تیڈے نیناں تیر چلایا
تیڈے نیناں تیر چلایا
تیڈی رمزاں شور مچایا
المست ہزار مرایا
لکھ عاشق مار گنوایا
ابراہیم اڑاہ اڑایو
بار برہوں سر چایا
صابر دے تن کیڑے بچھے
موسی طور جلایا
زکریا کلوتر چرایو
یحیٰی گھوٹ کوہایا
یونس پیٹ مچھی دے پایو
نوح طوفان لڑھایا
شاہ حسن کوں شہر مدینے
زہر دا جام پلایا
کربلا وچ تیغ چلا کر
ایہڑا کیس کرایا
شمس الحق دی کھل لہوایو
سرمد سر کپوایا
شاہ منصور چڑھایو سولی
مستی سانگ رسایا
مجنوں کارن لیلیٰ ہو کر
سو سو ناز دکھایا
خسرو تے فرہاد دی خاطر
شیریں نام دھرایا
درد دا بار اٹھایا ہر ہک
اپنا وقت نبھایا
کر قربان فرید سر اپنا
تیڈڑا وارا آیا
This work was published before January 1, 1929, and is in the public domain worldwide because the author died at least 100 years ago.
Public domainPublic domainfalsefalse