دیوانی حەمدی/ق
1 edit
| وەختی شەفەق لە غەربەوە یارم کە کەوتە بەرق | عالەم وتی قیامەتە خۆر غەربی کرد بە شەرق |
| گوڵ وەعدەیی ویساڵی بە بولبول نەدا ئەویش | ناکا بەهەشت لە قەعری جەهەننەم بەزەڕڕە فەرق |
| ڕووی بەرقیدا لە دوورەوە من دیم وەکوو سەراب | لەم بەحری عەشقەدا وەکوو گوهەر بووم کە غەرق |
| بینایە کوێر و دادی فەساحەت دەدا کە لاڵ | کافی نییە لە نووری موحیببەت ئەمەندە خەرق |
| جل شین و مل کەچن ئەوی ئەهلی موحیببەتن | ئەی ئافەرەم وەنەوشە کە نیتە لیباسی زەرق |
| حەمدی لە ناری فیرقەتت عاجز نییە فەقەت | دڵ مەخزەنی سەرائیری عەشقە دەچێ بە حەرق |
2 edit
| دەخیلت بم لە شاخ و بەرد و تەق تەق | ملم دەشکێ ئیشارەم کە بە تەق تەق |
| بە ناحەق چوومەتە کایەی مناڵان | بە لوتفی خۆی مەگەر بیکا بە حەق حەق |
| لە بازیچەی زەمانا بوومەتە گۆ | وجوودی سەیری چۆن کردم بە شەق شەق |
| موقەسسیم وەختی شەڕ چاکم دەبینێ | لە خێرا سەیر دەکا نابینی زەق زەق |
| بەلنگ ڕووتی عەرەب ئەمدا بە شوو جا | هوما نابێتە جووتی حاجی لەق لەق |
| دەروونم هێندە کەیلە حەمدی وەختە | لە داخانا بەرم وەک سفرە شەق شەق |
3 edit
| ئاشکاری کرد هەموو ئەسرار و خۆی پەنهانە عەشق | پڕ بە کاشانەی وجوودە جانە یا جانانە عەشق |
| جوزء و کول ئەجزایی فەردی کائیناتە کائینات | هەرچی ئەفعالی تێدایە مەسدەری هەمووانە عەشق |
| غەرقی مەوجی ئاورنگی گەوهەری عەشقە وجوود | گەوهەری دەریایی لوتفی حەزرەتی یەزدانە عەشق |
| شەمعی داگیرساوی دەستی عەشقە شەخسی تێگەییو | تێ نەگەیویشی بە قەد خۆی چاکر و سوڵتانە عەشق |
| بۆ گەڕانی بەزمی عالەم عامیلە ساقی سیفەت | ماددەیێکە میسلی مەی غایەی هەموو ڕەندانە عەشق |
| دڵ لەم ئافاقە بە ویسعەت هەر دەبێ کەمتر نەبێ | بۆیە وەک بەرقێ لەوێدا ئارەزووی جەولانە عەشق |
| بۆ شەهادەت شەمع و گوڵ ئەندامییان بۆتە زەمان | ئاگری بەرداوەتە دڵ بولبول و پەروانە عەشق |
| عەشقی چی من ئاگرێکی قودرەتم دیوە دەخیل | دڵمی کردۆتە جەهەننەم نەک بە ئاتەشخانە عەشق |
| سایقی مەجزووبە لایێ لایێ قووەی جازیبە | نووری شەوقی عاشقان و ڕەنگی مەعشووقانە عەشق |
| بارەگاهی عەشقە جێگەی سەرفرازی حەمدییا | موشکیلە ئەمڕۆ سبەینێ موشکیلی ئاسانە عەشق |
4 edit
| دەس لە دەریادا دەبا بۆ پووشێ ئینسانی غەریق | ناعیلاجی مەرد دەکا ئەلبەت بە نامەردێ ڕەفیق |
| گەر ڕەفیقت دڵ بشێوێنێ بە بێ عەقڵی برا | ئەو ڕەفیقە زوو موقابیل تۆ دەوەستێ وەک فەریق |
| لێوی تۆ پەروەردەیی خوێنی دڵی ئەهلی دڵە | یا دەسێنێ خەرج لە مەوجی بەحری مەرجان و عەقیق |
| سەردە دۆزەخ بۆ ئەوانەی گەرمی عەشقی دلبەرن | کەی مەجاز سۆزی دەگاتە مەرتەبەی عەشقی حەقیق |
| ڕێ بە قەعری بەحرەبا غەوواسی عاریف بۆ گوهەر | حەقیە بۆ مەزموون کە شاعیر کەوتە ئەفکاری عەمیق |
| یەک پڕیشکی نووری عەشقت ئاگرێکی خستە دڵ | کەس لە بابی عالیا نەدیوە بەو نەوعە حەریق |
| هەر شەوێ دەیهێنمە خاتر جەلالی ڕوویی یار | ئەوجی دڵ پڕیە لە ناڵەی ڕەعد و چەخماخەی بەریق |
| بۆ جەفا بێ با لە فکری دەرنەچم کافیمە من | حەمدی نابێ قەت وەکوو ئەو شۆخە غەددار و شەفیق |
5 edit
| قەت مەکەن عاشق بەسەربەستی بەیانی ئیشتیاق | پڕ بە دنیایێکە شێخ و زاڵم و ئەهلی نیفاق |
| ئەم سبەینێیە کە کەوتە جیلوە دلبەر ڕۆژهەڵات | ڕوو بە ڕووی یەک بوونەوە ڕۆژێ بوو نیعمەلئیتتیفاق |
| سەیری ساقی گەردنی ساقی و ملی مینایی مەی | بۆ سەری مەیخوارە کردوویانە ئەلبەت ئیتتیفاق |
| دڵ بە ناری فیرقەتت برژاوە چاوم پڕ لە ئەشک | جەم لە ئەسبابی تەرەبدا نەیبووە وەک من تفاق |
| یار لە من ڕۆحی دەوێ من ماچی لێوم ویستووە | من وتم پێشکەشتە فەرمووی تۆ مەکە تەکلیفی شاق |
| وەک خەتیبی کفر و موئمین وەختی خوتبە یەک کەون | من فیغانی ئەلویساڵم کرد ڕەقیبیش ئەلفیراق |
| ڕوو بچەرخێنی لە عوششاقت دەزانی وەک چییە | ئەهلی قیبلە یا بڕووخێ قیبلەیان یا بێتە تاق |
| حەمدی بادەی تاڵە شەکراوی نیشاتی عاریفان | چونکە باسی زاهیدان گۆڕیویەتی تامی مەزاق |