دوڵبەر

by سەیدی

دوڵبەر دڵ ئەستانای جە من، شەرت ئی دڵستانی نیۆ	جەورش مەدەی، ڕەنجش مەکەر، خۆ کافرستانی نیۆ
شەرتەن بکێشۆ دڵ جەفات، با یادگار مانۆ جە لات	تۆ بۆت نە دڵ، خۆفی خودات، خۆ کافرستانی نیۆ
ئامام نە ڕات پی جەستەوە، گێرەم سڵۆم چیت نەستەوە	پی حاڵی جەستەی خەستەوە، خۆ کافرستانی نیۆ
هەی نەونەمامی باغی دڵ، پەی تۆ سیان بەیداخی دڵ	سا مەرهەمێ پەی داخی دڵ، خۆ کافرستانی نیۆ
هەی ڕەندێ توحفێ نازەنین خاڵت جە عەنبەر، گوڵ جەمین	سا مەرهەمێ، دەر پەی برین، خۆ کافرستانی نیۆ
بیمارو تۆم، حۆرو پەری، ئەر خواهێشەن، ئەر سەر سەری	شەرتەن عەیادەتمان کەری، خۆ کافرستانی نیۆ
دادم پەنە، چڵێ و «ڕیۆن» قیمەتشەنە، سۆنەم گیۆن	چی مامەڵە مەگنەم زیۆن، خۆ کافرستانی نیۆ
وێڵ وێڵ مەگێڵام کۆ بە کۆ، دەردم گران بێ ڕۆ بە ڕۆ	سا حاڵ و دەردیم پەرسە تۆ، خۆ کافرستانی نیۆ
تەرک و وڵاتیت کەردمۆ، ژاراوو دووریت وەردەمۆ	پەرسە بە حاڵی دەردەمۆ، خۆ کافرستانی نیۆ
عوریان و کەڵپۆش، شەیداو بیابان گێڵەنۆ	دا پەرسە پەی کێ وێڵەنۆ، خۆ کافرستانی نیۆ
ئەر شەرت و بەینت ویرتەن، خۆف و خواوو پیرتەن	بۆ لام، ئەگەرچی دێرتەن، خۆ کافرستانی نیۆ
یام بارە تەشریف یانەمۆ، یا دوورۆ پەرسە حاڵمۆ	تەرسە هەناسەی کاڵمۆ، خۆ کافرستانی نیۆ
قەومان، خوێشان، هامسەران، لۆمە و مەنامان چی کەران؟!	خاسەن تەئەسوفمان وەران، خۆ کافرستانی نیۆ
سەیدی گرانۆ ئەلویداش، هیجران مەدۆ هەردەم جەفاش	هەی پەی خوای بەیدێ وەلاش، خۆ کافرستانی نیۆ