ша мѡ́лнїѧ твоѧ̑ вселе́ннꙋю: подви́жесѧ и҆ тре́петна бы́сть землѧ̀. к҃. Въ мо́ри пꙋтїѐ твоѝ, и҆ стєзѝ твоѧ̑ въ вода́хъ мно́гихъ, и҆ слѣды̀ твоѝ не позна́ютсѧ. к҃а. Наста́вилъ є҆сѝ ꙗ҆́кѡ ѻ҆́вцы лю́ди твоѧ̑ рꙋко́ю мѡѷсе́овою и҆ а҆арѡ́нею.

Сла́ва:

По і҃-й каѳі́смѣ, Трист҃о́е. И҆ по Ѻ҆́ч҃е на́шъ:
Та́же тропарѝ, гла́съ ѕ҃:

Стра́шнагѡ днѐ прише́ствїѧ твоегѡ̀ ꙳ ᲂу҆жаса́юсѧ хрⷭ҇тѐ, ꙳ и҆ неꙋмы́тнагѡ сꙋди́лища боѧ́сѧ гдⷭ҇и, ꙳ ᲂу҆жаса́юсѧ и҆ трепе́щꙋ, ꙗ҆́кѡ и҆мы́й мно́жество согрѣше́нїй: ꙳ но пре́жде конца̀ ꙗ҆́кѡ млⷭ҇тивъ бг҃ъ ꙳ ѡ҆братѝ, и҆ сп҃си́ мѧ сп҃се мо́й многомлⷭ҇тиве.

Сла́ва: Є҆гда̀ престо́ли на сꙋ́дъ поста́вѧтсѧ гдⷭ҇и, ꙳ и҆ сꙋди́лищꙋ твоемꙋ̀ предста́нꙋтъ человѣ́цы: ꙳ не предпочте́тсѧ ца́рь во́ина, ꙳ не преимꙋ́ществитъ влады́ка раба̀: ꙳ кі́йждо бо ѿ свои́хъ дѣ́лъ ꙳ и҆лѝ просла́витсѧ, и҆лѝ постыди́тсѧ.

И҆ ны́нѣ: Вели́кихъ дарова́нїй чⷭ҇таѧ дв҃о бг҃омт҃и, ꙳ ты̀ сподо́биласѧ є҆сѝ: ꙳ ꙗ҆́кѡ родила̀ є҆сѝ пло́тїю є҆ди́наго ѿ трⷪ҇цы, хрⷭ҇та̀ жизнода́вца, ꙳ во сп҃се́нїе дꙋ́шъ на́шихъ.

Гдⷭ҇и поми́лꙋй, м҃. и҆ мл҃тва:

Гдⷭ҇и бж҃е на́шъ, въ млⷭ҇ти бога́тый, и҆ въ щедро́тахъ непостижи́мый, є҆ди́не по є҆стествꙋ̀ безгрѣ́шенъ, и҆ на́съ ра́ди кромѣ̀ грѣха̀ бы́въ человѣ́къ, ᲂу҆слы́ши въ ча́съ се́й болѣ́зненное моѐ сїѐ моле́нїе, ꙗ҆́кѡ ни́щъ и҆ ᲂу҆бо́гъ є҆́смь ѿ дѣ́лъ бл҃ги́хъ, и҆ се́рдце моѐ смѧте́сѧ внꙋ́трь менѐ. Ты́ бо вѣ́си вы́шнїй цр҃ю̀, гдⷭ҇и нб҃сѐ и҆ землѝ, ꙗ҆́кѡ всю̀ мою̀ ю҆́ность во грѣсѣ́хъ и҆жди́хъ: и҆ въ слѣ́дъ похоте́й пло́ти моеѧ̀ ходи́въ, ве́сь смѣ́хъ де́монѡмъ бы́хъ, ве́сь дїа́волꙋ послѣ́довахъ вы́нꙋ, въ тимѣ́нїи сласте́й валѧ́ѧйсѧ. Ѡ҆мрачи́всѧ бо помышле́нїемъ ѿ младе́нства да́же и҆ до ны́нѣ, никогда́же восхотѣ́хъ сотвори́ти во́лю твою̀ ст҃ꙋ́ю: но ве́сь ѿ навѣ́тꙋющихъ мѧ̀ страсте́й плѣни́всѧ, смѣ́хъ и҆ порꙋга́нїе де́монѡмъ бы́хъ, ника́коже во ᲂу҆мѣ̀ помышлѧ́ѧй, ꙗ҆́кѡ нестерпи́мый гнѣ́въ є҆́же на грѣ́шники преще́нїѧ твоегѡ̀, и҆ лежа́щꙋю гее́ннꙋ ѻ҆́гненнꙋю. Ꙗ҆́коже ѿсю́дꙋ во ѿча́ѧнїе впады́й, и҆ ника́коже въ чꙋ́вствѣ ѡ҆браще́нїѧ бы́въ, пꙋ́стъ и҆ на́гъ є҆́же ѿ твоеѧ̀ дрꙋ́жбы бы́хъ. Кі́й бо ви́дъ грѣха̀ не содѣ́лахъ; ко́е дѣ́ло де́мѡнское не содѣ́ѧхъ; ко́е дѣѧ́нїе стꙋ́дное и҆ блꙋ́дное не съ преимꙋ́ществомъ и҆ тща́нїемъ соверши́хъ; ᲂу҆́мъ воспомина́ньми плотски́ми ѡ҆скверни́хъ, тѣ́ло смѣше́ньми ѡ҆калѧ́хъ, дꙋ́хъ сосложе́нїемъ ѡ҆скверни́хъ: всѧ́къ ᲂу҆́дъ ѻ҆каѧ́нныѧ моеѧ̀ пло́ти слꙋжи́ти и҆ рабо́тати грѣхѡ́мъ возлюби́хъ. И҆ кто̀ про́чее не возрыда́етъ мѧ̀ ѻ҆каѧ́ннаго; кто̀ не воспла́четъ мѧ̀ ѡ҆сꙋжде́ннаго; а҆́зъ бо є҆ди́нъ, влⷣко, ꙗ҆́рость твою̀ прогнѣ́вахъ: а҆́зъ є҆ди́нъ гнѣ́въ тво́й на мѧ̀ разжего́хъ: а҆́зъ є҆ди́нъ лꙋка́вое пред̾ тобо́ю сотвори́хъ, превозше́дъ и҆ препобѣди́въ всѧ̑ ѿ вѣ́ка грѣ́шники, несравне́ннѡ погрѣши́вый, и҆ непроще́ннѡ. Но поне́же многомлⷭ҇тивый и҆ бл҃гоꙋтро́бный є҆сѝ чл҃вѣколю́бче, и҆ ѡ҆жида́еши человѣ́ческагѡ ѡ҆браще́нїѧ: сѐ и҆ а҆́зъ вверга́ю себѐ пред̾ стра́шное и҆ нестерпи́мое твоѐ сꙋди́ще, и҆ ꙗ҆́коже пречⷭ҇тымъ твои̑мъ нога́мъ каса́ѧйсѧ, и҆з̾ глꙋбины̀ дꙋшѝ взыва́ю тѝ: ѡ҆чи́сти гдⷭ҇и, простѝ бл҃гопремѣни́телю, поми́лꙋй не́мощь мою̀, приклони́сѧ недоꙋмѣ́нїю моемꙋ̀, вонмѝ моле́нїю моемꙋ̀, и҆ сле́зъ мои́хъ не премолчѝ. прїими́ мѧ ка́ющагосѧ, и҆ заблꙋ́ждшаго ѡ҆братѝ: ѡ҆браща́ющагосѧ ѡ҆б̾имѝ, и҆ молѧ́щагосѧ простѝ. Не бо̀ положи́лъ є҆сѝ покаѧ́нїе пра́вєднымъ, не положи́лъ є҆сѝ проще́нїе несогрѣша́ющымъ: но положи́лъ є҆сѝ покаѧ́нїе мнѣ̀ грѣ́шномꙋ, въ ни́хже въ негодова́нїе твоѐ содѣ́ѧхъ. на́гъ и҆ ѡ҆бнаже́нъ пред̾ тобо́ю предстою̀, сердцевѣ́дче гдⷭ҇и, и҆сповѣ́даѧй моѧ̑ грѣхѝ: не бо̀ могꙋ̀ воззрѣ́ти и҆ ви́дѣти высотꙋ̀ нбⷭ҇нꙋю, ѿ тѧ́жести грѣхѡ́въ мои́хъ слѧца́емь. Просвѣтѝ ᲂу҆́бѡ ѻ҆́чи се́рдца моегѡ̀, и҆ да́ждь мѝ ᲂу҆миле́нїе къ покаѧ́нїю и҆ сокрꙋше́нїе се́рдца ко и҆справле́нїю: да со бл҃го́ю наде́ждею, и҆ и҆́стиннымъ ᲂу҆вѣре́нїемъ, къ та́мошнемꙋ мі́рꙋ пойдꙋ̀, хвалѧ̀ и҆ бл҃гословѧ̀ вы́нꙋ всест҃о́е и҆́мѧ твоѐ, ѻ҆ц҃а̀, и҆ сн҃а, и҆ ст҃а́гѡ дх҃а, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

---

1. ꙾ᲂу҆́бѡ
2. ꙾сѐ, ро́дꙋ сынѡ́въ твои́хъ престꙋпи́хъ꙾
3. ꙾же́злъ достоѧ́нїѧ твоегѡ̀, го́рꙋ сїѡ́нъ сїю
4. ꙾зна́менїй на́шихъ꙾
5. ꙾да восхо́дитъ вы́нꙋ (къ тебѣ̀)꙾
6. ꙾размышлѧ́хъ꙾
7. ꙾размышлѧ́хъ, и҆ и҆спы́товаше꙾
8. ꙾размышлѧ́ти бꙋ́дꙋ꙾

This is a translation and has a separate copyright status from the original text. The license for the translation applies to this edition only.
Original:
Translation: