دا څه مخ دی منور
دا څه مخ دی منور
چې هم شمس دی، هم قمر
دا څه زلفې دي مښکینې
چې هم مښک دي، هم عنبر
دا څه پیوسته ابرو دي
چې هم نېښ دي، هم نشتر
دا څه سترګې دي قاتلې
چې هم سیف دی، هم خنجر
دا څه شونډې دي می ګونې
چې هم می دي، هم شکر
دا څه سپین سپېڅلي غاښ دي
چې هم دُر دي، هم ګوهر
دا څه سیبِ زنخدان دی
چې هم سیم دی، هم ثمر
دا څد قد او قامت دی
چې هم ګل دی، هم عرعر
دا څه مَلا ده، باریک وضع
چې هم مُو یې دی، هم کمر
دا څه زړه دی، د خوبانو
چې هم موم دی، هم حجر
دا څه یار دی نه پوهېږم
چې هم دل دی، هم دلبر
دا څه بت دی، زما ربه؟
چې هم بت دی، هم بشر
دا څه شعر دی رحمانه
چې هم ګنج دی هم هنر
|
This work was published before January 1, 1929, and is in the public domain worldwide because the author died at least 100 years ago. |