دیوانا مەلایێ جزیری/ل

by مەلایێ جزیری

گەر بدیا ئەو سەنەما سوڕ جەمیل

گەر بدیا ئەو سەنەما سوڕ جەمیل	نازلی ئەرزان نەدبوو جبرەئیل!
من نەزەرەک حوسن و جەمالا تە کر	ئایینەیەک دی مە ژ نوورا جەلیل
لەو ژ لەبێ لەعلێ تە بوو جام خەجەل	بادەیێ ئەنگوور «کجا» سەلسەبیل
دیل مە هەزارن تە د بەندێ وەلێ	«لَيْسَ لَنا عنك مجالُ بديل
ما أنا وَحْدی بكَ مِنْ مُغْرَم	كم لك قتلی شغفاً من قَبيل»
داروویێ دەردێ مە تویی جانێ من	«هَلْ بِسوی الوَصْلِ شِفاءُ الْعَليلْ»
سەبر و سوکوون چوون مە د نێڤ دجلە دا	لەو ژ دو چەشمان مە دزێت ئابێ نیل
بەس مە نە سەد چەشمە ژ چەشمان دزێن	«مَزْجُ دَم دَمعُ عُيونی يَسيلْ»
پوڕ مە نەزەر دا تە ژ سەر تا قەدەم	«قد رَجعَ القَلب و عَقْلی كَليلْ»
مسلی تە ما بوونە؟ وە یا ما دبن؟	ڕۆژ کو تەجەللایە چ حاجەت دەلیل؟
«قَدْ سَلَبَ الروُحَ عَلی غَفْلَة	إذ هَجَمَ اَلْقَلْبَ بِطَرف كَحيلْ»
گەر چ ل بەر زەرب و شەقان فیل بووم	بێ مەفەر ئەز مات کرم شاهـ و فیل
جان ددرم گوفت ب یەک بووسە دە	لێ ببتن لەعلێ شەکەرخا کەفیل
گەر چ د نێڤ حەلقەیێ شێرانم ئەز	«لَيْسَ عَلَيْنا لِعِدانا سَبيلْ»
زۆر مەلا فورقەتێ ئەبتەر کرین	«إنَّ مِنَ الساعَةِ يَوْمَ الرَّحيلْ»

شاهدێ قودسی نشان حوسنە ژ ڕەمزا ئەزەل

شاهدێ قودسی نشان حوسنە ژ ڕەمزا ئەزەل	دا مە ب دەستێ سوڕێ جامێ مەیا «لم يزل»
مەی کو بچت ساغەرێ د دەستێ وێ دلبەرێ	سووندێ ب خالق دخوم ڕۆژە د بورجا حەمەل
دێم د جامێ مە دی سوڕ د مودامێ مە دی	لەو مە ژ مەیخانەیێ گرتییە بەردەر مەزەل
هەر ژ کەڤانێ ب وەش قەبزە زەرێ گۆشەڕەش	گەزمە ب جوهت تێنە دل کەس دمرت بێ ئەجەل
حوسن و سوڕا سوورەتێ کەس ددرت قودرەتێ؟	لەو د ئەسل دوورە ژێ تەعنەیێ «لَمّا أفَلْ»
زوربە وە تێتن عەرەب تێک چەڤاندن قەسەب	قەنج ب چەهڤان مە دی جەنگ و جدالا جەمەل
شیر و ڕمان ڤێکڕان پەنجە برن تێکڕان	لەو مە دکن ژێکڕان قیمە دکن دل د گەل
نازک و قەنجا شەپال دل ڤەگەڕینت مەحال	لێ ژ مە دێ دل ببت دل ب مە دت موحتەمەل
نەیشەکەر و دێم دوڕێ دا مە ب دەستێ سوڕێ	جام و قەدەح شوبهی ئاڤ لەو مە ڕەوان تێن غەزەل
گەر چ ب چەشمێ «أنا» عالەم مەلا کر فەنا	«دونَ فَنا بابِكُم إنَّهُ عَبْدُ أقَلّ»

ئیرۆ ژ ڕەمزا دێم دوڕێ، مننەت کو من مەسروورە دل

ئیرۆ ژ ڕەمزا دێم دوڕێ، مننەت کو من مەسروورە دل	دلبەر ب فنجانا سوڕێ، مەی دا مە و مەخموورە دل
ڕەمزەک نهین ئاڤێهتە دل، مهری ژ باتن مێهتە دل	شەهزادەیێ سوڕ رێهتە دل، شەهکاسەیا فەرفوورە دل
هۆستایێ عشقێ دل هەڤۆت، سەر تا قەدەم هنگی دسۆت	ڕەمزا «أنا الحق» هەر دگۆت، باوەر بکن مەنسوورە دل
دل لێ بدت نوورا مەیێ، وەقتێ سەواش و هەی هەیێ	فەهم ئەر بکی وەحیا نەیێ، ژێ دت خەبەر مەئموورە دل
نوورا ژ قودرەت لێ دو نوون، ژێڕا دنالن ئەرغەنوون	وەر ئایەتا عشقێ بخوون، خوەش نوسخەیەک مەستوورە دل
تەفسیرێ سررا ئایەتێ، عارف دڤێتن گوهـ دەتێ	ڕازا ڕمووزێن قودرەتێ، گەر دەین بکین مەعزوورە دل
دل کەعبەیە مەولایە لێ، نارێ کەلیم ئیسایە لێ	بانگێ «أنا الله» دایە لێ، هەم کەعبە و هەم توورە دل
سەد جۆ و سەد جۆبارە تێ، سەد گولشەن و گولزارە تێ	چەندان ژ عشقێ نارە تێ، سافی نەزەر دی کوورە دل
سوحبەت کو کامل بوو برێ، جارەک ب جایێ عەنبەرێ	قەلبێ مە باڤێ مەجمەرێ، خوەش عەنبەر و کافوورە دل
شۆخ و شەپالا لەب ژ قەند، ئەو نازکا وێ قەنج و ڕەند	وێ دل ژ دل دلدا و خوەند، ئیرۆ یەقین فەغفوورە دل
ئەر دل ژ تە مەسروور بتن، من ژ مەلێ دەستوور بتن	دێ کت جەهان پوڕ نوور بتن، لێ دائمەن ڕەنجوورە دل