بس کر جی ہُن بس کر جی
بس کر جی ہُن بس کر جی
اک بات اساں نال ہس کر جی
تُسی دِل میرے وِچ وسدے ہو
اینویں ساتھوں دُور کیوں نسدے ہو
نالے گھت جادو دِل کھسدے ہو
ہُن کت ول جاسو نس کر جی
بس کر جی ہُن بس کر جی
اک بات اساں نال ہس کر جی
تسی مویاں نوں مار نہ کُھٹدے سی
کِھدّو وانگ کھونڈی نِت کُٹّدے سی
گل کردیاں دا گل گُھٹدے سی
ہُن تِیر لگاﺅ کَس کر جی
بس کر جی ہُن بس کر جی
اک بات اساں نال ہس کر جی
تُسی چُھپدے ہو اساں پکڑے ہو
اساں نال زُلف دے جکڑے ہو
تُسی جے چُھپن نوں تکڑے ہو
ہُن جان نہ ملدا نس کر جی
بس کر جی ہُن بس کر جی
اک بات اساں نال ہس کر جی
بلھا شَوہ میں تیری بردی ہاں
تیرا مُکھ ویکھن نوں مردی ہاں
نِت سو سو مِنتاں کر دی ہاں
ہن بیٹھ پنجر وچ دھس کر جی
بس کر جی ہُن بس کر جی
اک بات اساں نال ہس کر جی
|
This work was published before January 1, 1929, and is in the public domain worldwide because the author died at least 100 years ago. |