دیکھ موہن تری کمر کی طرف

دیکھ موہن تری کمر کی طرف
by ناجی شاکر
311867دیکھ موہن تری کمر کی طرفناجی شاکر

دیکھ موہن تری کمر کی طرف
پھر گیا مانی اپنے گھر کی طرف

جن نے دیکھے ترے لب شیریں
نظر اس کی نہیں شکر کی طرف

ہے محال ان کا دام میں آنا
دل ہے مائل بتاں کا زر کی طرف

تیرے رخسار کی صفائی دیکھ
چشم دانا کی نئیں گہر کی طرف

ہیں خوشامد طلب سب اہل دول
غور کرتے نئیں ہنر کی طرف

ماہ رو نے سفر کیا ہے جدھر
دل مرا ہے اسی نگر کی طرف

حشر میں پاکباز ہے ناجیؔ
بدعمل جائیں گے سقر کی طرف

This work was published before January 1, 1929, and is in the public domain worldwide because the author died at least 100 years ago.

Public domainPublic domainfalsefalse