جوں عبرت کور جلوہ گر ہوں
جوں عبرت کور جلوہ گر ہوں
البتہ کچھ ہوں میں پر کدھر ہوں
جوں شیشہ بھرا ہوں مے سے لیکن
مستی سے میں اپنی بے خبر ہوں
جو کہئے سو یاں سے ہے فروتر
کیا جانے میں کس مقام پر ہوں
اے صبر تنک تو رہ کہ تجھ سے
دو چار قدم میں پیشتر ہوں
چل دامن و آستیں تجھے کیا
لب خشک ہوں یا میں چشم تر ہوں
اے بخت سعید تیری دولت
اک یمن قدم سے ہوں جدھر ہوں
پروانے کی شب کی شام ہوں میں
یا روز کی شمع کی سحر ہوں
جی مانگے ہے خوش دلی کو قائمؔ
تو بیٹھ کے رو میں نوحہ گر ہوں
This work was published before January 1, 1929, and is in the public domain worldwide because the author died at least 100 years ago.
Public domainPublic domainfalsefalse