Бына шулай.
Һин ирекле ҡатын.
Һин азатһың уны һөйөүҙән.
Ул ғына, тип,
Уйға уйылыуҙан,
Уның өсөн янып-көйөүҙән.
Һин азатһың,
Ул башҡаны һөйә,
Башҡа берәү тиеп йән ата.
Башҡа менән
Йәшерен осрашыуҙар
Йөрәк башҡайҙарын
Ҡаната.
Һин азатһың!
Был донъяла бер кем
Баһаламаҫ һинең барлыҡты,
Үҙ-үҙеңде әгәр һөймәһәң һин,
Мөхәббәттән күреп
Тарлыҡты.
Һин азатһың,
Тотош оло донъя
Күҙҙәреңә ҡарай
Мөлдөрәп:
-Һөй һәм һөйөл!
Башҡа дауа юҡ,– тип
Күҙ йәштәрең аша көлдөрә.
