Ӝожо-мыжо улӥськомы (Удмурт ныл)

Ӝожо-мыжо улӥськомы
Автор: Удмурт ныл

Источник: Гудыри : газет. — 1926. — № 60. — 3-тӥ бам.

Ӝожо-мыжо улӥськомы

Ялам тазьы улӥськом,
Улон азьмес ватсаськом.
Начар улыны туж ӝожкыт,
Ситэк ютэк туж секыт.
Курадӟиськом.
Ситэк ютэк улыса,
Кимы пыдмы дышыса,
Нокинлы вератэк
Лушкаськыны дышиськом.
Малпаськытэк.
Ас улэммес малпаса,
Ми улӥськом куректыса.
Ялам тазьы улӥськом
Улонмес ортчытӥськом.
Куректыса.
Куанер улын туж ӝожкыт
Даур ортче туж секыт.
Куанерез жалясь ӧвӧл
Чапкись мыжгись гинэ вань.
Палэнтыло.
Ас кӧт ӝожмес буйгатӥськом.
Асьме кылмес кырӟаса;
Ас сюлэммес сӥятӥськом,
Пӧсь синкыли кисьтыса.
Чидатскиськом.
Огыр, Педя, — кыкнамы
Кырӟаса но бӧрдыса,
Ас улонмес ортчытӥськом,
Выль улон но утчаськом.
Тыршылӥськом.
Тӧл ортчыса, тулыс вуэ,
Гужем вуса, калык выре.
Калык кутске ужаны,
Ми кутскиськом кырӟаны.
Буйгатӥськом.
Калык потоз луд выре,
Ми кылёмы тэль дуре.
Отчы-татчы учкыса,
Ми огнамы кылёмы…
Мӧзмыса.
Ас кылынымы кырӟаса,
Кӧт сюлэммес ӝожтыса, —
Озьы ортче даурмы,
Секыт улон вакытмы.
Курадӟыса.
Ялам тазьы улыса,
Ас улонмес ватсаса,
Начар улны туж ӝожкыт,
Ситэк ютэк туж секыт.
Юрттэлэ!

This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:

it was anonymously published before January 1, 1954 (more than 70 years ago).

This work is in the public domain in the United States because it was published before January 1, 1929 (more than 95 years ago).

This anonymous or pseudonymous work is also in the public domain in other countries and areas where the copyright term of anonymous or pseudonymous works is 97 years or less since publication.