| شاهـ و شازادە هەردوو بە ئیعزاز
|
شین بە سەومێعە بارەگای فەیاز
|
| کەردشان سەلام مورشید کامڵ
|
مدران بە خدمەت بە یەقین و دڵ
|
| عابێد هۆرێزا سەلام دا جەواب
|
وات ئەی شازادە شای خەتەر خیتاب
|
| هەر دوو نیشتەبین نەخدمەت فیاز
|
یەکێ پەی مەتڵەب یەکێ پەی نیاز
|
| عابێد پەی مەتڵەب ئاما بەگوفتار
|
وات ئەی شازادە کەیانی کردار
|
| مەبۆ تۆ جە ڕووی دەریای بێ سامان
|
بشی بەماوای کاخ سولەیمان
|
| ئەر سەد مەکێشی جەفاو دەردیسەر
|
ماوەری بەشاد سەوڵ نازپەروەر
|
| مدارات نەبۆ بەوەخت و بێ وەخت
|
مەکەری فەتح تەلیسمات سەخت
|
| سێ نەفەر ڕەفیق یار هامڕاتەن
|
وێنەی غولامان نەخاک پاتەن
|
| بەڵام یەکێشان نە ڕووی خەجاڵەت
|
مەکەرۆ خدمەت نە ڕووی خەیانەت
|
| ئێد وات و دەست بەرد تووتی بەرئاوەرد
|
دورجش نەگەردن تووتی ڕەها کەرد
|
| وات هەر وەقت بەیۆ موشکیڵێ نەڕێت
|
نیگا کەر نەدروج مەعلووم مەبۆ لێت
|
| هەرچێ نویسان نە ڕووی دورج زەر
|
سەعی کەر تەمام بە ئەنجام باوەر
|
| ئەما سەد زینهار شازادەی بێ خۆش
|
بە تۆ مەواچم نەکەی فەرامۆش
|
| شای نۆش ئافەرین شیرین دڵکێش
|
ماوەری وە زێد وەلای بابۆی وێش
|
| جە موڵک غەریب گەنج شاهانەش
|
نەشکەنی شیشەی قوفڵ خەزانەش
|
| پا غەڵەت نەکەی شازادەی دڵشاد
|
بەڵکە خواوەند بدەرۆت نەجات
|
| شازادە گوفتار عابێد پڕ هۆش
|
بە شەرت و ئیقرار کەرد ئاشنای گۆش
|
| ئێد وات هۆرێزا جە سەومیعەی خاس
|
بۆسا دەست و پای فەیاز بەئیخلاس
|
| جەو دما ئاما بە مەنزڵگای وێش
|
ڕەخت و ئەسبابش ئاوردن وە پێش
|
| هەرچێ لازم بێ قایم کەرد بەوێش
|
ماباقی هەرچێ لازم نەبی پێش
|
| بەردن نەسەرای شاهی سپەردن
|
سپەردە بەدەست قەمەرناز کەردن
|
| عیزەت خان وەزیر جەهانگیر شا بێ
|
وەزیر کامڵ هەم ساحێب جا بێ
|
| هەفت پشتەن وەزیر جەهانگیر شا بی
|
جە کار و کردار واسیتەی شا بی
|
| شای نۆش ئافەرین نازدار شیرین
|
پەی ئەمیر سەلیم نافش بڕ بین
|
| ئەوسا منداڵ بی نازدار باوان
|
هەم شیرەخوار بی جەپیستان دایان
|
| وەختێ کە یاوا بە سنع شاهی
|
عالەم شەیدا کەرد بە دڵروباهی
|
| شای شیرین دەماغ وێنەی پەڕەی گوڵ
|
ئەمیر سەلیم هیچ نەکەردش قەبووڵ
|
| عەزم سەفەر کەرد سوڵتان ئیبراهیم
|
بە فرسەت زانا وەزیر لەعین
|
| واتش من مەکرێ باوەرم وەکار
|
سوڵتان ئیبراهیم نەبۆ جێش ڕزگار
|
| وەزیر عەرز کەردش شای والا تەبار
|
مەتڵەبێ دارووم مەکەرووم ئیزهار
|
| سوڵتان ئیبراهیم بێ شەرت و بێ شۆن
|
کەس نمەزانۆ مەسکەنش جە کۆن
|
| با ئەمیر سەلیم فەرزەند بەندە
|
عەبد دەرگاتەن بە سەرئەفکەندە
|
| وێنەی غوڵامان ببەندۆ کەمەر
|
چەنی شازادان بشۆ پەی سەفەر
|
| ئیستیدعا کەردش جە شای بێ ئەندێش
|
ڕوخسەت تەڵەب کەرد پەی فەرزەند وێش
|
| واتش ئەی فەرزەند شێر هونەرمەند
|
ئاگا بەر جە وێت ناوەری گەزەند
|
| هەر وەقت شازادە دێوانش کەر قەست
|
شای نۆش ئافەرین ئاوەردش بە دەست
|
| مەراجیعەت کەرد بە خاتر گوشاد
|
ئاماوە و یاوا بە ئادەمیزاد
|
| ئەر فرسەت زانای بکەرەش هیلاک
|
وەلاشەی بێ سەر بسپارەش وە خاک
|
| جەو دما چون ئێدشای نۆش ئافەرین
|
باوەرە پەی وێت شۆخ دڵ گوزین
|
| شا جە ئیلتیفات وەبێ گفتوگۆ
|
شای نۆش ئافەرین مەبەخشۆ بە تۆ
|
| سەلیم وات بابۆ ئینە خەیاڵەن
|
کوشتەی شازادە ئەمرێ مەحاڵەن
|
| شێرێ بەی دەستوور پڕ خەشم و بێ باک
|
کێ زەهرە دارۆ بکەروش هەلاک
|
| وەزیر وات زەڕەی دارووی هەلاهێل
|
پەنهانم کەردەن پەی ڕۆژ موشکێل
|
| نە زیر نگین پەنهانم کەردەن
|
هیچ کەس بەگومان ڕاش پێ نەبەردەن
|
| مەدۆم بە دەستت ببەر چەنی وێت
|
مەخفی نەهانی کەس نەزانۆ پێت
|
| هەنگام فرسەت کەس نەبۆ جەلات
|
مەخفی بڕیزە نە ڕووی تەعامات
|
| وەعدەی یەک ساعەت مەبۆ سەد پارە
|
ڕۆحش جە ئەندام مەبۆ ئاوارە
|
| جەو دما نەو جا تۆ وێت مەمانی
|
ئەڵبەت سەرئەنجام کارت مەزانی
|
| نە ئەودەم نگین جە دەست بەرئاوەرد
|
بەدەست فەرزەند ناخەلەف سپەرد
|
| ئەو نامونافیق دێوانەی دەغەڵ
|
زەهرش پەنهان کەرد مەخفی جە بەغەڵ
|
