دل عشق میں تباہ ہوا یا کہ جل گیا
دل عشق میں تباہ ہوا یا کہ جل گیا
اچھا ہوا خلش گئی کانٹا نکل گیا
الفت میں اس کی جان گئی دل بھی جل گیا
دشمن کا دو ہی دن میں دوالہ نکل گیا
دل اپنا اس سے مانگنے کو میں جو کل گیا
آنکھیں نکالیں لڑنے کو فوراً بدل گیا
جلتے ہیں غیر اپنا تو مطلب نکل گیا
قسمت سے بات بن بھی گئی داؤ چل گیا
تعریف حسن یار نے اس کو کیا رقیب
رہبر بھی بیچ رستے میں ہم سے بدل گیا
کرتا ہوں عرض ان سے جو چلنے کی میں کہیں
کہتے ہیں کیا دماغ تمہارا بھی چل گیا
بھاری ہے رات ہجر کی بیمار پر ترے
پھر اس کو خوف کچھ نہیں یہ دن جو ٹل گیا
دشمن کے نقش پا کو جو دیتے ہو گالیاں
پیٹو لکیر سانپ تو آیا نکل گیا
کس رنگ میں وہ رہتے ہیں اس کی خبر نہیں
محفل میں ان کی آج میں پہلے پہل گیا
ارمان کیا گئے کہ گیا دل بھی عشق میں
یہ وہ جوا ہے جس میں ہمارا مدل گیا
وہ جلوہ گاہ ناز ہو یا بزم غیر ہو
جنت ہمیں وہیں ہے جہاں دل بہل گیا
دشمن بھی جاں نثار بنے دے کے اپنا دل
حیرت ہے مجھ کو روپیہ کھوٹا بھی چل گیا
انجام عشق دیکھ لیا اپنی آنکھ سے
اب تو صفیؔ دماغ کا تیرے خلل گیا
|
This work is now in the public domain because it originates from India and its term of copyright has expired. According to The Indian Copyright Act, 1957, all documents enter the public domain after sixty years counted from the beginning of the following calendar year (ie. as of 2024, prior to 1 January 1964) after the death of the author. | 
|