جان میں جان تبھی قیس کے بس آتی ہے
جان میں جان تبھی قیس کے بس آتی ہے
ناقۂ لیلیٰ کی جب بنگ جرس آتی ہے
ساتھ دیکھوں ہوں کسی کے جو کسی دلبر کو
میں بھی جی رکھتا ہوں مجھ کو بھی ہوس آتی ہے
قیس و فرہاد کے رونے کی جب آ جاتی ہے لہر
کوہ و صحرا پہ گھٹا جا کے برس آتی ہے
زندگی ہے تو خزاں کے بھی گزر جائیں گے دن
فصل گل جیتوں کو پھر اگلے برس آتی ہے
جب قفس میں تھے تو تھی یاد چمن ہم کو حسنؔ
اب چمن میں ہیں تو پھر یاد قفس آتی ہے
This work was published before January 1, 1929, and is in the public domain worldwide because the author died at least 100 years ago.
Public domainPublic domainfalsefalse