زمزمہ نالۂ بلبل ٹھہرے
زمزمہ نالۂ بلبل ٹھہرے
میں جو فریاد کروں غل ٹھہرے
نغمۂ کن کے کرشمے دیکھو
کہیں قم قم کہیں قلقل ٹھہرے
جال میں کاتب اعمال پھنسیں
دوش پر آ کے جو کاکل ٹھہرے
رات دن رہتی ہے گردش ان کو
چاند سورج قدح مل ٹھہرے
میرا کہنا ترا سننا معلوم
جنبش لب ہی اگر گل ٹھہرے
جان کر بھی وہ نہ جانیں مجھ کو
عارفانہ ہی تجاہل ٹھہرے
عاشقی میں یہ تنزل کیسا
آپ ہم کیوں گل و بلبل ٹھہرے
تجھ پہ کھل جائے جو راز ہمہ اوست
فلسفی دور و تسلسل ٹھہرے
آنکھ سے آنکھ میں پیغام آئے
گر نگاہوں کا توسل ٹھہرے
کھل گئی بے ہمگی با ہمگی
کل میں جب محو ہوئے کل ٹھہرے
دل سے دل بات کرے آنکھ سے آنکھ
عاشقی کا جو توسل ٹھہرے
کیوں نہ فردوس میں جائے مائلؔ
جب محمد کا توسل ٹھہرے
This work was published before January 1, 1929, and is in the public domain worldwide because the author died at least 100 years ago.
Public domainPublic domainfalsefalse