بات برہا دی ایہی ایہی عجب جیہی
کافی
بات برہا دی ایہی ایہی عجب جیہی ۔
مل معشوقاں مصلحت کیتی، عاشق قتل کرسیوں ۔
قتل کنوں جو پچھے تہں کوں، شہر ڈھنڈھورے ڈیسوں ۔
کنوں ڈھنڈھورے پچھے تہں کوں، لہریں وچ لڑسیوں ۔
لہر کنوں جو باہر آیا، رمز اہیں دی زیہی ایہی عجب جیہی ۔
لہر کنوں پچھے تہں کوں، آتش وچ سٹیسوں ۔
آتش وچ جو سٹ تہیں کوں، پھوک اڑاہ مچسیوں ۔
پھوک اڑاہ مچا تہیں دی وائیں خاک اڈیسوں ۔
خاک عاشق دی اکھییاں دے وچ، سرمہ جوڑ کے پسیوں ۔
عاشق سو جو سرمہ تھیوے، گالھِ اننھی دی کیہی، ایہی عجب جیہی ۔
سنیاں صبح دے ویلے، عاشق پکڑ کے تییار کریسوں ۔
شباشب تہیں دے پچھوں، فوجاں حسن چڑھسیوں ۔
وچ لتاں دے عاشق شودا، قابو قید کریسوں ۔
اول ہشیاں ڈیکر پچھے، اے منصوبہ چلیسوں ۔
نال تہیں دے جیہی ونی، آپے کرسوں ایہی، ایہی عجب جیہی ۔
چلو وے سنیاں عاشق کیتے، سرہا میٹ ملیسوں ۔
وچ دریا لوہو دے تہیں کوں، دھپاں نال دھوسیوں ۔
دھوپیں نال دھوا تہیں کوں، غوطے خوب ڈویسوں ۔
غوطے کنوں جو پچھے تہں کوں، ڈیکر لط بڑیسوں ۔
بڈن کنوں جو باہر آیا، گالھِ کریجے کیہی، ایہی عجب جیہی ۔
رنگا رنگ نکاشی والا، محلہ ایک بنیسوں ۔
ہڈے گڈے تہں عاشق دے، وت تھمبھے کام کریسوں ۔
چار ای بازو کرکے ڈاکے، پوڑی جوڑ جڑیسوں ۔
سر عاشق دا تہں دے اتوں، دکے درس دھریسوں ۔
خون دی قیمت اساں تھیوسے، قتل تھییا پرڈیہی، ایہی عجب جیہی ۔
عاشق آہو معشوق شکاری، ایہو شکار کریسوں ۔
رمزاں غمزاں مزغاں والے، تنھی کوں تیر مریسوں ۔
نام اﷲ دے نال عاشق کوں، چا تکبیر گھتیسوں ۔
ہتھیں اپنے گھن عاشق دے، چا وت کھل کھلیسوں ۔
بوٹییاں کرکے آتش دے وچ، سیکھیں سر چڑھیسوں ۔
سیکھیں اتوں لاہ کراہن، تل پھل کر ونڈیسوں ۔
تل پھل دا گیا ذرا پرزہ، جان جگر وچ پیہی، ایہی عجب جیہی ۔
اصل کنوں جو ساڈا آہا، سچل یار پچھیسوں ۔
وچ درازیں جائ تہیں دے، سارا ورہ ونڈیسوں ۔
اوہو اسانڈا اساں اہیں دے، عشقَ کیتوسے نیہی، ایہی عجب جیہی ۔
This work was published before January 1, 1929, and is in the public domain worldwide because the author died at least 100 years ago.
Public domainPublic domainfalsefalse