دیوانی حەمدی/تاک

by حەمدی

1

تو خودا مەنعی مەکەن هەرچی بکا حاجی فەرەج

چونکە خوا فەرموویەتی «ليسَ عَلى الاع٘مي حَرَج٘»

2

من لە دیوانا حیکایەی سەی عەلیم قەید کردبوو

ناوی بیسمیللام کە نووسی وەک جنۆکە دەرپەڕی

3

من لەناو ئەم کوردەدا چونکە نەزاکەتیان نییە

حەز ئەکەم دەنگم بنووسێ بەڵکە دەنگم دەرنەیێ

4

ئەگەر ئەو دوژمنە وەک مار لەسەر کلک ڕابوەستێ بۆم

بە شیرینی و خۆشی وا ئەکەم تا ماوە ڕام بێ بۆم

5

شەوێ دەس ئەهرەمەن کەوت خاتەمی ملکی سلێمانی

کە چی میر و گزیری پێ ئەکرد، قەدری وەها زانی

6

لە من شەیداترە واعیز بە حوسنی سووڕەتی قالە

تەماشاکە لەسەر قیلێ هەزار دەفعە ئەڵێ قالە

7

قوتابخانەی کەری داناوە دنیا

مەلا وا بۆتە قۆڵچی ئەم کەرانە

8

ئەم شارە کە ئەشراف و توجاری چەلەبی بێ

وێرانە ئەبێ کاری تەواوی جەلەبی بێ

9

بە تاڤگەکەی سەری زەڵم بۆ نەڵێم نیاگارا

ئەمەندە بە فەیزە پررشکی کەفی گەوهەر بارە