بارہ مانہہ
بارہ مانہہ
چیتر چاہ وساکھ نوں وصل لوڑاں
چڑھیا جیٹھ جانی میرا پار گیا
ہاڑ ہاڑے گھتاں ساون سواں ناہیں
بھادؤں بھؤ لگائکے یار گیا
اسو وگن آنسو کتک کون کتے
مگھر مک رہیاں سوہنا یار گیا
پوہ پواں کیکر ماگھ ماہی باجھوں
پھگن پھوک ہدایت نوں ساڑ گیا
چیت
چڑھدے چیت نہیں گھر جانی رو رو آہیں ماراں میں
پھلیا باغ پکے سبھ میوے کسدی نظر گزاراں میں
جھک رہے ڈال نہیں وچ مالی بلبل وانگ پکاراں میں
جے گھر یار ہدایت آوے امب انار اتاراں میں
ویساکھ
چڑھے ویساکھ وساکھی ہوئی گھریں سداگر آئے نی
نہیں خبر اساڈے جانی کیوں اتنے دن لائے نی
کھلھے کیس گلے وچ میرے سئیاں سیس گندائے نی
کون ہدایت خبر لے آوے کیہڑا قاصد جائے نی
جیٹھ
چڑھدے جیٹھ وگن ہن لوآں رت گرمی دی آئی ہے
ظالم برہوں پھوک المبا آتش تیز مچائی ہے
ایس وچھوڑے وگ شمع دے میری جان جلائی ہے
اجے ہدایت یار ن آیا جان لباں پور آئی ہے
ہاڑ
چڑھیا ہاڑ گھتاں میں ہاڑے پیا باجھ اکلی جے
مدت گزری پندھ اڈیکاں سوہنے خبر نہ گھلی جے
وانگ زلیخا یوسف پچھے میں بھی ہوئی جھلی جے
لگے عشقَ ہدایت اسنوں قسمت جدی اولی جے
ساون
چڑھدے ساون مینہہ برساون سئیاں پینگھاں پائیاں نی
کالی گھٹا سرے پر میرے ظالم عشقَ جھڑائیاں نی
بجلی چمکے برہوں والی نیناں جھڑیاں لائیاں نی
سوکھا عشقَ ہدایت دسے اس وچ سخت بلائیاں نی
بھادروں
بھادروں بھاہِ عشقَ نے پھوکی خون بدن دا سڑیا جے
دس پیا دی پیندی ناہیں چھواں مہینہ چڑھیا جے
میں بےقسمت روندی پھردی ناگ عشقَ دا لڑیا جے
کیہڑے دیس ہدایت جانی قسمت میری کھڑیا جے
اسو
اسو آن ستایا مینوں طرف جنگل اٹھ وینی ہاں
کرکے یاد پیا نوں روواں اکلی ہو ہو بہنی ہاں
ظالم برہوں پین نہ دیندا جے میں لمی پینی ہاں
جانی باجھ ہدایت تیرے تارے گندی رہنی ہاں
کتک
چڑھیا کتک کنت نہ آیا میں ہن بھالن جاوانگی
دیس بدیس پھرانگی بھوندی جوگی بھیس بناوانگی
گیرو نال رنگانگی کپڑے کنّ وچ مندراں پاوانگی
سسی وانگ ہدایت میں بھی تھل وچ جان گواوانگی
مگھر
مگھر مار مکایا مینوں ہڈّ وچھوڑے گالے نی
ساڈی ولوں کیوں چتّ چایا اوس پیا متوالے نی
اگے رات قہر دی لمی اتوں پے گئے پالے نی
جانی کول ہدایت ناہیں لاواں اگّ سیالے نی
پوہ
چڑھیا پوہ پئیاں ہن برفاں کوئی خبر ن والی نوں
مڑکے خبر ن پچھی اسنے چھڈ گیا بے حالی نوں
بھامبڑ بلن جدوں میں دیکھاں اسدی پلنگھ نہالی نوں
لا گل یار ہدایت روواں لیف سرانے خالی نوں
ماگھ
ماگھ مہینہ ماہی باجھوں جو کچھ میں سنگ بیتی جے
شالہ دشمن نال ن ہووے جیہی وچھوڑے کیتی جے
کوہلو وانگر جان تتی دی پیڑ عشقَ نے لیتی جے
جانے اوہ ایہہ گلّ ہدایت زہر عشقَ جنِ پیتی جے
پھگن
چڑھیا پھگن کندھی لگن عمر رہی دن تھوڑے نی
نال پیا دے کھیڈاں ہولی ایہہ میرا دل لوڑے نی
ایسا کون کڈھاں میں دردی جا اس نوں ہتھ جوڑے نی
تاں سہاگن بناں ہدایت جے شہہ واگاں موڑے نی
|
This work is now in the public domain in Pakistan because it originates from Pakistan and its term of copyright has expired. According to Pakistani copyright laws, all photographs enter the public domain fifty years after they were published, and all non-photographic works enter the public domain fifty years after the death of the creator. | 
|