| فەرما کە خەیمەی زەنگ غارەت کەردن
|
ئەسڵەحە و ئەسباب تەمام ئاوەردن
|
| دیشان قاتب شا نە مەیدان کەفتەن
|
جەسەر تا دامان هوون پێدا ڕەشتەن
|
| شازادە جە ئەسپ هەم ئاما بەوار
|
چەنی قاتب شا ئاما بە گوفتار
|
| سەر قاتب شا بشۆران بەهەم
|
بەڵکو خواوەند چەنیش بۆ کەرەم
|
| وەزیرو نەدیم دەردەم بەردشان
|
داخڵ بە سەرای شاهی کەردشان
|
| شازادە لوا وەخەیمە و خەرگا
|
وەلای نازاران شۆخ دڵڕوبا
|
| قاتب شا نەوجا واتش وەزیران
|
ئینە چ کەسەن ئیمداد کەرد پێمان
|
| هەڵمەت و زۆرش شێر ڕووی جەنگەن
|
بێ خۆف نە سپا و نیش خەدەنگەن
|
| ئێد خاسەن ئەو شێر باوەرووم وە شار
|
مێهمانداری کەم شازادەی سالار
|
| وەزیر وات ئەی شا ساحێب عەدڵ و داد
|
جانشین جای پادشای کۆهزاد
|
| مەعلوومەن ئەو شێر ساحێب هونەرەن
|
مەعلوومەن ساحێب تاج و ئەفسەرەن
|
| بەتاج و تۆمار بە شێوە شێوە
|
نیشانەی شاهی تەمام ها پێوە
|
| شا وات ئەی وەزیر دانای نامدار
|
بشۆ بەخدمەت شازادەی سالار
|
| وەزیر ئێد شنەفت هۆرێزا وە پا
|
یاوا بە خدمەت شێر کینە خوا
|
| عەرز کەرد شازادە ئێدەن تەمەنا
|
تەڵەب کار تۆن مەلیک قاتب شا
|
| سا کە ئێد شنەفت شازادەی سالار
|
وات بە خان محەمەد یار وەفادار
|
| شازادە و یاران شای نۆش ئافەرین
|
ماهـ زەڕئەفشان شۆخ نازەنین
|
| داخڵ بە حەرەم سەرا کەردشان
|
تەشریف بە حوزوور قاتب بەردشان
|
| یاوان بە باڵین نیگا کەردن لێش
|
دیشان شێوەی مەرگ عەیان بییەن پێش
|
| ڕووی زامش تکەی زووخاو ڕێزەن
|
ڕۆحش جە هەستیی تەن جە گورێزەن
|
| شازادەی سالار شی وە باڵینش
|
تەکیە کەرد بازوو نە ڕووی سەرینش
|
| وات ئەی پادشا خەیاڵت چێشەن
|
ڕاست بواچە پێم دڵ جە ئەندێشەن
|
| واتش شازادە مەتڵەبم ئێدەن
|
چون فەرزەند وێم ئومێدم پێتەن
|
| من وێم مەزانووم ڕۆحم پەڕ کەندەن
|
عومرم جە دنیا وە نەفەس مەندەن
|
| وەسیەتم ئێدەن بەعد ئەز مەردەنم
|
جە دمای مەردەن دەفن کەردەنم
|
| شازادە تۆ وێت چەنی وەزیران
|
تەمام ئەهل شار دانا پەزیران
|
| گردین وەیەک بار وە بێ مواسا
|
بشۆن وە مەسجێد خانەی کلیسا
|
| کناچەم خورشید شای عاڵەمگیرەن
|
عاڵەم جە سەوداش بەستەی زەنجیرەن
|
| تۆ بەلوتف وێت بە فیرۆزیی بەخت
|
سەرئەفراز کەری ئەو بە تاج و تەخت
|
| ئەهل فەرەنگ پێش یەکسەر بۆ تەسلیم
|
هیچ کەس نەئەمرش نەبۆ لام و جیم
|
| بەوێنەی شاهان فەرمان ڕەوا بۆ
|
ئەو نەجاگەی من وە پادشا بۆ
|
| بغەیرئەز خورشید شۆخ دڵ پەسەند
|
فەرزەند نەدارووم جە دنیای پڕ فەند
|
| وەختێ کە یاوا بە تاج شایی
|
حوکمش ڕەواج بی بە دڵروبایی
|
| ئەوسا جەو دمدا تۆ وێت مەزانی
|
ئەڵبەت سەرئەنجام کارت مەوانی
|
| ئەگەر مەیلت بۆ شۆخ دڵپەسەند
|
تۆ بە سەلالەی بکەری پەیوەند
|
| بە ئەمر بێ چون حەیی لایەنام
|
قاتب فەنا بی، عومرش بی تەمام
|
| شازادە و یاران ئەهل شار تەمام
|
کارسازیی دەفنش کەردن سەرئەنجام
|
| واتشان ئەی شا شازادەی سەروەر
|
وەسیەت قاتب تۆ بە جا باوەر
|
| وات بەخان محەمەد حەمید هەردووشان
|
باوەران وەی جا ماهـ زەڕئەفشان
|
| یاران بەفەرمان شازادە ویەردن
|
شین نازاران وێشان ئاوەردن
|
| ڕووکەردن وە شار جە کووچە و بازار
|
ئامان وەسەیران تەمام ئەهل شار
|
| دمای ئەی شۆخان بەلارە و لەنجە
|
کان جەواهێر خەرامان گەنجە
|
| خورشید جە خورشید وێنەی خوەر ئیوار
|
شەوقش پێکا نوور نەو ماوا و دیار
|
| کەمەر بەست بەدین موعجیزەی عیسا
|
بە شۆخ و شەنگی شی پەی کلیسا
|
| بەتەرکیو ئەندام سەوڵ خاتر تەڕ
|
تەشریف بەرد وە بان تەخت ساف زەڕ
|
| شازادە جەلاش مدرا وە پاوە
|
کەماڵ و هۆشش نەمەند جەلاوە
|
| سۆزیا جە عەشق خورشید تابان
|
هاوەختەن بەرشۆ قەلب شیرین گیان
|
| خورشید کە زانا شازادەی سەرمەست
|
عەقڵ و هۆش و فام بەرشییەن جە دەست
|
| دەست دانە باهۆی شازادەی دڵڕێش
|
ئاوەرد وە سەرتەخت بە هامڕاز وێش
|
| وەزیر و نایب چەنی ئەهل شار
|
ئاوەردن پەرێش تاج زەڕنیگار
|
| شازادە تاجش وەبێ مواسا
|
گرت بە دەستەوە پەیاپەی بۆسا
|
| نام خودا بەرد پەی خورشید شەرق
|
وات موبارەکت نیا وە ڕووی فەرق
|
| کەمەر گەوهەر جە کەمەرگاش بەست
|
شازادە هۆشش یەک جار ببی خەست
|
| نیگاش مەکەردن سەرداران سەف
|
زانان کە هۆشش بەرشییەن نەکەف
|
| خورشید نە پەردە کەرد نیگای باڵش
|
زانا کە ڕێزان یاد و کەماڵش
|
| وات سەرگەردت بام شێر عەرسەی جەنگ
|
نام مەردیی وێت نەدەری جەسەنگ
|
| سەرئەنجام کار مەکێشی تانە
|
مەبی وە ڕێسوای دەورو زەمانە
|
| هەم وێش بەی دەستوور گرفتار بی پێش
|
مەلوول بی چوون لوول زوڵف تار وێش
|
| بە پەنهانی وێش ئەسرین کەرد جاری
|
بێزار بی تەمام جە شەهریاری
|
| شێر دوو چەندان موبتەڵا بی پێش
|
پەشێو چوون لوولیی تای کەڵافەی وێش
|
| شێر دڵاوەر زانا بە کارش
|
عاشقەن بە شەوق شێوەی دیدارش
|
| چەنی شازادە ماهـ فیرووز بەخت
|
نیشتەبێن وە هەم ئەو جە بان تەخت
|
| وەزیر و ئەعیان ئەفسەر وەلاوە
|
نە پای تەخت شام دران وە پاوە
|
| ئاوەردن وەبار دانەی بێ مەدار
|
ئەشرەفی بەسەنگ تەڵا بە خەروار
|
| نە فەرق دوڵبەر نێسار کەردشان
|
نامش جە تۆمار شاهی بەردشان
|
| شیرین شەربەتان موبارەک بادی
|
وەنۆشان تەمام بە دڵگوشادی
|
| ساقیی سیم ئەندام بادەی مەی بەکەف
|
مدران وێنەی گوڵ نە دەوران سەف
|
| شای خورشید سەندش پیاڵەی بادە
|
بە غەمزە سپەرد بەدەس شازادە
|
| شێر دڵاوەر زانا مەیلشەن
|
گرفتار بییەن سەرتوفەیلشەن
|
| نەجا هۆرێزا شازادەی دڵتەنگ
|
جام سەندش جەدەس شازادەی فەرەنگ
|
| هەر وەقت نۆش مەکەرد پیاڵەی جەدید
|
مەوات بەعەشق دیدار خورشید
|
| خورشید مەواتش گیانم نۆشت بۆ
|
پەژارەی دەوران فەرامۆشت بۆ
|
| ساقی سیم ئەندام ئاوەردش بادە
|
مەبەرد وە خزمەت پەرێ شازادە
|
| نیگا کەرد بە جام شۆخ جام جەمین
|
ئیشارە کەردش بە نۆش ئافەرین
|
| هەم جەنەو ساقی پیاڵە پڕ کەرد
|
بە دەست شیرین فەرەنگی سپەرد
|
| دیسان کە فەرما جام زەڕ نیشان
|
کەردش تەعاروف ماهـ زەڕئەفشان
|
| شیرین بە لەنجە دەس کێشا پەی جام
|
جامش سەند جە دەست شۆخ دڵارام
|
| نۆشا وات بەیاد تاق ئەبرووی یار
|
یەعنی خان محەمەد یار وەفادار
|
| جەدمای بادە گوڵبانگ یاران
|
هۆرێزان وە پا شای وەفاداران
|
| شازادە و یاران هەم نۆش ئافەرین
|
ئامان وە مەنزڵ وێشان بە تەمکین
|
| نۆش ئافەرین وات شازادەی سەروەر
|
ئارەزووی خورشید ئاما بەنەزەر
|
| چێهرەی گوڵ ئاسای خورشید عاڵەم
|
من وە بێ نێقاب بوینام وە چەم
|
| مەعلووم بۆ جەلام شێوەی جەماڵش
|
چ تەرزەن ڕەونەق فیرۆزەی خاڵش
|
| شازادە واتش ئەی دڵئەفرووزم
|
ئەی دیدار تۆ ڕەوشەنیی ڕووزم
|
| هەرچەند ئەو غەنیی تاج و ئەفسەرەن
|
شێوەی تۆ سەد بار جەو زیاتەرەن
|
| ئەرچێ ئەو نازدار نەتەخت شاهەن
|
تۆ وێنەی خوەری ئەو وێنەی ماهەن
|
| شای نۆش ئافەرین خەندە کەرد بە ناز
|
واتش شازادە شێر سەرئەفراز
|
| ئەی حەرف و ئەی ڕاز چۆنم پەسەندەن
|
بەوێم مەزانووم فامت نەمەندەن
|
| مەزانوو مەردیت بەغارەت بەردەن
|
بەدیدار وێش موبتەڵات کەردەن
|
| ئەمن کە حەکاک ڕۆزگارانم
|
سەرمەشق دەفتەر «کول کارانم»
|
| ئیسە ئەی کارە زاهر دیارەن
|
شازادە زەلیل زوڵف نازارەن
|
| من حەسرەتمەندم شێوە و جەماڵش
|
بوینام وە چەم فیرۆزە و خاڵش
|
| مەعلوم بۆ جە من شێوەش چەتەورەن
|
بەی دەستوورە تۆ موتبەلا کەردەن
|
| ئەو هەم وە ڕۆدا شێوەی تۆ پێشەن
|
خاترش بەتیر عەشق تۆ ڕێشەن
|
| نۆش ئافەرین وات شازادەی خوونخوار
|
با بشین وەسەیر ئەو شۆخ نازار
|
| بەڵکو بوینم ئەو وەبێ نێقاب
|
بزانووم چۆنەن ماهـ جەهان تاب
|
| ساکە ئێدش وات هۆرێزان وە پا
|
تەشریف بەردشان بە ئەو بارەگا
|
| تا شین بە حەرەم سەرای پادشا
|
ناگا کەردشان نەو جاگە و ماوا
|
| دین کە بارەگا کەس نییەن تێدا
|
شنۆی دیاریش نمەیۆ پێدا
|
| شازادە پەرسا جە خدمەتکاران
|
جە کۆن نازەنین شای وەفاداران
|
| جەواب دا وەنەش شێر دڵئەفرۆز
|
دەستوور شاهەن تا وەعدەی هەفت ڕۆز
|
| جە ئەوەل جلووس جە عالیجاهی
|
وەختێ کە یاوان وە پادشاهی
|
| نەسەرا و حەرەم نمەکێشۆن سەر
|
نمەیۆن وە بان تەخت کورسیی زەر
|
| مەشۆن وەمەسجێد خانە و کلیسا
|
مەنیشۆ نەوجا تاهەفت ڕۆ تەنیا
|
| ساکە ئێد شنەفت نەوەی نامدار
|
وات بەخان محەمەد یار وەفادار
|
| ئیرادەم هەوەس کلیسا دارۆم
|
بشووم بە ئەو جا بوینوم یارۆم
|
| شازادە و یاران هەم نۆش ئافەرین
|
ماهـ زەڕئەفشان شۆخ نازەنین
|
| شین بە کلیسا کام وێشان
|
شێوەی شیرین خاڵ زاهر بی لێشان
|
| دیشان مەکانێ بیروون جە پەردە
|
پەردە وە باڵای پەردە ویەردە
|
| هەفت پەردە کریان سورخ ئەڵوەنی
|
ئەزرەق و ئابی گوڵ گوڵ سۆسەنی
|
| شازادە پەرسا جە خدمەتکاران
|
حاجێب دەرگای شای وەفاداران
|
| واتش ئەی حاجێب ئەی پەردە چێشەن
|
پەردەدار کێیەن کێ نەدڵێشەن
|
| حاجێب دا جەواب ئەی شێر جەنگی
|
ئینە دەستوورەن جەلای فەرەنگی
|
| هەر وەقت پادشای فەرەنگ فەنا بی
|
کەسێ تەر بە جای ئەو پادشا بی
|
| نەقاشان مەیان سوورەت مەکێشان
|
پەی یادگاری بمانۆ لێشان
|
| هەر وەقت پادشای تازە بەرجا بۆ
|
جە دمای ئەو شا وە پادشا بۆ
|
| بوینۆ سوورەت شاهان تازی
|
نەنازۆ بەتاج بە سەرئەفرازی
|
| بزانۆ دنیا بەی تەور بێ شەرمەن
|
هەر ڕۆ بەرەنگێ بازارش گەرمەن
|
| سەرفکەندە بۆ جە دونیای غەدار
|
پەی هیچ کەس نییەن شاهی پایەدار
|
| عەداڵەت خاسەن، ڕەعیەت پەروەری
|
ساحێب هیمەت بۆ و دانا گوستەری
|
| هەم تێدا بەستەن نەقش قاتب شا
|
ئەی پەردە پۆشان کەس نیگا نەکا
|
| ئینە فەرموودەی شای گوڵعوزارەن
|
پەردەشان کەردەن ئەو نەپێوارەن
|
| بەی تەور سێ پەردە کەردەنش موحکەم
|
تا کە بێگانە نەوینۆش وە چەم
|
| شا وات ئەی پەردە پەردە دا نەرووش
|
تا من بەدیدەی زیا ببینووش
|
| حاجب بە فەرمان شازادەی سەروەر
|
پەردەی نەقاشی هەوادا نەسەر
|
| ناگا یەک خورشید ئاما بەدیدار
|
شەوقش خۆر بەردەن نەپەردەی پێوار
|
| شازادە پەرسا نیگا کەرد بە جەخت
|
بەو مەجلیس شا بەو ئەفسەر و تەخت
|
| وەزیران نەپای تەخت زەڕنیگار
|
دەستەبەدەستە مدران ئینتیزار
|
| شا نیشتەن وە بان تەخت ساف زەڕ
|
شەوق مەدۆ چون شەوق فەرەیدوون فەڕ
|
| خورشید نە سەرتەخت گرتەنش قەرار
|
شەوق مەدا چون شەوق شۆڵەی خۆرئێوار
|
| ئاهیر کەفت نەجەرگ سفتەی شازادە
|
جەنیگای ئەو شۆخ فەرەنگی زادە
|
| مەدهۆش بی نەشەوق نازار دڵکێش
|
یەکسەر شی وە باد عەقڵ و فام و هۆش
|
| خورشید چ خورشید ڕای تاریف نییەن
|
نە وێنەی حووران نە چون پەرییەن
|
| نە وێنەی شیرین شار ئەرمەنەن
|
نە تەرسای شار نە جە فەرەنگەن
|
| نە چون گوڵئەندام خاقان چینەن
|
نە چون هومەیلا گیسوو مشکینەن
|
| نە چون زولەیخا میسری موقامەن
|
پەری و جن و دێو نە سەوداش سامەن
|
| بەی شۆخی و شەنگیی شیرین عاڵەم
|
دیدەی زەمانە ناوەردەن بە چەم
|
| نییەن گونجایش سەنای جەماڵش
|
مانەندش نییەن فیرووزەی خاڵش
|
| عارفان شەیدای ڕێزەی قەندشەن
|
شاهان گرفتار تای کەمەندشەن
|
| دەروێش و مسکین سەر نە سەوداشەن
|
مورشیدان خەستەی تیغ مەوداشەن
|
| جە ئادەم بەری سەرڕشتەی نوورەن
|
پەری بەهەشتەن هەم وێنەی حوورەن
|
| ناوەردەن نەخاو دیدەی زەمانە
|
هەر کەس بوینۆ مەبۆ دێوانە
|
| هەر کەس بوینۆ ئەو شۆخ شەڕجۆ
|
بەوێنەی مەجنوون ڕوو مەکەرۆ کۆ
|
| هەر کەس بوینو خاڵ فلفل دانە
|
مەبۆ بەڕسوای دەورە و زەمانە
|
| بەوێنەی شیرین زوڵف عەنبەرینەن
|
کەمتەر کەنیزش نۆش ئافەرینەن
|
| وەلحاسڵ ئەو شۆخ نادرەی نارین
|
بە تەمەنای دڵ بییەن ئافەرین
|
| ئەر بەیۆ بە زبان تەمام مووی ئەعزام
|
وەسف جەماڵش نمەبۆ تەمام
|
| هەرگیز بەی دەستوور نادرەی نایاب
|
نەکەس شنەفتەن نە دییەن بە خواب
|
| بەڵێ شیرینەن جە پا تا وە سەر
|
نییەن جە سوورەت بوتخانەی ئەخزەر
|
| ئەبرۆ چون کەمان قەوس ئاسا سەنعەت
|
خەم کەردەن بە دەست قەواس سەنعەت
|
| موژگانش بە خون دڵدۆز قاتڵ
|
غەزەب بێ باک عەدوو چەنی دڵ
|
| سافیی سای گەردەن تا سەدر سینە
|
کەس نەدییەن مەحبووب بەی شکڵ و وێنە
|
| خولاسەی کەلام جە سەر تا دامان
|
ڕژیان بە لەقای تەجەلای سوبحان
|
| شازادە و یاران هەم نۆش ئافەرین
|
حەیران بین بە شەوق شۆخ گوڵ جەمین
|
| بەو زوڵف و بەو تەرز فیرووزەی خاڵش
|
عاشق بین بەشەوق شێوەی جەماڵش
|
| پەرسا جە حاجب شازادەی چینی
|
ئەی شۆخە کییەن بەی نازەنینی
|
| واتش یە خورشید زەڕین کوڵاهەن
|
کناچەی عەزیز فەرزەند شاهەن
|
| وێت بەستی کەمەر زونار نەگەردەن
|
تو وێت پادشای فەرەنگیت کەردەن
|
| شازادەی ئەی حەرف ئاشنا بی پێش
|
گورێزا جەلاش ئێختیار وێش
|
| دڵ نە دەرک هەوڵ کەماڵ تەواسا
|
بەر ئاما جە بەیت ماڵ کلیسا
|
| قەرارش بڕیا سەبووری نەداشت
|
بار غەم حەڵقەش نەدەروون گوزاشت
|
| تا شین بە مەنزڵ شەو دیدە بێ خاو
|
ئەسرین مەرێزا چون جۆش سەیڵاو
|
| کەردش بە عادەت هەر وێنەی عیسا
|
گشت ڕۆژێ مەشی بە تۆی کلیسا
|
| مەگرتش قەرار تا بە نمای شام
|
مەکەردش نیگای شۆخ جەمین جام
|
| تا مودەی هەفت ڕۆژ ئینە کارش بی
|
نە کەماڵ و هۆش نەئێختیارش بی
|
| جە دمای هەفت ڕۆژ جاڕکێشان وە شار
|
ئەهل بازاڕ کەردن خەبەردار
|
| نازار فەرەنگ شای شیرین دەماغ
|
مەشۆ بە گوڵگەشت بە سەیران باغ
|
| ئەی خەبەر بە گۆش شازادە یاوا
|
خەبەر وێنەی تێغ جەرگش ئەشکاوا
|
| واتش خان محەمەد ڕەفیق گیانی
|
حەرفێ مەواچووم من وە پەنهانی
|
| ئیمشەو هۆرێزە وە بێ دەردیسەر
|
بشین وە تۆی باغ شیرین دوڵبەر
|
| بەڵکو بوینووم شێوەی جەماڵش
|
تا نەبۆ نە دڵ وەسواسەی خاڵش
|
| خان محەمەد واتش ئەی شێر دڵجۆ
|
ناموناسبەن ئەی کارە پەی تۆ
|
| نەی شەوی تاریک بەراگەی گوڵزار
|
ئەرکەسێ ببۆ لێمان خەبەردار
|
| ئەڵبەت مەپەرسۆ مەکەرۆ خەتاب
|
فیدات بام جەودەم چێش مەدەی جەواب
|
| ئەگەر دەست وە تیغ مەودا باوەریم
|
غوڵام خورشید خوون ڕێز مەکەریم
|
| فەردا جە دیوان شۆخ چەم سیاهـ
|
حەرفمان چێش بۆ کەردەی ئەی گوناهـ
|
| مەبین خەجاڵەت شەرمەندەی دوڵبەر
|
هەم ڕسوای عاڵەم تا یەومولمەحشەر
|
| شازادە عەرزش تەمام قەبوول کەرد
|
بە ئارەزووی دڵ پەشیمانی بەرد
|
| واتش ئەی یاران دڵ بە هەراسەن
|
پەنەم بواچن چێش کەروون خاسەن
|
| بوینووم ڕەونەق شێوەی جەماڵش
|
تا ساکن بۆ دڵ نەفیکر خاڵش
|
| خان محەمەد واتش ئەی شێر سەرکەش
|
پەڕ ڕوخ باوەر بینەر بە ئاتەش
|
| زووبەزوو مەبۆ حازر ڕوخ جە لات
|
دروست مەبۆ کار هەرچێ هەن سەودات
|
| قەبوول کەرد عەرزش شێر هونەرمەند
|
خۆشحاڵ بی خەیلێ تەمام کەرد پەسەند
|
| ئاهیر نەجەرگ بوریان کەردش گەش
|
پەڕ ڕوخ ئاوەرد نیا بە ئاتەش
|
| حازر بی دەردەم مورغ پڕمایە
|
کەفت نەخاک پای شای بوڵەند پایە
|
| واتش فیدات بام چێشتەن موشکڵ
|
ئەر جەکۆی قاف بۆ مەکەرووم حامڵ
|
| واتش ئیستێدعام ئێدەن من بە تۆ
|
بەشەو و بە ڕۆژ مدارات نەبۆ
|
| تۆ بشی بە باغ ڕەوزەی دڵگوشا
|
بشی وە خدمەت عەبدورەحمان شا
|
| چەنی نازەنین خاتوونەی پەری
|
تا بە وەقت شام وەی جا باوەری
|
| من جە دەرووندا خەیلێ زگارم
|
نەشەو خاوم هەن نە ڕۆژ بێ قەرارم
|
| تا بەدیدارش دیدە ڕەوشەن کەم
|
دەروون پڕ غەم وێنەی گوڵشەن کەم
|
| بشین وە گوڵزار خورشید عاڵەم
|
ئەو شۆخ شیرین بوینوون وە چەم
|
| بەڵکم بەر بشۆ غەم نە دەروونم
|
سارێش بۆ زامان خەستەی زەبوونم
|
| بوینووم شێوەی بەهار پڕ گوڵ
|
بەرباد بۆ غوسەی پەژاران دڵ
|
| مورغ مەرەخەس بی پەرواز کەرد نەوجا
|
ڕووکەرد نە ئیرەم بە فەرمان شا
|
| با ڕوخ بمانۆ بە فەرمانبەری
|
بشین وە سەروەخت خاتوونەی پەری
|
