ئای دلێ من ئای دلۆ
دل ژ من ناکت خەیالان
بوومە پەروانا شەمالان
بێرییا حوسن و جەمالان
ئای دلێ من ئای دلۆ
جان فریتم تە نەبینم
دەفتەرا عشقێ بخوینم
سەرخوەش و سەکران و دینم
ئای دلێ من ئای دلۆ
سەرخوەش و سەکران و مەستم
ئەفعالێ ئەسوەد د گەستم
سەبر و ئارام چوون ژ دەستم
ئای دلێ من ئای دلۆ
سەبر و ئارام و سکوونە
بازیێ ناڤ لێ عیوونە
دل ژ پەنجان کربوو خوونە
ئای دلێ من ئای دلۆ
بازیێ مەکرێ سکەنجە
گرتبووم ئەز ب هەردو پەنجە
من مدام دل ژێ ب دەنجە
ئای دلێ من ئای دلۆ
هێسترم بارین ژ خوینێ
سۆتم ئەز دەردێ ئەڤینێ
کەس ژ من ناکت یەقینێ
ئای دلێ من ئای دلۆ
داغ و کۆڤان بێ حسابن
محنەت و ئێش و عەزابن
غەم ژ قەلبێ من ڤەنابن
ئای دلێ من ئای دلۆ
ڤان غەمان یەکجاری خوارم
دین کرم دینێ ب هەوارم
ئاگرێ عشقێ بژارم
ئای دلێ من ئای دلۆ
ئاگرێ عشقێ ئو پێتە
هەر کەسێ دی کەس نەڤێتە
دەمەکی ناکت تەبێتە
ئای دلێ من ئای دلۆ
دەمەکی ناکت قرارە
شەڤ و رۆژ ئاهی ئو زارە
ئەز خلاس بووم ، بوومە دارە
ئای دلێ من ئای دلۆ
رەئیو تەکبیرم خلاس بوون
زلف چوگان چەپ و راست بوون
گلە و گازن بێ قیاس بوون
ئای دلێ من ئای دلۆ
سینەیا حوببێ هەرشتە
ب ئاگرێ عشقێ برشتە
قەت ل من نائێن نڤشتە
ئای دلێ من ئای دلۆ
سینەیا حوببێ سدوورە
داغ ب دل کۆڤان کوورە
وان هەمییان دل ژێ نوورە
ئای دلێ من ئای دلۆ
هەمییان ئاگر د ناڤ بیت
من ژ داغا دل زراڤ بیت
بێ حساب شیشە د ناڤ بیت
ئای دلێ من ئای دلۆ
بێ حساب شیش لێ کشاندە
هوورکر و مسک لێ رەشاندە
نەزەرا زەر شەڤ شاندە
ئای دلێ من ئای دلۆ
نەزەرا ساحب نەزیرا
تەشبیهی بەرقێ د شیرا
دامە سەر گەزمێ د تیرا
ئای دلێ من ئای دلۆ
گەزمەیا جەرگ و هناڤان
هوورترا ئەژنۆ ئو گاڤان
تار و مار کربووم ژ راڤان
ئای دلێ من ئای دلۆ
تارومار کر جان و جسمە
پسیارن جیران و خزمە
ئەڤ علەت بابەت تلسمە
ئای دلێ من ئای دلۆ
«میم و حێ» وەسفێ خوە هلدا
خوەش مسالن چوون د جلدا
جەرح و کۆڤان چوون د دلدا
ئای دلێ من ئای دلۆ
|
This work was published before January 1, 1929, and is in the public domain worldwide because the author died at least 100 years ago. |