ئیرۆ وەرن لێزم وەرن (II)
| هوون وەرن، لێزم وەرن؛ جیران و خەلقێ هێشەتێ | هوون رایەکێ تەدبیر بکن؛ ئیرۆ قەوی گریا مە تێ |
| ئیرۆ قەوی تێتن گرین؛ سووسن ل مێرگا غەییرین | سەد حەیفە لێڤێن شەککرین؛ ئێدی ڤەناخون شەربەتێ |
| لێڤێن د لەعلین و شەکەر؛ کێم بوون ژ وان دورر و خەبەر | سەد ئاهـ و کۆڤان و کەسەر؛ کو عەلی چوویە هجرەتێ |
| حەیفە عەلی ژێ بوو جودا؛ حوزن و گرین دیسا تە دا | ئەم رازینە ب ئەمرێ خودا؛ هەرچی ژ دەرگاهێ تە تێ |
| هەرچی دکت ئەو میر دکت؛ خەیر و شەڕان تەقدیر دکت | داغا د قەلبان پوڕ دکت؛ سۆتم ب نارێ فرقەتێ |
| سۆتم ب پێتا ئاگری؛ ڤێ فانیێ ئەم ژ هەڤ کری | هندی خۆشە کول مام دلی؛ دۆست چوویە چەرخا عادەتێ |
| دۆست چوو چەرخا عادەت ئەمان؛ وان گەلەکی مەحبووب رەڤان | جان وی د نێڤ ئاخێ نهان؛ ئەی فەلەکێ بێ مۆهلەتێ |
| فەلەکا بێ ئیعتباری؛ پاشی وان چاڤێن خوماری | من ب تە نینن چو یاری؛ پاشی خالا جەبهەتێ |
| پاشی وان خال و نیشانا؛ قەت نەما بێهنا رەیحانا | ژ محنەت و ئێشان و ژانا؛ تێ ژ نارێ فرقەتێ |
| فرقەتا وی هەر ب زەربە؛ دائما ئێشان و کەربە | ئێ کو دێ زانی چ حەربە؛ من ژ خەوفا خەو نە تێ |
| من شەڤان خەو لێ تونینە؛ ب ئاگەهـ و ئێشا نەهینە | دائما تێتن گرینە؛ قەت ل سەر کەس ئەو نە تێ |
| کوورتکا کوورە و سارە؛ مەقبەرا تێدە کو مارە | تە ل من حەڕماندی یارە؛ چیچەکا کی دەست کەتێ |
| چیچەکا کانی و ئاڤ لێ؛ سووسنا دائیم خوناڤ لێ | هەردەما نێچیر و راڤ لێ؛ دێ تەمام کی سوحبەتێ |
| ئەی فەلەکێ بێ وەفایێ؛ تە چڕە موهلەت نەدایێ | یار د نێڤ ئاخێ نهایێ؛ تو ب مەحبووبا کەتێ |
| نازک و مەحبووب جوانەک؛ قامەت و بەژن و زراڤەک | كُلُّ شَيء دبن کو هالەک؛ ژ غەیری شاهێ قودرەتێ |
| ژ غەیری وی جان دێ وەفا بن؛ ئەم هەمی ئاخ و تورابن | من ب چاڤان دی موخابن؛ چوونە مالا زولمەتێ |
| زولمەتا تاری و کوورە؛ مەقبەرا ناڤ لێ قوبوورە | ژ هاینان یاران و دوورە؛ قەبر بەندا فرقەتێ |
| مەقبەرا مەحبووب د نێڤە؛ من موقیم چاڤ مان ب رێڤە | چڕە یەک نایێ ژ وێڤە؛ دین کرم ڤێ حیکمەتێ |
| دین بووم د حوکمێ ذوالجَلال؛ ئەو لاوکێ ب حوسن و جەمال | سەد حەیفە کو زوو چوو ژ مال؛ رەیحان و وەردا قامەتێ |
| رەیحان و وەردا فلفلی؛ من دینە زولفێن کاکلی | هاتی کوڕیم ژ دەست بری؛ دا ئەم بگێڕن عبرەتێ |
| من حەیف ل جووتێ سۆرگولا؛ زولفێ موقیم ل سەر ملا | دانینە نێڤ ئاخ و سەلا؛ ئێدی بگێڕم ئولفەتێ |
| من حەیف ل رەیحانێ د ڕەش؛ کا سۆرگول و وەردێن د گەش | کێم بوون ژ وان بهنێ د خوەش؛ نیشان و خالا جەبهەتێ |
| نیشان و خالا فلفلی؛ من حەیف ل زولفێن کاکلی | هاتی لاوک ژ دەست بری؛ هێژ ناکرن ئەم عبرەتێ |
| میر محێ شاعرێ پاکە؛ هەرکەسی روح بوو ژ ماکە | هەمییان دێ ئەو فەناکە؛ ئەوێ شاهێ قودرەتێ |
This work was published before January 1, 1929, and is in the public domain worldwide because the author died at least 100 years ago.
Public domainPublic domainfalsefalse