| نەودەم شازادە وارێد بی نە جاهـ
|
جە دوور و نەزدیک هەر مەکەرد نیگاهـ
|
| ناگا پەیدا بی مەیموونە خاتوون
|
ئەویش کە ئاما وە بێ چەند و چوون
|
| واتش خان محەمەد هەم سپا سالار
|
ببەخشە بەمن بەهمەن موردار
|
| خان محەمەد ئەژنی شازادە ئاما
|
دەردەم دەر ساعەت هۆرێزا وە پا
|
| کەفت نە خاک پای شازادەی زۆردار
|
سەلام داوە نەزد شێر بەچەی خوونخوار
|
| خان محەمەد دەردەم عەلەیک دا وەنەش
|
ڕەویەی شاهانە بەجا ئاوەردش
|
| شازادە واتش ئەی خان محەمەد
|
نیگەدارت بۆ پادشای سەمەد
|
| سەد بارەکەڵا ئەی فەتحە کەردی
|
بەهمەن و قەڵاش بەدەست ئاوەردی
|
| مەیموونە خاتوون فەرما هەم نەدار
|
ئاوەردن بە خوار بەهمەن سالار
|
| مەلیک بەهمەن سوجدەی شازادە بەردش
|
ئاداب ئەرکان بەجا ئاوەردش
|
| خاتوون شی بەلای شای نۆش ئافەرین
|
سوجدەی زەمین بەرد بەعیز و تەمکین
|
| شای نۆش ئافەرین عەلەیک سەند بەناز
|
شین بەناو حەرەم هەردوو بەدڵواز
|
| ماهـ زەڕئەفشان پایدار کەردش
|
قاعیدەی شاهان بەجا ئاوەردش
|
| مەیموونە خاتوون هەم نۆش ئافەرین
|
شین بەناو حەرەم بەعیز و تەمکین
|
| ماهـ زەڕئەفشان هۆرێزا وە پا
|
سەلام کەرد بەناز شای حۆری لەقا
|
| شای نۆش ئافەرین عەلەیک سەند بەناز
|
دەست کەرد نە گەردەن شای شەکەرین ڕاز
|
| خاتوون کە بەرسا ئەی حۆری لەقا
|
کناچێ کێنی ئەی خورشید سیما
|
| وات من کناچەی خوسرەوشای شێرم
|
نە ڕۆژ دەعوا خەیلێ دلێرم
|
| مەیموونە خاتوون شاهـ پەرییان
|
دەست کەرد نەگەردن ماهـ زەڕئەفشان
|
| شای نۆش ئافەرین تەوازوع کەردش
|
ڕەویەی شاهانە بە جا ئاوەردش
|
| شازادەی بێ باک بەور بی ئەندێش
|
بەهمەن تەڵەب کەرد خەلعەت بەخشا پێش
|
| بەعد شازادە فەرما کۆچ کەردن
|
ڕوو بە وەلایەت شار خەتا کەردن
|
